Բեռնատարը վրաերթի է ենթարկել ամբոխին Լոնդոնի կենտրոնում, զբոսնողների վրա հարձակվել են դանակներով
Ըստ նախնական տվյալների՝ 6 մարդ է զոհվել Լոնդոնի կենտրոնում կիրակի՝ հունիսի 4-ին տեղի ունեցած ենթադրյալ ահաբեկչական ակտի պատճառով: 48 մարդ հիվանդանոց է տեղափոխվել:
Բեռնատարը Լոնդոնի կամուրջ է մտել մեծ արագության վրա և միտումնավոր վրաերթի ենթարկել մի քանի հետիոտնի, նրանցից ոմանք արդյունքում զոհվել են: Դրանից գրեթե անմիջապես հետո երեք անհայտ անձինք դանակներով հարձակվել են «Բորո Մարքետ»-ին մոտ շրջանի անցորդների վրա:
Ոստիկանությունը հաղորդել է, որ կասկածյալները երեքն էին, և նրանք բոլորը սպանվել են դեպքի վայրում ոստիկանների կողմից:
Հայտնվել է Լոնդոնի հարձակումների հնարավոր մասնակցի լուսանկարը:
Ահա թե ինչ է հաղորդում Բի-Բի-Սի-ն տվյալ պահին կատարվածի մասին.
“Լոնդոնի ոստիկանությունը հաստատել է, որ Լոնդոն Բրիջի և Բորո Մարքետի դեպքերը գնահատում է որպես ահաբեկչական գրոհ”:
Բի-Բի-Սի-ն հաղորդում է, թե ինչ են պատմում գրոհի ականատեսները.
«Մարդուն դանակահարում էին աչքիս առջև»
Նատալին և Բենը «Բորոու Հայ-սթրիթ» մետրոյի կայարանի մուտքին են մոտենալիս եղել, երբ տեսել են վազող մարդկանց:
Ամուսինների աչքի առջև մարդու վրա են դանակով հարձակվել:
«Ես տեսա կարմիր հագած մի տղամարդու մեծ դանակով, կարծում եմ, շեղբը մոտ տասը դյույմ (25սմ) կլիներ, — պատմում է Բենը: — Նա հարձակվեց մեկի վրա և դանակով երեք անգամ հարվածեց՝ այդ ընթացքում ոչ մի էմոցիա չարտահայտելով», — պատմում է Բենը:
Իր գործն անելուց հետո դանակով մարդը հանգիստ հեռացել է: Բենին թվացել է, թե նա ուղեկից ուներ:
«Դանակով մարդու ուղղությամբ մեկը սեղան նետեց, ևս մեկը՝ շիշ: Հետո ես ու կինս երեք կրակոց լսեցինք և փախանք»:
«Ես պարանոցի վնասվածքով մի կնոջ եմ տեսել»
Ալեքս Շելլամը այդ պահին Լենդոնի կամրջի վրայի փաբում էր իր ընկերուհու և երկու ընկերների հետ:
«Երեկոյան մոտ ժամը տասին փաբ ներս մտավ մի վիրավոր կին օգնության հույսով: Նրա պարանոցի վնասվածքից ուժեղ արյուն էր հոսում: Թվում էր, թե կոկորդն են կտրել: Մարդիկ սկսեցին փորձել կանգնեցնել արյունահոսությունը: Փաբը փակեցին:
Դրսում արտակարգ ծառայությունները փորձում էին վերակենդանացնել մեկ այլ մարդու: Այնտեղ զինված ոստիկաններ էին, նրանք մեզ ասացին, որ հեռանանք»:
«Ոստիկանները մեզ ասացին խոհանոցում սպասել, մինչ նրանք շրջակայքն են ստուգում: Հետո ասացին լքել ռեստորանը և վազքով մեզ դուրս բերեցին վտանգավոր գոտուց»:
«Մեզ նշանառության տակ էր պահում 50 ոստիկան»
Կումի դե Կոստան և նրա երկու ընկերուհիները Բորոու Մարքետի շրջանում հարձակման ականատեսն են եղել:
«Տաքսու վարորդը թեքվեց դեպի շուկա, և այդտեղ մենք արգելափակված մնացինք փոխհրաձգության կիզակետում: Փողոցը միակողմանի էր, և մենք չէինք կարող հետ գնալ:
Բազմաթիվ կրակոցներ էին հնչում: Երկու մարդ եկեղեցու ետևում գետնին էր պառկած, ևս երկուսը կամ երեքը խոնարհվել էին նրանց վրա:
Մի քանի անգամ կրակոցների պատճառով ստիպված էինք տաքսու հատակին պառկել:
Մեզ նշանառության տակ էին պահում մոտ 50 ոստիկան: Մի լազերային նշանառությունը հենց տաքսու վարորդի վրա էր: Մենք ձեռքերը վեր բարձրացրինք և փորձեցինք դուրս գալ մեքենայից: Նրանք (ոստիկանները) գոռացին մեզ վրա և հրահանգեցին հեռանալ:
Ռեստորանից տղամարդ էր դուրս գալիս, նրա պարանոցին անձեռոցիկ կար, որի տակից արյուն էր հոսում: Եվս մեկ տղամարդ գետնին էր պառկած: Չգիտեմ՝ արդյոք օգնության էր սպասում, թե արդեն մահացել էր:
Մենք փոքր փոողցներով դուրս եկանք: Այնտեղից ոստիկանությունը մեզ ուղարկեց դեպի Blackfriars կամուրջը: Երևում էր, որ մարդիկ նայում են եզրապատից: Միգուցե ինչ-որ մեկը ցատկել էր կամրջից»:
Դոնալդ Թրամփն արձագանքել է Լոնդոնում կատարվածին՝ իշխանություններին կոչ անելով հանուն ազգային անվտամգության արգելել արտասահմանցիների մուտքը երկիր: ԱՄՆ նախագահի թվիթն ակտիվորեն քննարդատում են սոցցանցերի օգտատերերը: Միայն դրանից հետո նա հայտարարում է. «ԱՄՆ-ն ձեր կողքին է, պատրաստ ենք օգնելու Լոնդոնին և Մեծ Բրիտանիային, Աստված օրհնի ձեզ»:
