«Իշխանության և վարչապետի պաշտոնի համար պայքարը շարունակվելու է»․ նախկին նախագահ Ռոբերտ Քոչարյան

Հայաստանում նոր խորհրդարան է ընտրվել։ Նախնական արդյունքների հայտարարումից հետո «Հայաստան» դաշինքը, որի առաջնորդը նախկին նախագահ Ռոբերտ Քոչարյանն է, հայտարարել է, որ ընտրությունների արդյունքները վիճելի են թվում։ Իսկ տեղացի և օտարերկրացի լրագրողների համար ասուլիսին Ռոբերտ Քոչարյանը հայտարարել է, որ իշխանության գործողությունները հանգեցնելու են նոր արտահերթ ընտրությունների, և «Հայաստան» դաշինքը պայքարը շարունակելու է իշխանության և վարչապետի պաշտոնի համար։

ԿԸՀ նախնական տվյալներով՝ նոր խորհրդարան են անցել վարչապետի պաշտոնակատար Նիկոլ Փաշինյանի «Քաղաքացիական պայմանագիրը», նախկին նախագահ Ռոբերտ Քոչարյանի «Հայաստան» դաշինքը, ինչպես նաև «Պատիվ ունեմ» դաշինքը, որը միավորել է Ազգային անվտանգության ծառայության նախկին ղեկավար Արթուր Վանեցյանի և նախկին նախագահ Սերժ Սարգսյանի կուսակցությունները։

• ՀՀ-ում ընտրությունների արդյունքները․ «թավշյա» հեղափոխությունը փոխակերպվեց «պողպատի՞»
• «Ուրիշ» խորհրդարան Հայաստանում․ համախմբո՞ւմ, թե՞ ապակայունացում

Իշխանության համար պայքարը շարունակվելու է

Ռոբերտ Քոչարյանը հայտարարել է, որ իշխանության համար պայքարը կդադարի միայն այն դեպքում, եթե գործող իշխանությունը հրաժարական տա․

«Ուրիշ էլ ի՞նչ նպատակով ենք մենք խորհրդարան մտնում։ Գիտեք, թե մենք խորհրդարան ենք գնում ինչ-որ մանդատների համա՞ր […]։ Եթե գործող իշխանությունը հեռանա, երկրում ազգային ուղղվածությամբ իշխանություն հաստատվի, ես ինձ ազատ մարդ կհամարեմ և կմտածեմ քաղաքական պայքարի դադարեցման մասին։ Մինչև այդ պահը մենք պայքարելու ենք՝ երկրի համար պատասխանատվություն ստանձնելու համար»։

Միաժամանակ, նախկին նախագահն ընդգծել է, որ անձամբ իրեն խորհրդարանում չի տեսնում․

«Ես, ավելի շատ, գործադիր իշխանության մարդ եմ, քան օրենսդիր։ Այդ պատճառով էլ ինձ դժվար եմ տեսնում խորհրդարանում։ Սակայն վերջնական որոշում դեռ չեմ կայացրել»։

Նախկին նախագահը մեկնաբանել է նաև ընտրությունների հաջորդ օրը Հանրապետության հրապարակում Նիկոլ Փաշինյանի բազմամարդ հանրահավաքը։ Միջոցառումից հետո նրա մոտ տպավորություն է ստեղծվել, որ ներկայիս իշխանության գործողություններում ոչինչ չի փոխվելու․

«Եթե իշխանությունը շարունակի գործել այնպես, ինչպես սրանից առաջ՝ մյուսներին վախեցնելով բռնաճնշումներով և վենդետաներով, մենք շատ շուտով նոր արտահերթ ընտրությունների առջև ենք կանգնելու։ Դա շարունակվելու է այնքան ժամանակ, քանի դեռ նրանք չեն հասկացել, որ այսպես ներքին քաղաքականություն վարել պարզապես չի կարելի»։

2018 թ-ին, երբ «թավշյա» հեղափոխություն տեղի ունեցավ, իշխանությունը վստահության մեծ քվե ստացավ և կարող էր երկիրը տանել ճիշտ ուղղությամբ, կարծում է նախկին նախագահը․

«Սակայն նրանք գնացին վենդետաների, անձնական հաշիվներ մաքրելու ճանապարհով։ Սա ավարտվեց Ղարաբաղի կորստով, տնտեսական և ներքաղաքական ճգնաժամով»։

Ընտրություններում տեղ գտած խախտումների մասին

«Հայաստան» դաշինքի նախընտրական շտաբները խախտումների մասին նյութեր են հավաքում՝ Սահմանադրական դատարան դիմելու համար, ասել է Քոչարյանը։ Նրա խոսքով՝ արդյունքներն իրենց համար անսպասելի էին, քանի որ հարցումներն այլ պատկեր էին ցույց տալիս․

«Ենթադրում ենք, որ զանգվածային խախտումներ են եղել, մենք տեսել ենք վարչական ռեսուրսի ակնհայտ կիրառում, այդ պատճառով էլ ՍԴ ենք դիմելու»։

Մանդատը, որը ստացել է այս իշխանությունը, վստահության մանդատ չէ, համոզված է նախկին նախագահը․

«Մենք շարունակելու ենք մեր պայքարը։ Խորհրդարանական պայքարն ուժեղացնելու է մեր փողոցային պայքարը։ Մենք ունենք ակտիվ կողմնակիցներ, փողոցային պայքարի մեծ փորձ։ Այս ընտրությունները փոխել են քաղաքական լանդշաֆտը։ Մեր կողմից խորհրդարանական պայքար մտնելը ցունամիի պես բան էր։ Մենք պահպանելու ենք այս տեմպն ու դինամիկան։ Մենք ներուժ ունենք բոլոր առումներով»։

Արդյո՞ք Քոչարյանը կսեղմի Փաշինյանի «հաշտեցման ձեռքը»

Ընտրողների ձայների հաշվարկի գիշերը «Քաղաքացիական պայմանագիր» կուսակցության շտաբ-բնակարանում ելույթ ուենալիս Նիկոլ Փաշինյանը հայտարարել էր, որ պատրաստ է բանակցություններ վարել քաղաքական այն ուժերի հետ, որոնք պատրաստ են երկխոսության։

Ռոբերտ Քոչարյանը դրան չի հավատում․

«Դուք նկատե՞լ եք «հաշտեցման ձեռք»։ Ես չեմ նկատել։ Այս իշխանությունն այնքան է ստել, որ նրան պարզապես հնարավոր չէ հավատալ։ Իշխանությունը, որը ստել է 44 օր [այդքան է տևել Արցախյան երկրորդ պատերազմը 2020 թ-ի աշնանը], հայտարարում է մի բան, հետո նրանցից մեկը հակառակն է ասում։

Չեմ կարող հավատալ, հատկապես, երբ հայտնի բժիշկ Արմեն Չարչյանին ուզում են անհեթեթ մեղադրանքով կալանավորել [պահանջել է, որ իր ղեկավարած հիվանդանոցի աշխատակիցները գնան ընտրության, մեղադրվում է ընտրողների վրա ճնշում գործադրելու մեջ]։ Եվ անձինք, որոնք մեղավոր են 5 հազար մարդու մահվան համար [խոսում է Արցախյան երկրորդ պատերազմում զոհվածների մասին], փորձում են կալանավորել բժշկին, որը հազարավոր կյանքեր է փրկել։ Սա է այս իշխանության իսկական դեմքը»։

Նախկին նախագահը համոզված է, որ իշխանությունը վենդետայի նոր շարք է սկսելու, սակայն իր գլխավորած դաշինքի քաղաքական պայքարը լինելու է օրենքի շրջանակում․

«Մենք ընտրություններից անմիջապես հետո մարդկանց փողոց դուրս չենք բերել։ Մենք կարծում ենք, որ ողջ գործընթացը պետք է իրավական ճանապարհով գնա»։