2024 թ․-ի նոյեմբերի 28-ից ի վեր Վրաստանում բողոքի ակցիաներ լուսաբանելիս տուժել է 181 լրագրող․ զեկույց
Զեկույց Վրաստանում ԶԼՄ-ների ճնշումների մասին
Մեդիայի, ինֆորմացիայի և սոցիալական հետազոտությունների կենտրոնի (CMIS) ուսումնասիրության համաձայն՝ 2024 թվականի նոյեմբերի 28-ից ի վեր Վրաստանում բողոքի ակցիաներ լուսաբանելիս տուժել է լրատվամիջոցների 181 աշխատակից։
Վերջին տարվա ընթացքում CMIS-ն արձանագրել է 434 միջադեպ, որոնք կապված են եղել լրագրողների, պարբերականների և մեդիայի ազատությունը պաշտպանող կազմակերպությունների իրավունքների խախտման հետ։
Արձանագրվել են հետևյալ խախտումները՝
- քաղաքական շարժառիթներով հետապնդում- 1 դեպք,
- ֆիզիկական բռնություն և մարմնական վնասվածքների պատճառում- 122 դեպք,
- անօրինական միջամտություն լրագրողական գործունեությանը- 104 դեպք,
- իրավունքների խախտման հետ կապված միջադեպեր-102 դեպք,
- բանավոր վիրավորանքներ, սպառնալիքներ և վարկաբեկում- 108 դեպք,
- սեփականության նկատմամբ ոտնձգություններ- 29 դեպք,
- աշխատանքային իրավունքների խախտումներ (2025 թ․-ի հունվարից մինչ օրս)- 22 դեպք (բոլորը կապված են Հանրային հեռարձակողի հետ),
- երկիր մուտք գործելու անհիմն մերժումներ (օտարերկրյա լրագրողներին)- 9 դեպք։
2024 թվականի հոկտեմբերի 26-ին՝ խորհրդարանական ընտրությունների օրը, CMIS-ն արձանագրել է լրագրողների իրավունքների խախտման 70 դեպք։
Զեկույց Վրաստանում ԶԼՄ-ների ճնշումների մասին
«Վրաստանում մեդիամիջավայրը կրիտիկական վիճակում է։ Վերջին տարվա ընթացքում անկախ լրագրողներն ու պարբերականները ենթարկվել են այնպիսի իրավախախտումների, ինչպիսիք են ֆիզիկական բռնությունը, անօրինական բերման ենթարկումը/ձերբակալումը, հարցաքննությունները, նկարահանման արգելքը, վարչական շենքեր մուտքի արգելքը, անօրինական տուգանքները, բանավոր վիրավորանքները, սպառնալիքները և այլն։
Այսքան մասշտաբային խնդրի պայմաններում լրագրողների վրա հարձակում գործած ոչ մի անձ, այդ թվում՝ հրապարակայնորեն նույնականացված անձինք, պատասխանատվության չի ենթարկվել։
Այս տարվա օգոստոսի 6-ին Batumelebi և Netgazeti պարբերականների հիմնադիր Մզիա Ամաղլոբելին դատապարտվել է երկու տարվա ազատազրկման։ Տեղական և միջազգային կազմակերպությունները կարծում են, որ Ամաղլոբելին դատապարտվել է քաղաքական շարժառիթներով, պահանջում են անհապաղ ազատ արձակել նրան։
Միաժամանակ անկախ պարբերականներն ու մեդիայի իրավունքները պաշտպանող քաղհասարակության ներկայացուցիչները թիրախ են դարձել բռնաճնշող օրենսդրության համար։
«Վրացական երազանք» կուսակցության խորհրդարանն ընդունել է մի շարք օրենքներ կամ գործող օրենսդրության փոփոխություններ, որոնք գոյաբանական սպառնալիք են անկախ ԶԼՄ-ների և քաղաքացիական հասարակության համար»,- ասված է CMIS-ի հրապարակած փաստաթղթում։
Հետևեք մեզ — Facebook | Youtube
Զեկույց Վրաստանում ԶԼՄ-ների ճնշումների մասին
