Հրադադար Արցախում․ երրորդ հումանիտար դադարը նո՞ւյնպես խախտված է
ԱՄՆ միջնորդությամբ Ադրբեջանն ու Հայաստանը պայմանավորվել են Արցախում մարտական գործողությունների գոտում ժամանակավոր հումանիտար հրադադար սահմանել հոկտեմբերի 26-ին տեղական ժամանակով առավոտյան ժամը 8-ից։ Սակայն հրադադարի առաջին րոպեներից դրա խախտման մասին հաղորադգրություններ են ստացվել։
Արցախի նախագահ Արայիկ Հարությունյանը ողջունել է ԱՄՆ-ում ձեռք բերված պայմանավորվածությունը հրադադարի մասին։ Դրա մեկնարկից րոպեներ առաջ հրադադարի ռեժիմի խիստ պահպանման մտադրության մասին ֆեյսբուքյան իր էջում հայտնել է նաև վարչապետ Նիկոլ Փաշինյանը։ Նման հայտարարություն էր արել և Ադրբեջանի պաշտպանության նախարարությունը։
ՄԱԿ գլխավոր քարտուղար Անտոնիո Գուտերեշը ողջունել է հրադադարի մասին պայմանավորվածությունը։
Սակայն, նշանակված ժամից գրեթե անմիջապես հետո ստացվել է Ադրբեջանի պաշտպանության նախարարության մամուլի ծառայության հաղորդագրությունը․
«Հոկտեմբերի 26-ին ժամը 08.05 Հայաստանի զինված ուժերը, խախտելով նոր հումանիտար հրադադարի ռեժիմը, Լաչին քաղաքի ուղղությամբ հրետակոծել են ադրբեջանական բանակի ստորաբաժանումները, որոնք տեղակայված են Լաչինի շրջանի Սաֆյան գյուղում»։
Մի քանի րոպե անց Ադրբեջանի պաշտպանական գերատեսչությունը հրադադարի խախտման մասին ևս մեկ հաղորդագրություն է տարածել․ «Հայաստանի զինված ուժերը, խախտելով նոր հումանիտար հրադադարի ռեժիմը, հոկտեմբերի 26-ին հրետակոծել են Տերտեր քաղաքն ու շրջանի գյուղերը»։ Այս նույն նորությունը Թվիթերում հաստատել է Ադրբեջանի նախագահի օգնական Հիքմեթ Հաջիևը։
Հայկական կողմը հերքել է Ադրբեջանի այս պնդումները․
«Պաշտպանության բանակի ստորաբաժանումները խստորեն հետևում են ձեռք բերված պայմանավորվածություններին, իսկ թշնամական կողմի մեղադրանքները ոչ միայն իրականության հետ որևէ առնչություն չունեն, այլև արվել են վերջինիս հետագա սադրանքների համար տեղեկատվական հող նախապատրաստելու համատեքստում», — ասված է Արցախի պաշտպանության նախարարության հաղորդագրությունում։
Դրանից անմիջապես հետո հաղորդագրություն է ստացվել Հայաստանի պաշտպանության նախարարության մամուլի քարտուղարից։ Շուշան Ստեփանյանը Ֆեյսբուքում գրել է․
«Կոպտորեն խախտելով ԱՄՆ-ում ձեռք բերված հումանիտար հրադադարի մասին պայմանավորվածությունը, ադրբեջանական կողմը ժամը 8:45-ի սահմաններում հրետանային կրակ է վարել Արցախի հյուսիսարևելյան մարտական դիրքերի ուղղությամբ»։
Մի քանի րոպե անց նա նման բովանդակությամբ երկրորդ հաղորդագրությունն է հրապարակել․
«Հերթական խախտումը գրանցվեց ժամը 09:10-ի սահմաններում. հակառակորդը թիրախավորել է հարավարևելյան ուղղությամբ դիրքերը՝ արձակելով հինգ հրետանային արկ»։
