Բաքվում տեղի կունենան բանակցություններ Ռուսաստանի և ԱՄՆ-ի գլխավոր շտաբերի պետերի միջև

ԱՄՆ Զինված ուժերի պետերի միավորված կոմիտեի նախագահ գեներալ Ջոզեֆ Դանֆորդը (Josef Dunford) և Ռուսաստանի ԶՈՒ գլխավոր շտաբի պետ Վալերի Գերասիմովը փետրվարի 16-ին կհանդիպեն Բաքվում և կքննարկեն զինվորականների միջև հաղորդակցությունների կարևորությունը: Այս մասին հաղորդում է «ՌԻԱ Նովոստին»՝ վկայակոչելով Պենտագոնի մամուլի ծառայությունը:

Սա Դենֆորդի և Գերասիմովի միջև առաջին հանդիպումն է: Մինչ այս նրանց միջև տեղի է ունեցել մեկ հեռախոսազրույց:

«Ըստ համաձայնեցված օրակարգի՝ նախատեսվում է քննարկել ՌԴ-ի և ԱՄՆ-ի միջև ռազմական համագործակցության ընթացիկ վիճակը և հեռանկարները, ինչպես նաև միջադեպերի կանխման հարցը՝ կապված կողմերի ռազմական գործողությունների հետ»,- նախօրերին «Ինտերֆաքսին» ասել են ՌԴ պաշտպանության նախարարության տեղեկատվության բաժնից:

«Ռազմական առաջնորդները կքննարկեն տարաբնույթ հարցերի շրջանակ, այդ թվում ԱՄՆ-ի և Ռուսաստանի միջև ռազմական կապերի ներկա վիճակը և զինվորականների միջև մշտական, հստակ շփման կարևորությունը՝ հանուն սխալ հաշվարկների և պոտենցիալ ճգնաժամերի կանխման»,- ասվում է հաղորդագրության մեջ:

Փետրվարի 16-ին ամերիկյան պատվիրակությանն ընդունել է Ադրբեջանի նախագահ Իլհամ Ալիևը:

New York Times թերթն իմացել է , թե ինչու է Դանֆորդի և Գերասիմովի միջև հանդիպումն անցկացվում հենց Բաքվում:

Վկայակոչելով ԱՄՆ պաշտոնական աղբյուրները՝ թերթը գրում է, որ ռուսական կողմը Ջ. Դանֆորդին առաջարկել է գալ Մոսկվա կամ Բելառուս: Պետնագոնն իր հեթիին պնդել է, որ հանդիպումն անցկացվի Արևմտյան Եվրոպայում:

Սակայն, հաշվի առնելով, որ ԵՄ-ում Գերասիմովի դեմ սահմանված պատժամիջոցներ կան, և նրա մոււտքը Եվրոպա արգելված է, դա անհնար է դարձել: Պատժամիջոցը սահմանվել է այն  հայտարարությունից հետո, որ Գերասիմովը Ուկրաինայում հակամարտության հիմնական ֆիգուրներից է: Արդյունքում որոշում է կայացվել հանդիպումն անցկացնել Բաքվում: