Բաքվում մանկական տոնի ժամանակ ատրակցիոն է վթարվել

Երեխաների պաշտպանության օրվան նվիրված մանկական փառատոնի ժամանակ ուժեղ քամին պոկել է ատրակցիոններից մեկը՝ փչովի բազմամետրանոց սահարանը, և գցել ամբոխի վրա:

Դա հեռախոսներով տեսանկարահանել են ականատեսները, որոնք էլ տեղադրել են տեսանյութը համացանցում: Ինչպես փոխանցում է Contact.az-ն, ըստ ոչ պաշտոնական տվյալների՝ տուժել է մոտ 20 մարդ: Ոչ մի պաշտոնական տեղեկատվություն այդ մասին չկա: Լրատվամիջոցների մասն այդ միջադեպը շրջանցել է:

Այս դեպքը քննարկում են սոցցանցերի օգտատերերը, կազմակերպիչներրին մեղադրում անպատասխանատվության համար և կոչ անում հոգ տանել սեփական երեխաների համար և փորձանքից հեռու պահել՝ չմասնակցելով ժողովրդական տոնակատարություններին: Տիպիկ մեկնաբանություն.

«Միշտ խուսափել եմ մարդկանց կուտակումների վայրերից կազմակերպիչների հանդեպ լիակատար անվստահության պատճառով»:

Բաց երկնքի տակ մանկական տոնն անցկացվում էր Հեյդար Ալիևի հիմնադրամի նախաձեռնությամբ և մի քանի պետական կառույցների աջակցությամբ: Դրան մասնակցում էին հարյուրավոր երեխաներ՝ ներառյալ մանկատների և ինտերնատների սաները: