Թուրք-ադրբեջանական համատեղ զորավարժություններ Հայաստանի սահմանին․ ի՞նչ կարող է սա նշանակել
Մի խումբ ադրբեջանցի զինծառայողներ Թուրքիայի Կարս նահանգ են ժամանել թուրքական բանակի հետ համատեղ զորավարժությունների անցկացման համար։ Դա վերջին ժամանակների խոշորագույն զորավարժությունն է լինելու ոչ միայն Ադրբեջանի, այլև Թուրքիայի զինված ուժերի համար։ Կարս նահանգը սահմանակից է Հայաստանին։
Փետրվարի 1-12-ը երկու երկրների համատեղ ձմեռային զորավարժություններին կմասնակցեն տանկային ստորաբաժանումներ, հրանոթային մարտկոցներ, դիպուկահարներ, հատուկ նշանակության զորքերի հրամանատարությունն ու ռազմական ուղղաթիռներ։
- Հոգեբանական վնասվածքներ՝ արցախյան երկրորդ պատերազմից հետո
- Ռուսաստանը մտադիր է ռազմաբազա ստեղծել Ադրբեջանում․ մեկնաբանություն Բաքվից
Կարսում ձմեռային զորավարժությունները պլանային են և նպատակ ունեն պատրաստել բանակները եղանակային բարդ պայմաններում մարտական գործողություններ վարելուն, ասել է Ադրբեջանի նախկին արտգործնախարար Թոֆիկ Զուլֆուգարովը։
«Կարս նահանգում այժմ ձյուն է, այնտեղ լեռներ են և Ադրբեջանի ու Թուրքիայի զինծառայողների համար ոչ այնքան սովորական եղանակային պայմաններ։ Հնարավոր է, դրանով էլ պայմանավորված է հերթական համատեղ զորավարժությունների համար տեղանքի ընտրությունը», —JAMnews-ին տված հարցազրույցում ասել է նա։
Մեկնաբանելով հայ հասարակությունում անհագստությունը Հայաստանի սահմանների անմիջական հարևանությամբ զորավարժությունների մեկնարկի մասին՝ Զուլֆուգարովը հավելել է․
«Ղարաբաղյան երկրորդ պատերազմի արդյունքում ստորագրված համաձայնագրից հետո [2020 թ․ նոյեմբերի 10-ի համաձայնագիրը, որը ստորագրել են Հայաստանի, Ռուսաստանի և Ադրբեջանի առաջնորդները — JAMnews] հայկական սահմանի մերձակայքում ադրբեջանական բանակի ցանկացած շարժ խուճապ է առաջացնում հարևան երկրի հասարակությունում։ Դա նրանց հոգսն է, որը մեզ չպետք է հուզի»։
Ադրբեջանցի զինծառայողներն արդեն Կարս են ժամանել, հաղորդել են Թուրքիայի ազգային անվտանգության նախարարությունում։
Որպես ձմեռային զորավարժությունների հիմնական նպատակ է նշվել երկու երկրների բանակների գործողությունների համակարգումը մարտականին մոտ պայմաններում։ Կարսում նույնպես նորագույն զինատեսակներ են օգտագործվելու, որոնք վերջերս են ներառվել Թուրքիայի և Ադրբեջանի բանակների զինանոցում, ասված է թուրքական ՊՆ-ի պաշտոնական հաղորդագրությունում։
Թուրքիայի և Ադրբեջանի բանակների համատեղ զորավարժություններ պարբերաբար անցկացվում են։ Վերջինը եղել է 2020 թ․ հուլիս-օգոստոսին, Ադրբեջանի տարածքում։
