Բողոքի ակցիա Վրաստանում. այստեղ կրկին կովեր են գողացել Թուրքիային սահմանակից գյուղերից
Մայիսի 28-ի առավոտյան փակ է Վրաստանից Թուրքիա տանող ճանապարհը լեռնային Սամցխե-Ջավախեթի շրջանի Սուլդա գյուղի մոտ: Մոտ 70 տեղացի գործադուլ է անում այն բանից հետո, երբ նախօրեի գիշերը 63 կով են գողացել իրենցից:
Բնակիչները պատմում են, որ գիշերը, երբ հովիվները քնած են եղել, նրանց վրա 4 մարդ է հարձակվել: Ինքնաշեն ձեռնաշղթաներով կապել են 8 հովվի ձեռքերն ու գողացել հոտը: Ինչպես պատմում է հովիվներից մեկը, անասուններին գողացողները թուրքերեն էին խոսում:
Ախալքալաքի շրջանի սահմանակից գյուղերը բնակեցված են հիմնականում հայերով: Տեղացիներն ասում են, որ այստեղ հաճախ են անասուն գողանում, և, ըստ նրանց, դա անում են Թուրքիայի կողմից անցած մարդիկ:
Ցուցարարների գլխավոր պահանջը Թուրքիայի հետ սահմանին անվտանգության ուժեղացումն է:
Բնակիչները պատմում են, որ հաճախ կովերին գողանում են գյուղացիների բակերից գիշերը գաղտնի կերպով:
Ցուցարարների հետ հանդիպելու էին եկել տեղի ադմինիստրացիայի ներկայացուցիչները, Ախալքալաքի քաղաքապետն ու խորհրդարանի պատգամավոր Հենզել Մկոյանը: Նրանք խոստացել են հստակեցնել իրավիճակը:
Տեղի բնակչության հետ միասին ակցիայի էին դուրս եկել նաև մեկ այլ վրացական շրջանի՝ Թուշեթիի հովիվները: Նրանք նույնպես տուժել են, քանի որ ամռանը իրենց անասուններին բերում են Ջավախեթիի հարուստ արոտավայրեր:
Փակած ճանապարհին 8 բեռնատար էր կուտակվել, որոնք Թուրքիա էին ուղևորվում, ինչպես նաև 10 մարդատար մեքենա:
