«Չենք ապրելու ռուսական օրենքներով, դիմադրելու ենք մինչև վերջ»․ Վրաստանի ՀԿ-ներ
«Դրամաշնորհների մասին» օրենքը Վրաստանում
Վրաստանի քաղաքացիական հասարակությունն ու ոչ կառավարական կազմակերպությունները արձագանքել են կառավարության կողմից նախաձեռնված «Դրամաշնորհների մասին» օրենքի փոփոխություններին։ ՀԿ-ները հայտարարել են, որ չեն պատրաստվում ապրել «ռուսական օրենքներով» և մտադիր են մինչև վերջ դիմադրել «վրաց ժողովրդի հետապնդմանը»։
Նրանց դիտարկմամբ՝ իշխող «Վրացական երազանք» կուսակցության այս նախաձեռնությունը երկրի քաղաքացիական հասարակությունն ու սոցիալական աջակցության համակարգը ոչնչացնելու ռազմավարության շարունակությունն է։
Իշխող «Վրացական երազանք» կուսակցությունը նախաձեռնել է օրինագիծ, որի համաձայն՝ արտասահմանյան դրամաշնորհ ստանալու համար կպահանջվի կառավարության համաձայնությունը։
Օրենքի պահպանումը վերահսկելու է Հակակոռուպցիոն բյուրոն։ Դրամաշնորհի ընդունումը «առանց թույլտվության» ենթադրելու է տուգանք տվյալ դրամաշնորհի գումարի կրկնակիի չափով։
«Այսօր, երբ պետական մարմինները դարձել են կուսակցական կցորդներ, մարդկանց պաշտպանության միակ միջոցը քաղաքացիական համերաշխությունն ու ակտիվիզմն են։ Ըստ իր էության և ակնկալվող արդյունքի՝ վերոնշյալ օրենքը ժողովրդի հետապնդման ակտ է։ Այն նպատակ ունի քաղաքացիներին թողնել իշխող կուսակցության պատժիչ համակարգի դիմաց և արգելել միջազգային հանրության կողմից նրանց աջակցության տրամադրումը։
«Վրացական երազանքի» այս նախաձեռնությունը Վրաստանի քաղաքացիական հասարակությանն ու ժողովրդին օգնելու համակարգի ոչնչացման ռազմավարության շարունակությունն է այն պայմաններում, երբ չնայած «ռուսական օրենքների» ընդունմանը, հետապնդումներին և քաղաքացիական համերաշխության միջոցների առգրավմանը՝ այդ նպատակին չեն հասել։
Մենք ընդգծում ենք, որ այս օրենքը նպատակ ունի Վրաստանը վերածելու փակ, մեկուսացված պետության, որտեղ հասարակական կյանքի բոլոր ոլորտները պետք է ենթարկվեն «Վրացական երազանք» կուսակցության տոտալիտար վերահսկողությանը, իսկ հասարակությունը պետք է զրկված լինի միջազգային գործընկերներից և ընկերներից անհրաժեշտ աջակցություն ստանալու հնարավորությունից։
Այս օրենքն ուղղված է նաև լրատվամիջոցների և քաղաքացիական հասարակության գործունեության դադարեցմանը՝ կազմակերպությունների, որոնք վրաց ժողովրդին տեղեկատվություն են տրամադրում պետական մարմինների կողմից իրենց իրավունքների խախտումների մասին»,- ասված է ՀԿ-ների համատեղ հայտարարության մեջ։
Հատուկ ճեպազրույցի ժամանակ նախկին օմբուդսմեն, «Վրաստանի եվրոպական ուղեծիր» ՀԿ-ի հիմնադիր Նինո Լոմջարիան ասել է, որ «ոչ լեգիտիմ խորհրդարանը» փորձում է անպաշտպան թողնել երեխաներին, կանանց, ուսանողներին, տարեցներին, անօրինական ձերբակալված, աշխատանքից ազատված կամ տուգանված մարդկանց, բռնության զոհերին, հաշմանդամություն ունեցող անձանց, լրագրողներին, մշակույթի, բիզնեսի և այլ ոլորտների ներկայացուցիչներին։
«Մենք թույլ չենք տա Իվանիշվիլիի ոչ լեգիտիմ կառավարությանը որոշել, թե երբ և ինչպես են վրացիներն օգնելու միմյանց, և ևս մեկ անգամ կարտահայտենք մեր հավատարմությունը Վրաստանի Սահմանադրությանը, քաղաքացիների իրավունքներին և արժանապատվության պաշտպանությանը»,- հայտարարել են ՀԿ-ները։
