Թրամփը ձերբակալվեց, բայց դա դեռ կալանք չէր
Դոնալդ Թրամփն ԱՄՆ պատմության մեջ առաջին նախագահն է, ում քրեական մեղադրանքներ են առաջադրել և ձերբակալել։ CNN-ը գրում է, որ դա կալանք չէր, այլ ստանդարտ ընթացակարգ։
Թրամփը Մանհեթենի շրջանային դատախազությունում է եղել դեռևս նախքան մեղադրանքի առաջադրումը, ինչը տեղի է ունեցել երեկ՝ ապրիլի 4-ին։ Հաղորդվում էր, որ նախկին նախագահը պատրաստվում է վերադառնալ Ֆլորիդա և ելույթ ունենալ Մար-ա-Լագոյում՝ շարունակելով իր քարոզարշավը որպես նախագահի թեկնածու 2024 թվականի ընտրություններում:
CNN-ի գրել էր՝ Թրամփին կառաջադրվի ավելի քան 30 մեղադրանք, դրանք կապված են բիզնեսում խարդախության հետ։
Հետաքննությունն ընթանում է 2016 թվականին մեծահասակների համար ֆիլմերի դերասանուհուն կատարված գաղտնի վճարումների հետաքննության շրջանակներում: Պաշտոնական վարկածի համաձայն՝ նախկին նախագահի նախկին փաստաբան Մայքլ Քոհենը 130 հազար դոլար է վճարել պոռնոաստղ Սթորմի Դենիելսին, ով պատրաստվում էր հրապարակայնորեն խոսել քաղաքական գործչի հետ ենթադրյալ սիրավեպի մասին։ Այդ ծախսերն անօրինական կերպով փոխհատուցվել են Թրամփի նախընտրական ֆոնդից։
Ինքը՝ Քոհենը, դրա համար երեք տարվա ազատազրկման է ենթարկվել դեռևս 2018 թվականի դեկտեմբերին։
Թրամփի փաստաբանական թիմը հայտարարել է, որ նախկին նախագահն իրեն մեղավոր չի ճանաչում և կվիճարկի մեղադրանքները: «Շատ սյուրռեալիստական է թվում. վաու, նրանք պատրաստվում են ձերբակալել ինձ: Հավատս չի գալիս, որ դա տեղի է ունենում Ամերիկայում»,- հաղորդում է Թրամփի TruthSocial սոցիալական ցանցը:
Սպիտակ տունը հայտարարել էր, որ պատրաստվում են հնարավոր անկարգություններին։ Սակայն նախագահ Ջո Բայդենը միայն ասել էր, որ տեղյակ է մեղադրանքի մասին և «ակնհայտորեն» կիմանա լուրերի մասին, բայց նաև շեշտել, որ այդ պատմությունն «իր ուշադրության կենտրոնում չէ»:
«Բայդենը պատրաստվում է կենտրոնանալ այնպիսի բաների վրա, ինչպիսիք են գնիջեցումն ու օգնությունը երկրի բնակիչներին»,- հայտարարել էր Սպիտակ տան մամուլի քարտուղար Կարին Ժան-Պիերը:
