Զիմբաբվե. երկարակյաց բռնապետին վերջնագիր է ներկայացվել
Նոյեմբերի 15-ին Զիմբաբվեի մայրաքաղաք Հարարեում պայթյուններ և կրակոցներ են լսվել
Զիմբաբվեի զինվորականները գրավել են պետական հեռուստաընկերությունը: Գեներալ-մայոր Մոյոն եթեր է մտել հայտարարությամբ, թե բանակը դեմ է դուրս եկել երկրի նախագահ Ռոբերտ Մուգաբեի շրջապատի «հանցագործներին»: Մոյոն հաղորդել է նաև, որ նախագահն ու նրա ընտանիքն անվտանգության մեջ են, և նրանց ոչինչ չի սպառնում:
Զինվորականները պնդում են, որ տեղի ունեցածը պետք չէ որպես պետական հեղաշրջում գնահատել:
Ռոբերտ Մուգաբեն Զիմբաբվեում իշխանությունը գլխավորում է արդեն 37 տարի: Մի քանի օր առաջ նա աշխատանքից ազատել է երկրի փոխնախագահ Էմերսոն Մնանգագվաին: Վերջինս պետք է 93-ամյա Մուգաբեի հետնորդը դառնար: Այժմ այդ դերին հավակնում է գործող նախագահի կինը: Այդ իրավիճակը խթան է դարձել իշխանության հետ զինվորականների կոնֆլիկտի համար:
Նոյեմբերի 13-ին բանակի հրամանատար գեներալ Կոնստանտինո Չիվենգան հայտարարել է, որ թույլ չի տա իշխանությունում իր համախոհներին այսպես աշխատանքից ազատել՝ հավելելով, որ բանակը կարող է միջամտել Զիմբաբվեի ներքին քաղաքականությանը:
