Թատրոն, որին բախվել է տանկը

Զուգդիդիի՝ Շալվա Դադիանիի անվան դրամատիկական թատրոնը մեկ տարի անց 150 տարեկան կդառնա: Սակայն վտանգ կա, որ թատրոնը չի ապրի մինչև իր հոբելյանը, քանի որ շենքը փլվում է:

Թատրոնի կոլեկտիվն ընդհանրապես մինչև վերջերս վախենում էր, որ թատրոնը պարզապես կփակեն և այն կմնա միայն հիշողություններում և թանգարաններում: Այժմ ամեն ինչ ավելի հուսադրող է:

Ինչպես JAMnews-ին ասել է թատրոնի գլխավոր ռեժիսոր Բադրի Ցերեդիանին, 2017թ-ի ամռանը վերակառուցման աշխատանքներ կսկսվեն «Քարթու» խմբի ֆինանսական աջակցությամբ:

Իսկ մինչ այդ շենքը հեղեղվում է, երբ անձրև է գալիս, պատերը ճաքել են, ամեն կողմերից ծեփամածիկը թափվում է: Ամբողջությամբ փտել է բեմի և դերասանների շպարասենյակի փայտե հատակը:

Երկրորդ հարկի փայտե հատակի փչանալու արդյունքում մեկ տարուց ավել փակ է թատրոնի կենտրոնական նախասրահի մուտքը: Հանդիսատեսային դահլիճի առաստաղին նոր ճաքեր հայտնվելու պատճառով թատրոնի ղեկավարությունը մի քանի ամիս առաջ որոշել է փակել միակ գործող հանդիսատեսային դահլիճը:

Չնայած այդ ամենին, թատրոնը շարունակել է աշխատել: Ներկայացումներ են բեմադրվել, դերասանները, նախկինի պես, դուրս են եկել բեմ: Ճիշտ է, այս տարի թատրոնի դերասանների և հանդիսատեսի անվտանգության նկատառումներով թատերաշրջանն այդպես էլ չմեկնարկեց, բայց Զուգդիդիի թատրոնն ամեն դեպքում շարունակում է աշխատել: Փորձերն արվում են թատրոնի վթարային շենքի քիչ թե շատ անվտանգ թևում: 

ԽՍՀՄ փլուզումից հետո թատրոնի շենքը ընդամենը մեկ անգամ թեթև վերանորոգել են: Տեղացիները հիշում են, որ շենքն ամենաշատը տուժել է 1990-ականների սկզբին քաղաքացիական պատերազմի ընթացքում: Պատմում են, որ թատրոնի շենքում են տեղակայվել ռազմական ստորաբաժանումները, որոնք մանրահատակը քանդել են աթոռների և այլ կահույքի հետ միասին վառել են: Այդ դժվարին տարիներին շենքին տանկ է բախվել, և այդ հետքը մնում է մինչև օրս:

Նախորդ դարի 1930-ականներին կառուցված շենքում շատ բացառիկ ցուցանմուշներ կան, օրինակ, բեմի լուսավորության հատուկ սարքավորումներ, որոնք հավաքվել են Լավրենտի Բերիայի տարիներին` նրա հրամանով:

Անցած ձմռանը Զուգդիդիի դրամատիկական թատրոնի բեմում բեմադրվել է «Սառցե թագուհին»:

 Զուգդիդիի դրամատիկական թատրոնում 41 աշխատակից կա, որոնցից 15-ը դերասաններ են: Արդեն որերորդ տարին է, թատերական կոլեկտիվը կարծես դատավճռի է սպասում՝ կապրի թատրոնը, թե՝ ոչ:

 Թատրոնում փորձաքննության արդյունքներին են սպասում: Լևան Սամխարաուլիի անվան դատական փսրձաքննության ազգային բյուրոյում Վրաստանի մշակույթի և հուշարձանների պահպանման նախարարության ֆինանսավորմամբ արդեն թատրոնի շենքի վիճակի գնահատման փորձաքննություն է անցկացվել: Դրա արդյունքը հայտնի կլինի մոտ ապագայում:

Փորձաքննությունը պետք է թատրոնի շենքի ամրապնդման համար անհրաժեշտ աշխատանքների ցանկը պարզի:

Միաժամանակ, թատերախումբը պատրաստվում է Դավիթ Կլդիաշվիլիի պիեսի հիման վրա բեմադրված ներկայացման պրեմիերային: Թատրոնի ղեկավարության որոշմամբ, ներկայացումն այլ դահլիճում է անցկացվելու, որն ավելի ուշ կառուցվել է հիմնական շենքին կից փոքր բեմի վերանորոգման նպատակով: Սակայն վերանորոգում այդպես էլ չի կատարվել:

«Մենք շատ քիչ ժամանակ ունենք: Թատրոնի շենքը մեր աչքի առաջ քանդվում է», — ասում է թատրոնի գեղարվեստական ղեկավար Բադրի Ցերեդիանին: Նա խնդրում է Վրաստանի մշակույթի և հուշարձանների պահպանման նախարարությանը ժամանակին արձագանքել ստեղծված իրավիճակին: