Արխիվ- 15.02.2017

Թրամփը Ռուսաստանից «Ղրիմի վերադարձն» է ակնկալում

ԱՄՆ նախագահ Դոնալդ Թրամփն ակնկալում է, որ Ռուսաստանը կվերադարձնի Ղրիմը Ուկրաինային. այս մասին ամենօրյա ճեպազրույցի ժամանակ հայտարարել է Սպիտակ տան մամուլի քարտուղար Շոն Սփայսերը:

«Նախագահ Թրամփը պարզ հասկացրել է, որ նա ակնկալում է, որ Ռուսաստանի կառավարությունը Ուկրաինայում հակամարտության դեէսկալացիա կսկսի և կվերադարձնի Ղրիմը», — հայտարարել է Սփայսերը:

Ըստ Սպիտակ տան մամուլի քարտուղարի՝ միևնույն ժամանակ Թրամփը կցանկանար բարելավել Ռուսաստանի հետ հարաբերությունները:

Հիշեցնենք, որ իր նախընտրական քարոզարշավի ժամանակ նախորդ տարվա հուլիսին Ղրիմը Ռուսաստանի տարածք ճանաչելու հավանականության մասին հարցին ի պատասխան Դոնալդ Թրամփը չէր բացառել նման հնարավորությունը և հայտարարել էր. «…Որքան լսել եմ, Ղրիմի բնակիչներն ուզում են ավելի շուտ Ռուսաստանի հետ լինել, քան այնտեղ, որտեղ էին»:

Ղրիմի միացման մասին Ռուսաստանը հայտարարել է 2014 թվականի գարնանը, որի կապակցությամբ ԱՄՆ-ն և ԵՄ-ն պատժամիջոցներ են կիրառել Մոսկվայի դեմ: