Բաքվում «կօրինականացնեն» փողոցային արտիստներին, բայց միայն ընտրյալներին

Փողոցային արտիստներին կթույլատրեն հանդես գալ Բաքվի կենտրունում, բայց միայն եթե պետական գերատեսչությունը հավանություն տա նրանց արվեստին։

• Անդերգրաունդ արվեստն Ադրբեջանում. գրաքննություն օգնության դիմաց

• Ժամանակակից ադրբեջանական գրականություն. ի՞նչ է դա

Դեպի փողոց՝ քասթինգի միջոցով

Փողոցային արվեստի զարգացման նախագիծը մշակել է Զբոսաշրջության պետական գործակալությունը՝ զբոսաշրջիկներ գրավելու համար: 

Երաժիշտները, արտիստները, նկարիչները, պարողները և փողոցում ելույթ ունենալու ցանկություն ունեցող մյուս արտիստները պետք է հատուկ ընտրական գործընթացով անցնեն: 

Նրանք, ովքեր կանցնեն քասթինգը, Բաքվի զբոսաշրջային տեղեկատվական կենտրոնից պաշտոնական թույլտվություն կստանան քաղաքի կենտրոնում հանդես գալու համար, և նրանց աշխատանքի համար կստեղծվեն բոլոր պայմանները, գրում է Report-ը: 

Թե ինչ չափանիշներով կկատարվի ընտրություն և ինչ պայմաններ կստեղծվեն փողոցային արտիստների համար՝ առայժմ հայտնի չէ: 

Ոստիկանությունը քշում է, անցորդները վճարում են

Այսօր Բաքվում փողոցային արտիստները շատ քիչ են: Սուլեյման Քերիմովը երաժիշտ ընկերների հետ մի քանի անգամ փորձել է ելույթ ունենալ Բաքվի փողոցներում և պատմում է, որ առավելագույնը կես ժամ հետո ոստիկանությունն իրենց հեռացրել է: 

«Փոխարենը մարդիկ լավ էին արձագանքում և առատ վարձատրում էին», — ավելացնում է նա: 

Սուլեյմանը կարծում է, որ փողոցային արտիստներին, իսկապես, պետք է «մաղով անցկացնել»: Բայց նա մտավախություն ունի, որ Ադրբեջանում այդպիսի քասթինգը պարզապես կվերածվի գրաքննության և ցանկացած բանի արգելքի, որը «չի համապատասխանում ազգային մենթալիտետին»: 

Սոցիալական ցանցերի արձագանքը 

Սոցցանցերի օգտատերերն այդ նախաձեռնությունը քննադատել են. 

«Ի՞նչ ընտրություն: Ո՞վ է նման բան տեսել: Փողոցային արտիստներին պետք է «ընտրեն» և գնահատեն անցորդները, ոչ թե պաշտոնյաները»:

«Հիմա քաղաքի կենտրոնով ընդհանրապես հնարավոր չի լինի քայլել»: 

«Մի անգամ տեսել եմ՝ ինչպես է ոստիկանությունը քաշքշում երկու երիտասարդների, որոնք պարզապես երգում էին փողոցում և անգամ փող չէին հավաքում»: 

«Դե, վերջ, հիմա ամեն քայլափոխի դրանք կլինեն, կիթառներով, նվնվան թուրքական երգերով»: