Թե ինչպես գլխավոր ռուս ընդդիմադիրը մեդիակայսրություն ստեղծեց սոցցանցերում

Գլխավոր ռուս ընդդիմադիր գործիչ Ալեքսեյ Նավալնուն արդեն վաղուց թույլ չեն տալիս ելույթ ունենալ դաշնային հեռուստաալիքների և ռադիոկայանների եթերում: Այդ ԶԼՄ-ները հրաժարվում են անգամ նրա անունը բարձրաձայն արտաբերել՝ նախընտրելով նրան «այդ կերպարը» անվանել:

Այդ պատճառով էլ քաղաքական գործիչն այլ ելք չուներ, քան դիմել առցանց լսարանին, կարծում է ռուսական «Նովայա գազետան»:

Այժմ նրա ագիտացիայի և տեղեկատվության ամենահզոր գործիքը յութուբյան ալիքն է, որին հետևում է 1,7մլն մարդ, իսկ Նավալնու բոլոր տեսանյութերի դիտումների ընդհանուր քանակը 300մլն-ից ավել է:

Նավալնին միակ քաղաքական գործիչն է, որն օգտագործում է սոցցանցերը որպես տեղեկատվության տարածման միջոց:

Համացանցում Նավալնու ակտիվ գործունեությունը սկսվել է 2008թ-ին: Այն ժամանակ դեռևս ոչ այնքան հայտնի քաղաքական գործիչը ձեռք էր բերել խոշորագույն ռուսական պետական ընկերությունների արժեթղթեր, որից հետո օգտվել էր տարբեր տեսակի կորպորատիվ փաստաթղթերի հասանելիության իր իրավունքից: Նավալնու նպատակը փողերի հափշտակության և լվացման սխեմաների բացահայտումն էր:

Այդ նույն ժամանակահատվածում ընդդիմադիր գործիչը սկսեց իր հետազոտությունների արդյունքները հրապարակել Live Journal-ի իր բլոգում: Պետական ընկերությունների գործունեության մեջ խոշոր խախտումներ բացահայտած մի քանի հետազոտությունները ցանկալի արդյունք չտվեցին (Քննչական կոմիտեին և դատախազությանը չհետաքրքրեց այդ գործերի մեծ մասը), սակայն Նավալնին ձեռք բերեց այն, ինչին ձգտում էր՝ հայտնի դառնալ համացանցում:

2011թ-ին Նավալնու բլոգն ամեն օր 55 հազար օգտատեր էր կարդում, իսկ Time ամսագիրը ռուս ընդդիմադիր գործչին ներառեց աշխարհի 100 ամենաազդեցիկ անձանց ցանկում:

2012թ-ին Ալեքսեյ Նավալնին միավորեց բոլոր իր առցանց նախագծերը մեկ համակարգում, որը կոչվում է Կոռուպցիայի դեմ պայքարի հիմնադրամ: Հիմնադրամի հիմնական նպատակը բյուջետային միջոցների ծախսերին հետևել է:

Մեկ տարի անց հայտնվեց հիմնադրամի առաջին խոշոր հետազոտությունը, որը պատմում էր Պետդումայի այն ժամանակվա պատգամավոր Պեխտինի՝ Մայամիում ունեցած անշարժ գույքի մասին: Այդ հրապարակումը հանգեցրեց Պեխտինի հրաժարականին:

2013թ-ի ամռանը Նավալնին առաջին անգամ մասնակցեց մասշտաբային նախընտրական ընտրարշավի որպես Մոսկվայի քաղաքապետի թեկնածու: Նավալնու բլոգը Live Journal-ում այդ ժամանակ արդեն վերածվել էր միկրոմեդիայի. ամեն օր այնտեղ հրապարակվում էր երեք գրառում, որոնց նպատակն, առաջին հերթին, Մոսկվայում ընդդիմադիր գործչի վարկանիշը բարձրացնելն ու նրա գլխավոր մրցակից, գործող քաղաքապետ Սերգեյ Սոբյանինի վարկանիշն իջեցնելն էր: Այդ ժամանակ էլ Նավալնու յութուբյան ալիքում հայտնվեց առաջին տեսանյութը:

Արդյունքում այդ ընտրություններին նա հավաքեց ձայների 27,24 տոկոսը առանց պետական մեդիառեսուրսների աջակցության:

Վերջին մի քանի տարվա ընթացքում Նավալնու ալիքը դարձավ ամենապոպուլյարը ռուսական Youtube-ում: Դա, առաջին հերթին, տեղի ունեցավ ռուս կաշառակեր պաշտոնյաների մասին նրա հիմնադրամի խոշոր հետաքննությունների շնորհիվ: Դրանցից ամենաշատ դիտում ունեցածը պատմում է ռուսաստանցի օլիգարխների հետ վարչապետ Դմիտրի Մեդվեդևի կասկածելի կապերի մասին: Այն 26մլն դիտում է ունեցել:

Այժմ Նավալնու հիմնական յութուբյան ալիքում շաբաթ մի քանի անգամ տեսանյութեր են հրապարակվում, որոնցից յուրաքանչյուրը մեկ միլիոնից ավել դիտում է ունենում:

Նրա երկրորդ ալիքում, որը կոչվում է «Նավալնի Live», ամեն օր ուղիղ եթերում տարբեր ծրագրեր են թողարկվում: Ինչպես պատմել է հիմնադրամի աշխատակից Լյուբով Սոբոլը, առաջիկայում պլանավորվում է այդ ալիքով շուրջօրյա հեռարձակում սկսել:

2018թ-ի հունվարին քաղաքական գործիչը հայտարարել է նոր մեդիանախագծի ստեղծման մասին, որը կոչվում է «Լուրեր»:

«Չեմ կասկածում, որ «Նավալնի LIVE»-ի լուրերը հայտնվելու են  գոյություն ունեցող ռուսական խոշոր լրատվամիջոցների տասնյակում, որոնք ունակ են որևէ ճշմարտություն պատմել», — ասել է ընդդիմադիր գործիչը: