Թբիլիսիում հազարավոր մարդիկ ժամերով հերթ են կանգնում պատրիարքին վերջին հրաժեշտը տալու համար
Իլյա II կաթողիկոսի հոգեհանգստի արարողությունը Վրաստանում
Երեք օր շարունակ Թբիլիսիում տասնյակ հազարավոր մարդիկ ժամերով հերթ են կանգնում՝ Վրաստանի կաթողիկոս-պատրիարք Իլիա II-ին վերջին հրաժեշտը տալու համար։
Պատրիարքը մահացել է հիվանդանոցում՝ 93 տարեկան հասակում՝ երկարատև հիվանդությունից հետո։ Նա 48 տարի ղեկավարել է Վրաց ուղղափառ եկեղեցին։ Նրա հուղարկավորությունը տեղի կունենա կիրակի՝ մարտի 22-ին, Սիոնի տաճարում։
Քաղաքացիական հոգեհանգստի արարողությունը տեղի է ունենում Թբիլիսիի Սամեբա տաճարում, որը բաց է 24 ժամ։
Մարդկանց հոսքը չի դադարում նույնիսկ գիշերային ժամերին։ Մարտի 19-ին այնքան շատ մարդ կար, որ երեկոյան եկածները տաճար կարողացան մտնել միայն լուսաբացին։
Իլյա Երկրորդի վերջին հրաժեշտի արարողությանը մասնակցող մարդկանց թիվն աննախադեպ է։
Սոցցանցերի օգտատերերը գրում են, որ պատմության մեջ երբեք որևէ իրադարձություն այդքան լայն ուշադրության չի արժանացել։
Թբիլիսիի հասարակական տրանսպորտն այս օրերին գործում է հատուկ գրաֆիկով։ Մետրոյի կայարաններն ավելի ուշ են փակվում։ Մարտի 21-ին և 22-ին մետրոն և ավտոբուսները անվճար են աշխատելու։ Վրաստանի խոշոր քաղաքներից գնացքները նույնպես անվճար են մարդկանց տեղափոխում։
Ավելին, Վրաստանի բոլոր մունիցիպալիտետներն ապահովում են իրենց բնակիչների ավտոբուսներով անվճար տեղափոխումը Թբիլիսի, որպեսզի նրանք կարողանան հրաժեշտ տալ պատրիարքին։
Խաթունա Վարդանիձեն՝ դեղին նարգիզները ձեռքին, ավելի քան երեք ժամ է, ինչ կանգնած է հերթում՝ պատրիարքին իր վերջին հրաժեշտը տալու համար։ Ասում է, որ տաճարի ծխական է և բազմիցս հանդիպել է պատրիարքին, հրաժեշտն առանձնահատուկ ծանր է իր համար։
Հազարավոր մարդիկ օրեր շարունակ լուռ քայլում են դեպի տաճար։ Ճանապարհին նրանք հաճախ հանդիպում են անվճար ջուր բաժանող խմբերի։ Այդ խմբերից մեկը JAMnews-ին ասել է, որ ներկայացնում է Coca-Cola ընկերությունը։
Դեպի տաճար տանող փողոցների բնակիչները ևս ջուր և կոմպոտներ են առաջարկում մարդկանց։
Տաճարի մուտքը խստորեն համակարգվում է։ Կարգուկանոնը պահպանվում է ոչ միայն ոստիկանության, այլև զինվորականների կողմից։
Մարդիկ տաճար են մտնում երկու շարքով և դուրս գալիս երկու շարքով երկու տարբեր կողային մուտքերով։ Սա քաոսից և հրմշտոցից խուսափելու միակ հնարավորությունն է։
Դավիթ Ռատիվեկովը մտածված է այս հագուստով եկել։ Այն կարվել է տարիներ առաջ պատրիարքարանում՝ կաթողիկոս-պատրիարքի օրհնությամբ «Ուրմուլի» անսամբլի անդամների համար։
Զուրաբ Օկրոպիրիձեն պատրիարքի հետ հանդիպել է 2012 թվականին, երբ կաթողիկոսը օրհնել է նրա ընտանիքը։
Վրաստանում ազգանունների օրհնության ծեսը կապված է Իլյա II պատրիարքի հետ։ Սա պաշտոնական եկեղեցական ծես չէ։ Մարդիկ հավատում էին, որ պատրիարքի օրհնությունն ունի հատուկ ուժ, ուստի նույն ազգանունով ընտանիքների անդամները հաճախ միասին դիմում էին պատրիարքարան՝ օրհնություն ստանալու համար։
Կաթողիկոս-պատրիարք Իլյա II-ի հուղարկավորությունը տեղի կունենա Սիոնի տաճարում կիրակի՝ մարտի 22-ին։ Սա նրա ցանկությունն էր։
Այդ կապակցությամբ Վրաստան կժամանի Տիեզերական պատրիարք Բարթողոմեոսը։ Նա Սամեբա տաճար կժամանի ժամը 12:00-ին և վրաց հովվապետերի հետ միասին կկատարի պատրիարքի հուղարկավորության արարողությունը։
Դրան կմասնակցեն հոգևորականներ բազմաթիվ երկրներից։ Արդեն հայտնի է, որ Իլյա II-ի հուղարկավորությանը կմասնակցեն նաև կաթոլիկ եկեղեցու, այդ թվում՝ Վատիկանի ներկայացուցիչներ։
Կիրակի՝ մարտի 22-ին, տաճար մուտք գործել հնարավոր կլինի միայն հատուկ թույլտվությամբ։ Լրագրողներին ներս չեն թողնի։
Մարտի 21-ին և 22-ին Թբիլիսիում երթևեկության լրացուցիչ սահմանափակումներ են մտցվել։ Դրանց մասին ավելի մանրամասն տեղեկություններ կարելի է գտնել այս հղումով։
Կաթողիկոս-պատրիարքի մահվան կապակցությամբ Վրաստանում հայտարարվել է սուգ։ Չեղարկվել են բազմաթիվ համերգներ, ներկայացումներ և միջոցառումներ։ Վրաստանի մուսուլմանները չեղարկել են Նովրուզի և Ռամադանի՝ մուսուլմանական հիմնական տոների կապակցությամբ նախատեսված միջոցառումները։
Հետևեք մեզ — Facebook | Youtube
Իլյա II կաթողիկոսի հոգեհանգստի արարողությունը Վրաստանում
