Երևանում Սերժ Սարգսյանի վարչապետության դեմ պայքարող 122 քաղաքացի բերման է ենթարկվել, ծեծել են լրագրողին
19:55, ապրիլի 19
Չնայած անձրևային եղանակին՝ Երևանի գլխավոր հրապարակում տեղի ունեցող հանրահավաքը նույնքան մարդաշատ էր, որքան նախորդ օրերին: Պայքարի շարժիչ ուժը երիտասարդությունն է: Շարժման համակարգողների խոսքով՝ իրենց են միանում Հայաստանի մարզերում բնակվող քաղաքացիներ:
Շարժման առաջնորդ, պատգամավոր Նիկոլ Փաշինյանն իր ելույթում դիմեց բեռնատարների վարորդներին՝ հորդորելով նրանց միանալ առավոտից անցկացվելիք անհնազանդության ակցիաներին և իրենց հետ միասին փակել կենտրոնական փողոցները:
13:00, ապրիլի 19
Սերժ Սարգսյանի վարչապետության դեմ պայքարը շարունակվում է: Մարդիկ պատգամավոր Նիկոլ Փաշինյանի գլխավորությամբ փակում են կառավարական և ոչ կառավարական տարբեր շենքերի մուտքեր: Վաղ առավոտից նրանց կողմից իրականացվող քայլերի արդյունքում արդեն բախումներ են տեղի ունեցել ոստիկանության հետ:
Նախ ցուցարարները փորձել են շղթայել Հանրապետության հրապարակում գտնվող կառավարության շենքը, որտեղ այսօր տեղի կունենա Սերժ Սարգսյանի գլխավորած կառավարության առաջին նիստը: Շենքը շղթայելով ցուցարարները, ինչպես մեկնաբանել էր Նիկոլ Փաշինյանը, կփորձեն խափանել նիստը: Այնինչ, ոստիկանությունը մահակներով ու վահաններով զինված պատ էր կազմել շենքի առաջ: Ընդ որում, նիստի ժամը փոխվել է: Եվ ցուցարարները պատրաստվում են վերադառնալ այս գործողությանն ավելի ուշ՝ 17:00-ին:
Ցուցարարները շարժվել են դեպի կառավարական այլ մասնաշենք: Այստեղ արդեն ոստիկանությունը ֆիզիկական ուժ է գործադրել նրանց նկատմամբ, բերման է ենթարկվել մի քանի տասնյակ երիտասարդ՝ պաշտոնական տվյալներով, 122 հոգի:
«Ոստիկանությունը շարունակելու է օրենքով սահմանված կարգով բերման ենթարկել բոլոր այն անձանց, ովքեր թույլ են տալիս հասարակական կարգի դեմ ուղղված իրավախախտումներ», — հայտարարել է Ոստիկանության լրատվության և հասարակայնության հետ կապերի վարչության պետ Աշոտ Ահարոնյանը։
Շարման մասնակիցները նախապես չեն հայտարարում, թե ինչ շենք են ուզում շղթայել: Այս հանգամանքը ևս անհանգստացրել է ոստիկանությանը:
«Անակնկալ» ուղղություններով գործողություններ կատարելու վերաբերյալ հավաքի կազմակերպչի հայտարարությունները լուրջ վտանգ են պարունակում»,- հայտարարել են ուժային այս կառույցից:
Ծեծի է ենթարկվել «Իրազեկ քաղաքացի միավորում» ՀԿ աշխատակից, լրագրող Տիրայր Մուրադյանը: Նա ասել է, որ քաղաքացիական հագուստով անձինք հարձակվել են իր վրա ու ծեծել: Լրագրողին տեղափոխել են հիվանդանոց:
«Իրազեկ քաղաքացի միավորում» ՀԿ համակարգող Դանիել Իոաննիսյանը պատմել է, որ Տիրայր Մուրադյանը ծեծի պահին եղել է բեյջով, հետևաբար, պարզ էր, որ վերջինս լրագրող է: Նա ասել է, որ լրագրողը հետաքննում էր քաղաքացիական հագուստով ոստիկանների մասնակցությունը հավաքին:
«Տիրայրին ծեծող անձինք քրեական հետախուզության աշխատակիցներ են եղել, նրան հետևել են, այնպիսի տեղ են բռնացրել, որ քիչ մարդիկ լինեն և մոտ 2 րոպե ծեծել են բազմաթիվ համազգեստով ոստիկանների ներկայությամբ, որոնք չեն միջամտել»,- ասել է Դանիել Իոաննիսյանը:
Ոստիկանությունը կոչ է արել իրենց մասնագիտական աշխատանքը կատարող լրագրողներին հեռավորություն վրա մնալ ոստիկաններից ու ցուցարարներից:
Նիկոլ Փաշինյանն ու իր աջակիցները երթով շարունակում են շրջել մայրաքաղաքով և կոչ անել մարդկանց գործադուլ հայտարարել և միանալ շարժմանը:
Երթը շարունակվում է: Այսօր երթը առավել աղմկոտ է, քանի որ ցուցարարները երթևեկության մի հատվածը բաց են թողնում մեքենաների համար և կոչ անում վարորդներին ձայնային ազդանշաներ տալ՝ որպես աջակցության արտահայտում պայքարին:
