«Վրաստանում երկրորդ ճակատ բացելու մասին լուրերն ապատեղեկատվություն են». Բորել
Բորելը Ղարիբաշվիլիի հետ հանդիպմանը
Վրաստանի վարչապետ Իրակլի Ղարիբաշվիլիի հետ համատեղ մամուլի ասուլիսում ԵՄ արտաքին գործերի և անվտանգության քաղաքականության հարցերով բարձր ներկայացուցիչ Ժոզեպ Բորելը հայտարարել է, որ Վրաստանում, այսպես կոչված, «երկրորդ ճակատի» բացման մասին խոսակցությունները ապատեղեկատվություն են, որոնք նպատակ ունեն մեծացնել հասարակության մեջ առկա անվստահությունը։
ԵՄ դիվանագիտական առաքելության ղեկավարը նաև ցավակցություն է հայտնել Գուրիայում բնական աղետի հետևանքով երեխայի մահվան կապակցությամբ։
«Ուզում եմ հայտնել իմ սրտի ցավը՝ Գուրիայում սողանքի հետևանքով երեխա է մահացել, և դա շատ ցավալի է, ինձ անհանգստացնում է այն փաստը, որ դեռ փնտրում են մարդկանց, հուսով եմ՝ բոլորին անվնաս կգտնենք»,- ասել է Բորելը։
Արտակարգ իրավիճակների կառավարման ծառայության տվյալներով՝ Աջարիայում և Գուրիայում հորդառատ անձրևների հետևանքով հեղեղվել են բնակելի շենքեր, կոտրվել են ծառեր, փլուզվել են հողային զանգվածներ, Գուրիայի մի քանի գյուղեր կտրվել են արտաքին աշխարհից։ Այս պահին Գուրիայի Ջումաթի գյուղում մեկ անչափահասի դի է հայտնաբերվել։ Եվս երկու մարդ անհետ կորած է։
Վարչապետն իր հերթին մամուլի ասուլիսում ասել է, որ անարդար է համարում ԵՄ-ի թեկնածուի կարգավիճակ տրամադրելու հարցում Վրաստանին մերժելը։
«Մենք կարծում ենք, որ դա անարդար է, քանի որ Վրաստանը շատ բան է արել, հատկապես վերջին տասը տարիների ընթացքում»,- ասել է վարչապետը։
Ասուլիսի ավարտին Ժոզեպ Բորելն արձագանքել է.
«Պարոն վարչապետ, բոլոր երկրները տարբեր են, յուրաքանչյուր երկրում տարբեր քաղաքական և սոցիալ-տնտեսական իրավիճակ է։ Ուզում եմ ձեզ և բոլոր վրացիներին հավաստիացնել, որ Վրաստանի ջանքերը ԵՄ հանձնարարականների իրականացման ուղղությամբ ըստ արժանվույն կգնահատվեն, և եվրոպական կառույցները օբյեկտիվորեն կգնահատեն պատրաստված բոլոր վերլուծական զեկույցները»:
Ղարիբաշվիլիի խոսքով՝ մեկ-երկու շաբաթից Վրաստանը կստանա ապաօլիգարխացման գործողությունների ծրագիրը։ Վարչապետը նաև հույս է հայտնել, որ Եվրահանձնաժողովը կգնահատի Վրաստանի կառավարության հավատարմությունը։
Ինչ վերաբերում է նախագահի իմպիչմենտին, Ղարիբաշվիլին պարզաբանել է, որ դա իրավական, ոչ թե քաղաքական խնդիր է։
- «Նախագահը խախտում է Սահմանադրությունը». Զուրաբիշվիլիին իմպիչմենտ է սպառնում
- «Վրաստանն ամբողջությամբ կատարել է 12 հանձնարարականներից 3-ը»․Եվրահանձնաժողովի միջանկյալ զեկույց
- Փաշինյանի տիկնոջ այցն Ուկրաինա․ ո՞ւմ հետ հանդիպեց և ի՞նչ ասաց
Գլխավորը, որ ասել է Ժոզեպ Բորելը ասուլիսի ընթացքում
Այսպես կոչված «երկրորդ ճակատի» մասին
«Սա աղմուկ է, քարոզչություն և ապատեղեկատվություն։ Խելագարություն կլիներ, եթե Եվրամիությունում մտածեին, որ որևէ մեկն ուզում է պատերազմ Վրաստանում: Շատ եմ ցավում, որ նման կեղծ լուրեր են տարածվում։ Սա արվում է ժողովրդի կյանքը թունավորելու, երկրում անվստահություն ձևավորելու նպատակով։ Ռուսական քարոզչությունը շատ համառ է, և այն առանձնապես աչքի է ընկնում այս ուղղությամբ»։
Նախագահի իմպիչմենտի մասին
«Թույլ տվեք ավելացնել մի բան նախագահի իմպիչմենտի հարցի հետ կապված. դա ռիսկ է, որը էլ ավելի կսրի ստեղծված իրավիճակն ու կմեծացնի բևեռացումը, բոլոր ինստիտուտները պետք է միասին աշխատեն և վճռականորեն աջակցեն երկրին իր եվրոպական ճանապարհին: Վրաստանն ունի այդ գործընթացում հաջողակ դառնալու ներուժ»։
- Վրաստանը ՆԱՏՕ-ի անդամ կդառնա անդամության ծրագրի կատարման պարագայում
- «Վրաստանը չպետք է ԵՄ անդամակցության թեկնածուի կարգավիճակ մուրա»․ խորհրդարանի նախագահ
«Թբիլիսիում շատ են ծածանվում ԵՄ դրոշները, նույնիսկ ավելի շատ, քան Բրյուսելում»
«Ես տեսել եմ ԵՄ բազմաթիվ դրոշներ Թբիլիսիում և գիտեմ, որ Վրաստանի քաղաքացիների 80 տոկոսն աջակցում է երկրի անդամակցությանը ԵՄ-ին։ Սա տպավորիչ ցուցանիշ է։ Բայց սա պարզապես թիվ չէ, ես շատ ուրախ եմ տեսնել բազմաթիվ եվրոպական դրոշներ, պետք է ասեմ, որ դրանք նույնիսկ ավելի շատ են, քան Բրյուսելում»:
Ռուսաստանի հետ օդային հաղորդակցության վերականգնման մասին
«Կարևոր է, որ մեր ամենամոտ գործընկերները միջազգային մակարդակում համագործակցաբար աշխատեն Ռուսաստանին մեկուսացնելու համար, և մենք ողջունում ենք սերտ համագործակցությունը՝ ուղղված երկրում պատժամիջոցներից խուսափելու դեմ պայքարին: Կարևոր է, որ սա հստակ ձևակերպվի։
Պետք է նաև ասենք, որ շատ ենք ցավում, որ Վրաստանի և Ռուսաստանի միջև օդային հաղորդակցությունը վերականգնվել է։ Սա Վրաստանի արտաքին քաղաքականության հետ կապված ուղերձ է։ Ասոցացման համաձայնագրի շրջանակներում Վրաստանը որոշակի պարտավորություններ է ստանձնել և պետք է անդամակցի Եվրամիությանը։ Այս փուլում, անշուշտ, բարելավման ենթակա շատ ոլորտներ կան: Պետք է դադարեցնենք Ռուսաստանի հիբրիդային գործունեությունը»։
«Կա աշխատանք, որը պետք է անել, արեք դա»
«Ամեն ջանք ու եռանդ գործադրեք այդ պարտավորությունները կատարելու համար, սա լավ և ճիշտ մոտեցում է: Եվրամիությունը չի լքի Վրաստանը, չի հրաժարվի նրանից։ Մենք ունենք տնտեսական և ներդրումային ծրագիր, որը նախատեսում է 1,3 միլիարդ եվրո, որը կօգտագործվի Վրաստանի մրցունակության բարձրացման համար։ Մենք ծրագրեր ունենք Վրաստանի հետ, բոլորս էլ հասկանում ենք Վրաստանի հետ կապված շահերը […]։
Մենք ուզում ենք, որ դուք դառնաք Եվրամիության անդամ, դրա համար էլ եկել եմ ձեզ հետ խոսելու։ Կա աշխատանք, որը պետք է անել, արեք դա և մի մտածեք այդ աշխատանքը դադարեցնելու մասին»։
«Երբեք մի ասեք, որ Եվրամիությունը կլքի Վրաստանը»
«Երբեք մի ասեք, որ Եվրամիությունը կլքի Վրաստանը, երբեք: Այդ դիրքորոշումն ինձ համար անընդունելի է, Եվրամիությունը չի լքել և չի լքի Վրաստանը։ Միևնույն ժամանակ, պետք է ասեմ, որ այս գործընթացը հիմնված է արժանիքների վրա, դուք պետք է կատարեք որոշակի պայմաններ, դա ձեզնից է կախված։ Երբ ուսանողը քննություն է հանձնում, նա պրոֆեսորին չի մեղադրում, չէ՞։ Նա պետք է ցույց տա, որ տիրապետում է առարկային։
Ուստի, ձեր ողջ ուժերն ու եռանդը ներդրեք այդ պարտավորությունները կատարելու համար, դա լավ և ճիշտ մոտեցում է, Եվրամիությունը չի հեռանում Վրաստանից»։
Բորելը Ղարիբաշվիլիի հետ հանդիպմանը
- «Ոչ մի տեղ չեմ գնալու, դադարեք երազել իմ հրաժարականի մասին»․ Վրաստանի նախագահ
- Վրաստանի կառավարությունը երկրի նախագահին թույլ չի տալիս մեկնել Բրյուսել
Սեպտեմբերի 7-8-ը պաշտոնական այցով Վրաստանում էր Եվրամիության արտաքին գործերի և անվտանգության քաղաքականության հարցերով բարձր ներկայացուցիչ Ժոզեպ Բորելը։
Բացի Վրաստանի նախագահի և վարչապետի հետ հանդիպումից, ԵՄ բարձրաստիճան պաշտոնյան օգտվել է առիթից և շփվել խորհրդարանի բոլոր քաղաքական կուսակցությունների ներկայացուցիչների հետ, քննարկումներ անցկացրել քաղհասարակության ներկայացուցիչների հետ:
Ըստ Եվրոպայի արտաքին գործողությունների ծառայության՝ իր ներկայիս կարգավիճակով Բորելի առաջին պաշտոնական այցը երկիր թույլ կտա քննարկել Վրաստանի տեղաշարժը եվրաինտեգրման ուղղությամբ, ինչպես նաև կարծիքներ փոխանակել ավելի լայն՝ արտաքին քաղաքականության և տարածաշրջանային հարցերի շուրջ:
Վրաստան այցից առաջ ԵՄ բարձր ներկայացուցիչը Վրաստան-ԵՄ հարաբերությունների մասին պատմել էր Civil.ge-ին տված հարցազրույցում:
Բորելն անդրադարձել էր այնպիսի հարցերի, ինչպիսիք են մինչև տարեվերջ Վրաստանի՝ ԵՄ թեկնածու երկրի կարգավիճակ ստանալու հեռանկարը, Վրաստանի նախագահի իմպիչմենտի գործընթացը, ինչպես նաև Վրաստանի և Եվրոպայի արտաքին քաղաքականության համատեղելիությունը։
Բորելը Ղարիբաշվիլիի հետ հանդիպմանը
