Եվրախորհրդի պատգամավորները ցնցված են Չեչնիայում գեյերի դրության մասին տեղեկատվությամբ

Կայացել է Եվրախորհրդի Խորհրդարանական վերաժողովի նիստը: Բելգիացի պատգամավոր Փիթ դը Բրոյնը կարդացել է իր   «ԼԳԲՏ համայնքի ներկայացուցիչների հետապնդումները Չեչնիայում»    զեկույցը, հաղորդում է «Նովայա գազետան»:

Կես տարի շարունակ նա հանդիպել է այդ հետապնդումների զոհերին, այդ իրավիճակի հետաքննությանը մասնակցող լրագրողներին և այլ իրազեկ մարդկանց:

Դը Բրոյնի նպատակը ոչ թե Չեչնիայում ԼԳԲՏ համայնքի ներկայացուցիչների դեմ հանցագործությունների հանգամանքների հետաքննությունն էր, այլ սեռական փոքրամասնությունների ներկայացուցիչների հետապնդումների փաստերի արձանագրումը:

Հոմոֆոբիա. ոչ միայն Չեչնիայում, այլև ողջ Ռուսաստանում

Իր հետազոտության արդյունքում դը Բրոյնն այն եզրակացության է եկել, որ Չեչնիայում կատարվածի պատճառը համառուսական իրավիճակն է: Երկրում, որտեղ հոմոֆոբ տրամադրությունները դառնում են ավելի զանգվածային, սեռական փոքրամասնությունների հետապնդումները դառնում են ավելի հավանական, կարծում է բելգիացի պատգամավորը: 

 «2013թ-ից ի վեր, երբ ընդունվեց միասեռականության պրոպագանդայի արգելքի մասին դաշնային օրենքն, իշխանություններն ուղերձներ են հղում, թե ԼԳԲՏ ներկայացուցիչները երկրորդ տեսակի մարդիկ են, որոնք սպառնալիք են երեխաների և հասարակական բարոյականության համար… Օրենսդրությունը, ԶԼՄ հաղորդագրություններն ու քաղաքական հայտարարությունները հոմոֆոբիային նպաստող կլիմա են ստեղծում: ԼԳԲՏ համայնքի դեմ արշավը Չեչնիայի Հանրապետությունում տեղի ունեցավ 2017թ-ին և Ռուսաստանի հասարակական կարծիքում ուժեղ ընդդիմության չարժանացավ, ասված է դը Բրոյնի զեկույցում:

ԵԽԽՎ արձագանքը

Զեկույցի ընթերցումից հետո տեղի ունեցած քննարկումներից պարզ դարձավ, որ այն ուժեղ ազդեցություն է ունեցել ԵԽԽՎ բոլոր պատգամավորների վրա: Մեկ ժամ տևած քննարկումից հետո բանաձևն ընդունվեց միաձայն:

Բանաձևում պատգամավորներն արձանագրել են Չեչնիայում ԼԳԲՏ համայնքի ներկայացուցիչների հետապնդման փաստը: Նրանք քննադատել են նաև ռուսական իշխանություններին, որոնք փորձում են հերքել գեյերի և լեսբիների գոյությունը տարածաշրջանում: ԵԽԽՎ-ն պնդելու է, որ Ռուսաստանն անաչառ կերպով հետաքննի իրավիճակը, իսկ եթե դա տեղի չունենա, անկախ միջազգային հետաքննություն կնախաձեռնի:

Մեկ գիշերվա արդյունք. 27 սպանված միասեռական

2017թ-ին «Նովայա գազետան» մի քանի նյութ էր հրապարակել, որոնք պատմում էին Չեչնիայում ԼԳԲՏ համայնքի ներկայացուցիչների խոշտանգումների և սպանությունների մասին: Մեկ տարի առաջ պարբերականը հանրապետությունում միայն մեկ գիշերվա մեջ զոհված 27 անուններից բաղկացած ցուցակ էր ներկայացրել: Ըստ թերթի տվյալների՝ այդ մարդկանց գնդակահարել են ոչ ավանդական սեռական կողմնորոշման համար:

«Ըստ մեր ունեցած տեղեկատվության՝ այդ գիշեր ձերբակալվածներին գնդակահարել են և տարել տարբեր գերեզմանոցներ, այդ թվում՝ քրիստոնեական, և թաղել արագ փորված գերեզմաններում:

Ձերբակալվածների ցուցակի մանրազնին ուսումնասիրությունը ցույց է տալիս, որ արտադատարանային մահապատժի որոշումն ընդունվել է կենտրոնացված կերպով և, որքան էլ տարօրինակ հնչի, հանպատրաստից: Սակայն հենց այդպես էլ այսօրվա Չեչնիայում կայացվում են առանցքային որոշումներն», — ասված է լրագրողական հետաքննության մեջ:

«Նովայա գազետայի» հետաքննությունն ամբողջությամբ՝ այստեղ:

Ռուսական իշխանություններն ընդհանուր առմամբ, և չեչենական իշխանությունները մասնավորապես հերքում են միասեռականների կտտանքների և սպանությունների մասին տեղեկատվությունը: Ավելին, Չեչնիայի ղեկավար Ռամզան Կադիրովն ընդհանրապես կարծում է, որ տարածաշրջանում սեռական փոքրամասնությունների ներկայացուցիչներ գոյություն չունեն: