Բաքվում ճանապարհային նշանները գնում են հազար դոլարով, երբ նույնը Գերմանիայում արժե 32 եվրո։ Ինչո՞ւ

Բաքվի տրանսպորտային գործակալությունը պայմանագիր է կնքել 920 հազար մանաթ ընդհանուր գումարով (540 հազար դոլար) 500 միավոր ճանապարհային նշան գնելու մասին։ Այդպիսի մեկ նշանը պետբյուջեի համար 1840 մանաթ [շուրջ $1,082 դոլար] է արժեցել։

Yenisabah.az պարբերականի ոչ մեծ հետաքննությունից հետո պարզվել է, որ Գերմանիայում այդպիսի մեկ ճանապարհային նշանը վաճառվում է ընդամենը 32 եվրոյով։ Իսկ Ռուսաստանում այդպիսի նշանները կարելի է գնել 850-900 ռուբլով [շուրջ $15]։

ԲՏԱ-ի մամուլի ծառայության ղեկավար Մայի Աղաևը լրագրողներին մեղադրել է ոչ պրոֆեսիոնալիզմի և «էժան պոպուլյարության հետևից ընկնելու» մեջ։ Նա հայտարարել է, որ իրենք գնում են «ոչ թե այդպիսի, այլ բոլորովին այլ նշաններ», միաժամանակ պարբերականին է ուղարկել նշանների լուսանկարները, որոնք պատրաստվում են գնել։

Yenisabah պարբերականը շարունակում է պնդել իր վարկածը։ Այն Բաքվի տրանսպորտային գործակալության մամուլի ծառայության ղեկավարի հերքման տեքստն է հրապարակել, սակայն միաժամանակ հավելել է, որ լուսանկարների նշանների գինը տատանվում է 85-ից 216 եվրոյի սահմաններում։

Այս տեղեկությունն Ադրբեջանի սոցցանցերում մեծ արձագանք է առաջացրել։