Գարեջուր՝ խողովակաշարով Գերմանիայում անցկացվող ռոք-փառատոնին
Գերմանիայի հյուսիսում անցկացվող Wacken Open Air միջազգային ռոք-փառատոնի կազմակերպիչները սեփական գարեջրային խողովակաշար են կառուցում, որը կգործարկվի բացման օրը՝ օգոստոսի 3-ին:
Յուրաքանչյուր տարի այս փառատոնի այցելուները մոտ 400 հազար լիտր գարեջուր են խմում: Այս երաժշտական տոնին Վակեն փոքր ավան մինչև 75 հազար զբոսաշրջիկ է գալիս աշխարհի տարբեր երկրներից այն դեպքում, երբ ավանում մշտապես ապրում է 2000-ից պակաս մարդ:
Խողովակաշարը երկու հիմնական նշանակություն ունի: Գլխավորը փառատոնի համար գարեջուր բերող բեռնատարներից գետինը մաշվելուց պաշտպանելն է: Այն նաև փառատոնի աշխատակիցներին կազատի անընդհատ տակառներ քարշ տալուց դատարկները լիքը տակառներով փոխարինելիս:
Միաժամանակ կոյուղին նորացնելու աշխատանքներ են տարվում, կառուցվում է նաև խմելու ջրի մատակարարման հատուկ համակարգ:
Այդ նորարարություններում ներդրումների ընդհանուր ծավալը կազմում է մոտ մեկ միլիոն եվրո:
