Թուրքիայում ադրբեջանցի ուսանողուհին մեղադրվում է ահաբեկչության մեջ
Թուրքիայում ադրբեջանցին մեղադրվում է ահաբեկչության մեջ
Ադրբեջանցի ուսանողուհի և ակտիվիստ Նանախանըմ (Նանա) Բաբազադեն մեղադրվում է ահաբեկչության մեջ և պահվում է Ստամբուլի Չատալջա շրջանի արտաքսման կենտրոնում: Ինչպես գրում է OC Media-ն, Թուրքիայից նրան արտաքսելու մասին դատարանի որոշումն արդեն ուժի մեջ է մտել։ Փաստաբանները պնդում են, որ գործընթացը քաղաքական շարժառիթներով է պայմանավորված:
Բաբազադեն երկու տարի առաջ ընդունվել է Ստամբուլի համալսարան, ուսումնասիրել է մարդաբանություն: Միաժամանակ մասնակցել է ֆեմինիստական, քվիր, ուսանողական շարժումներին, ինչպես նաև կենդանիների իրավունքների պաշտպանության ակցիաների:
Ընկերների խոսքով՝ նրա մասնակցությունը բողոքի ցույցերին մեծացրել է արտաքսման ռիսկը: Օգոստոսի 21-ին Բաբազադեն ձերբակալվել է ոստիկանության կողմից վեգանների համար նախատեսված սրճարանում, որտեղ աշխատում էր: Բաբազադեն հայտարարել է, որ ձերբակալությունից հետո բազմիցս ենթարկվել է ֆիզիկական բռնության և ծեծի, երբ հրաժարվել է մերկանալ խուզարկության ժամանակ: Բժշկական զննությունների ընթացքում նրա մարմնի վրա հայտնաբերվել են կապտուկներ և այտուցներ:
Արտաքսման կենտրոնի պայմանները
Փաստաբանները հայտնում են, որ առաջին օրերին Բաբազադեն պահվում էր՝ առանց հագուստը փոխելու հնարավորության, նրան չէին տրամադրում դեղամիջոցներ և սնունդ: Փաստաբանի հետ հանդիպելու հնարավորություն նա ստացել է միայն չորրորդ օրը:
Ապա նրան այցելել են գաղտնի ծառայությունների աշխատակիցները և առաջարկել ազատ արձակել՝ այլ ակտիվիստների մասին տեղեկություններ տրամադրելու դեպքում: Բաբազադեն հրաժարվել է, որից հետո նորից բռնության է ենթարկվել:
Նրան արտաքսելու վարույթ է ձևակերպվել G89 կոդով, որը թուրքական օրենսդրությունում կիրառվում է «օտարերկրյա ահաբեկիչ զինյալների» նկատմամբ: Փաստաբան Ահմեթ Բարան Չելիկը նշում է, որ փաստացի այս կոդը պետք է կիրառվի ԻՊ-ի և այլ ռադիկալ խմբավորումների հետ առնչություն ունեցող անձանց նկատմամբ։ Սակայն այն հաճախ կիրառվում է նաև մարդու իրավունքների պաշտպանների դեմ:
Արտաքսման կենտրոնների քննադատությունը
Թուրքիայի արտաքսման կենտրոնները հայտնի են պահման ծանր պայմաններով և իրավունքների խախտումներով: 2024 թվականին լրագրողների կողմից իրականացված հետազոտությունում ասվում է, որ այստեղ նկատվում է «կամավոր վերադարձի» մասին փաստաթղթերի հարկադիր ստորագրման պրակտիկա, կտտանքների և արժանապատվությունը նվաստացնող վերաբերմունքի դեպքեր:
Կա կարծիք, որ Եվրոպական միությունը՝ այս համակարգին միլիոններով գումար հատկացնելով, անուղղակիորեն աջակցում է դրան:
Բաբազադեին բազմիցս հարկադրել են ստորագրել Ադրբեջան «կամավոր վերադարձի» մասին փաստաթուղթ, սակայն նա հրաժարվել է՝ հայտարարելով, որ իր կյանքին այնտեղ վտանգ է սպառնում, որ նրան սպառնացել են սպանել, այդ թվում՝ իր ընտանիքի որոշ անդամներ:
2024 թվականին արդեն նման դեպք տեղի է ունեցել: Թուրքիայում բնակվող ադրբեջանցի քվիր-ակտիվիստ Ալի Մալիկովը ձերբակալվել էր նոյեմբերի 25-ին կանանց նկատմամբ բռնության դեմ բողոքի ցույցին մասնակցելու համար: Տարբեր ոստիկանական բաժիններում և արտաքսման կենտրոններում պահվելուց հետո նա ստորագրել էր «կամավոր վերադարձի» մասին փաստաթուղթը և արտաքսվել Ադրբեջան:
Բաբազադեի արտաքսման որոշման դեմ նրա փաստաբանների առաջին բողոքարկումը մերժվել է դատարանի կողմից սեպտեմբերի 11-ին: Այժմ փաստաբանները նոր դիմում են նախապատրաստում, սակայն դրա բավարարման հավանականությունը չափազանց փոքր են համարում:
Հետևեք մեզ — Facebook | Youtube
Թուրքիայում ադրբեջանցին մեղադրվում է ահաբեկչության մեջ
