Գալի շրջանի Խիդա գյուղում ամուսիններ են սպանվել

Գալի շրջանի Հիդա գյուղում սպանվել են ամուսիններ Գիա և Սոֆո Ցուրցումիաները: Նրանց սպանել են սեփական տանը ավտոմատ զենքից:

Ենթադրյալ հանցագործի ինքնությունը հայտնի է. ըստ սպանվածների մտերիմների՝ նա ևս տեղացի է: Գիա Ցուրցումիան մահից անմիջապես առաջ արտասանել է նրա անունը: Հանցագործության դրդապատճառները անհայտ են: Ըստ վարկածներից մեկի՝ մարդասպանը կարող էր փող շորթելիս լինել:

Ինչպես JAMnews-ի հետ զրույցում նշեց տեղացիներից մեկը, զույգը բազրոբա էր (շուկա) գնացել Գալի շրջանում, և այնտեղ իբր գումարի հետ կապված ինչ-որ վեճ էր տեղի ունեցել: Սակայն արդյոք դա կապվա՞ծ է հանցագործության հետ՝ դեռ պարզ չէ:

«Ոչ ոք հաստատ չգիտի, թե ինչն է պատճառը: Մարդիկ տարբեր բաներ են ասում: Ես չգիտեմ՝ դա կողոպուտ է եղել, թե սպանություն վեճի արդյունքում: Կողոպուտը մեր շրջանում սովորական բան է, հատկապես երբ պնդուկի բերքահավաքի ժամանակն է, և մարդկանց մոտ ինչ-որ գումար է լինում վաճառքից: Այդ գիշեր լավ է չքնել: Չորս տարի առաջ մենք վաճառեցինք մեր մեքենան, և նույն գիշերը մեզ կողոպտեցին: Հանցագործները անգամ գիտեին վաճառքից ստացված գումարի ճիշտ չափը: Իսկ ոստիկանությունը ոչինչ չի անում: Ասում են, որ հանցագործները և ոստիկանությունը կապված են միմյանց հետ», — հայտարարեց Գալիի բնակիչներից մեկը՝ անվտանգության նկատառումներով անունը չնշելու պայմանով:

Հանցագործության վայրը ուսումնասիրել է այսպես կոչված աբխազական միլիցիան: Ըստ պաշտոնական տեղեկությունների՝ հանցագործի որոնման գործընթացը արդեն սկսվել է: Սպանված ամուսինների մարմինները տեղափոխվել են Գալի քաղաքի դիահերձարան:

Վերջին 5 տարիների ընթացքում Գալի շրջանում կողոպուտների թիվը զգալիորեն աճել է:

Ստորև ներկայացնում ենք մամուլում հրապարակված փաստերի ոչ ամբողջական ցանկը.

[yes_list]

• 2013 թվական, սեպտեմբեր. Գալի շրջանի Գագիդա գյուղում ավտոմատներով զինված 5 դիմակավորված անձ ներխուժել է Պիպիաների ընտանիքի տուն: Կողոպտիչները մի քանի անգամ կրակել են ընտանիքի՝ Պիպիայի տանը հյուրընկալվող փեսայի՝ Վիտալի Ռոդոնայայի վրա, ով արդյունքում մահացել է:

• 2014 թվական, դեկտեմբեր. Գալի շրջանի Մուխուրի գյուղում զինված հարձակում է իրականացվել  Բուլուսկիրիաների ընտանիքի վրա. սպանվել է ընտանիքի հայրը՝ 55-ամյա Թամազ Բուլիսկիրիան:

• 2014 թվական, դեկտեմբեր. Օթոբայա գյուղում դիմակավորված անձինք հարձակում են իրականացրել Ուչավաների ընտանիքի վրա: Երբ 75-ամյա Նապոլեոն Ուչավան դիմադրություն է ցույց տվել և հավանաբար պոկել է կողոպտիչներից մեկի դիմակը, նրան սպանել են գլխին կրակոցով:
• 2015 թվական, հոկտեմբեր. Զինված հարձակում է տեղի ունեցել Գալի շրջանի Ռեփի գյուղում՝ Ցաթավա եղբայրների ընտանիքի վրա: Դեպքից որոշ ժամանակ առաջ եղբայրները վաճառել էին պնդուկի բերքը: Կողոպտիչները սպանել են եղբայրներից մեկին և յուրացրել 80 հազար ռուբլի:
• 2016 թվական, սեպտեմբեր. Գալի շրջանի Չուբուրխինջի գյուղում 82-ամյա կնոջից կես տոննա պնդուկ են գողացել:

[/yes_list]