Դեկտեմբերի 1-ից չպատվաստված անձինք գործատուին ՊՇՌ թեստի պատասխան պետք է ներկայացնեն, ոչ թե 14, այլ 7 օրը մեկ պարբերականությամբ։ Լրագրողների հետ ճեպազրույցում այս մասին հայտնել է Հայաստանի առողջապահության նախարարը։
«Դեկտեմբերի 1-ից նոր սահմանափակում կգործի։ Իմ հրամանի փոփոխության նախագիծն այսօր արդեն իսկ շրջանառության մեջ կդրվի, և այսուհետ ՊՇՌ թեստի պատասխան գործատուին անհրաժեշտ կլինի ներկայացնել 7 օրը մեկ պարբերականությամբ»,- հայտարարել է նախարար Անահիտ Ավանեսյանը։
Հոկտեմբերի 1-ից աշխատողները գործատուին են ներկայացնում կա՛մ պատվաստման սերտիֆիկատ, կա՛մ ՊՇՌ թեստի բացասական արդյունք՝ յուրաքանչյուր 14 օրը մեկ։
Համաճարակային լարված իրավիճակով պայմանավորված՝ առողջապահական գերատեսչությունը որոշել է փոխել այս ժամկետն ու փոփոխության ենթակել նախարարի՝ օգոստոսի 20-ի հրամանը։
Վերջին 1 օրում Հայաստանում գրանցվել է մահվան 41 դեպք։ Համավարակի մեկնարկից մինչ օրս հիվանդությունից մահացել է 6 532 քաղաքացի։
Կառավարության՝ նոյեմբերի 4-ի նիստում վարչապետ Նիկոլ Փաշինյանը հայտարարել է, որ գործադիրը լոքդաունների գնալ չի պատրաստվում։
«Մենք պետք է դիմակների պարտադիր կրումը պահենք և պետք է պատվաստումներն անենք մեծ ծավալներով»,-նշել է Փաշինյանն ու ևս մեկ անգամ ընդգծել, որ այսօր համավարակի դեմ պայքարի միակ միջոցը պատվաստումն է։
Դիմակների պարտադիր կրման մասով փոփոխությունն արվել էր բոլորովին վերջերս։ Նոյեմբերի 1-ից քաղաքացիները պարտավոր են դիմակ կրել ինչպես փակ, այնպես էլ բաց տարածքներում։
Ավելի վաղ Առողջապահության նախարարության առաջարկով փոփոխություն էր մտցվել նաև կրթական գործընթացում՝ դպրոցական արձակուրդները երկարաձգվել էին, բուհերը՝ անցել հեռավար ուսուցման։
ԿԳՄՍ նախարարության հաղորդմամբ՝ նոյեմբերի 8-ից դպրոցներում, նոյեմբերի 15-ից էլ բուհերում կվերականգնվի առկա ուսուցումը։ Գերատեսչությունը արձակուրդները երկարացնելու կամ հեռավար ուսուցման անցնելու անհրաժեշտություն չի տեսնում։
