Հայաստանը մոտ 2 մլրդ դոլար կհատկացնի արցախցիների բնակարանային խնդրի լուծմանը
Բնակարան ԼՂ-ից բռնի տեղահանվածներին
Հայաստանի կառավարությունը հաստատել է Լեռնային Ղարաբաղից բռնի տեղահանված անձանց բնակարանային ապահովման ծրագիրը։ Ծրագիրն իրականացվելու է առաջիկա հինգ տարիների ընթացքում՝ 2024-2029թթ.-ին՝ փուլային տարբերակով։ Այն ունի երեք բաղադրիչ՝ բնակարանի կամ անհատական բնակելի տան ձեռքբերման հավաստագրի տրամադրում, անհատական բնակելի տան կառուցման հավաստագրի տրամադրում և գործող հիփոթեքային վարկի մարման աջակցություն։
«Տեղահանված ընտանիքը համարվում է շահառու, եթե ընտանիքի բոլոր անդամները, այդ թվում՝ անչափահասները ունեն կամ ստացել են Հայաստանի Հանրապետության քաղաքացիություն»,- գործադիրի նիստում հայտնել է Աշխատանքի և սոցիալական հարցերի նախարար Նարեկ Մկրտչյանը։
Որոշումը տարածվում է Ադրբեջանի կողմից 2020 թ․-ի սեպտեմբերի 27-ին սանձազերծված պատերազմից, ինչպես նաև 2023 թ․-ի սեպտեմբերի 19-ի ռազմական գործողությունից հետո Լեռնային Ղարաբաղից բռնի տեղահանված ընտանիքների վրա, այդ թվում՝ մեկ անձից բաղկացած։
Կառավարությունն ակնկալում է, որ ծրագրի իրականացման արդյունքում բնակարանով կապահովվի շուրջ 25.000 ընտանիք։ Վարչապետ Նիկոլ Փաշինյանի խոսքով՝ սա այսօրվա փոխարժեքով մոտ 2 մլրդ դոլարի ներդրումային ծրագիր է։
Ծրագիրն իրագործվելու է 3 փուլով
Առաջին փուլը մեկնարկելու է այս տարի։ Շահառու են հանդիսանալու՝
- 3 և ավելի անչափահաս երեխա ունեցող ընտանիքները` բնակարանի կամ կառուցվող շենքից բնակարան գնելու իրավունքի կամ անհատական բնակելի տան ձեռքբերման դեպքում,
- 2 և ավելի անչափահաս երեխա ունեցող ընտանիքները` անհատական բնակելի տան կառուցման դեպքում,
- զոհվածի, կերակրողին կորցրածի կամ հաշմանդամության 1-ին կամ 2-րդ խումբ ունեցող անդամով ընտանիքները,
- ցանկացած այլ կազմի ընտանիքները, որոնք վարկունակ են և կկարողանան աջակցության առնվազն 50%-ի չափով լրացուցիչ վարկ ստանալ բանկից (այսինքն՝ սեփական ներդրումն ունենալ)։
Նշվում է, որ ծրագրի երկրորդ փուլը մեկնարկելու է ոչ ուշ, քան 2026 թ․-ի հունվարի 1-ը, երրորդ փուլը՝ ոչ ուշ, քան 2027 թ․-ի հունվարի 1-ը։
Ծրագրից բխող կարգը հաստատվելու է մինչև հունիսի 15-ը։ Այդ պահից սկսած կգործի տան ձեռքբերման աջակցության բաղադրիչը, հուլիսի 15-ից՝ տան կառուցման բաղադրիչը և օգոստոսի 1-ից՝ գործող հիփոթեքային վարկի մարման բաղադրիչը։
Գույքի արժեքը չի կարող գերազանցել 55 մլն դրամը
Խոսքն ինչպես բնակարանի, այնպես էլ անհատական բնակելի տան կառուցման կամ ձեռքբերման մասին է։ Սահմանված է նաև մեկ այլ պահանջ՝ բնակելի մակերեսը շահառու ընտանիքի յուրաքանչյուր անդամի հաշվով պետք է լինի ոչ պակաս, քան 12 քմ։
Ինչ վերաբերում է տրամադրվող աջակցության չափին, ընտանիքի յուրաքանչյուր անդամի հաշվով այն որոշվելու է ըստ ընտանիքի կողմից ընտրված բնակավայրի։
Որոշման նախագծից տեղեկանում ենք, որ կախված բնակավայրից ընտանիքի յուրաքանչյուր անդամի հաշվով տրամադրվելու է 3-5 մլն դրամ։
«5 միլիոն դրամ 242 քաղաքային և գյուղական բնակավայրերում իրացնելու դեպքում է տրամադրվելու, 4 միլիոն դրամ 148 քաղաքային և գյուղական բնակավայրերում իրացնելու դեպքում, 3 միլիոն դրամ մնացած բնակավայրերում, բացի Երևանի առաջին և երկրորդ գոտիներից»,- պարզաբանել է Աշխատանքի և սոցիալական հարցերի նախարար Նարեկ Մկրտչյանը։
Տարածքային կառավարման և ենթակառուցվածքների նախարար Գնել Սանոսյանի խոսքով՝ ընտրված բնակավայրերը 390-ն են, ինչը «բավականին մեծ թիվ է, մոտ 40 տոկոսն է բնակավայրերի»։
Գործող հիփոթեքային վարկի մարման աջակցության չափն ընտանիքի յուրաքանչյուր անդամի հաշվով կազմելու է 2 մլն դրամ։ Անշարժ գույքը, սակայն, չպետք է լինի Երևանի վարչական տարածքում ներառված 1-ին կամ 2-րդ գոտում, այսինքն կենտրոնում։
Ովքե՞ր չեն կարող դիմել ծրագրին
Բնակարանային ապահովման պետական աջակցության ծրագրի շահառու չենք կարող դառնալ՝
- այն ընտանիքները, որոնք հանդիսացել են «Լեռնային Ղարաբաղի առանձին շրջաններից տեղահանված ընտանիքների համար բնակարանային մատչելիության ապահովման պետական աջակցության» ծրագրի շահառու (ՀՀ կառավարության 2022 թ․-ի փետրվարի 17-ի թիվ 169-Լ որոշմամբ): Այդ ծրագրի շրջանակում արդեն իսկ աջակցություն է ստացել տեղահանված 4308 ընտանիք (15.338 անձ);
- այն ընտանիքները, որոնց անդամներից առնվազն մեկը 2023 թ․-ի սեպտեմբերի 19-ի կամ ծրագրին դիմելու օրվա դրությամբ ՀՀ-ում ունի սեփականության կամ ընդհանուր համատեղ կամ ընդհանուր բաժնային սեփականության իրավունքով (50 տոկոս և ավելի մասնաբաժնով) իրեն պատկանող բնակելի անշարժ գույք։
Հետևեք մեզ — Facebook | Youtube | Telegram
Բնակարան ԼՂ-ից բռնի տեղահանվածներին
