Բաքվի կենտրոնական «Թեզե բազար» շուկան փոխում է սեփականատիրոջը
«Թեզե բազար» («Նոր շուկա») բաժնետիրական ընկերությունը հայտարարել է փակման մասին: Այդպիսով վերջակետ է դրվել Ադրբեջանի մայրաքաղաքի հնագույն կենտրոնական շուկաներից մեկի սեփականատերերի երկար վեճում:
«Թեզե բազարը» կառուցվել է մոտ 70 տարի առաջ Բաքվի կենտրոնում և թերևս ամենահայտնի գյուղատնտեսական շուկան էր: Նույնիսկ խորհրդային տարիներին, երբ ապրանքը տալոնով էր և դժվար 90-ականերին այստեղ (իհարկե ոչ պաշտոնական շուկայական գներով) կարելի էր գտնել հազվադեպ ապրանքի ողջ տեսականին: Այդ թվում՝ թարմ թառափ և սև ձկնկիթ:
Շուկան սեփականաշնորհել են 2000-ականների սկզբին, և դրա համասեփականատեր է դարձել երկու ադրբեջանցի գործարար Մամեդաղա Իբրահիմովն ու Վագիֆ Շիհալիևը: Սակայն մի քանի տարի հետո նրանց միջև գույքային վեճ է առաջացել, բանը հասնում էր հաշվեհարդարի սպառնալիքների և ոստիկանություն դիմելուն: Որոշ լրագրողների պնդմամբ՝ գործարարներից մեկն ուներ ներքին գործերի նախարարի հովանավորչությունը, իսկ մյուսն՝ ազգային անվտանգության: Անձնական տարաձայնությունները խորանում էին երկու ուժեղ նախարարների քաղաքական դիմակայությամբ:
2017թ-ի ապրիլի 4-ին «Թեզե բազարի» տարածքում հրդեհ բռնկկվեց, և շուկան մեկ շաբաթով փակ էր: Կասկածներ կային միտումնավոր հրդեհման մասին, սակայն ոստիկանությունը դրա ապացույցները չգտավ:
«Թեզե բազար» բաժնետիրական ընկերության լուծարումից հետո, haqqin.az և virtualaz.org կայքերի տվյալներով, շուկան անցնում է ռուս միլիարդատեր Գոդա Նիսանովին:
Նիսանովը ծնունդով Ադրբեջանի Գուբայի շրջանի Կրասնայա Սլոբոդա հայտնի ավանից է, որը խիտ բնակեցված է լեռնային հրեաներով: «Ֆորբս» ամսագրի ռուսական տարբերակի տվյալներով՝ Նիսանովն ամենահարուստ ռուս գործարարների վարկանիշում 36-դ տեղն է զբաղեցնում:
Այսօր «Թեզե բազարը» դեռ բաց է գնորդների համար, սակայն մոտ ժամանակներս շուկան հիմնովին կվերակառուցվի:
«Թեզե բազարը» ծաղկուն շրջանում: Լուսանկարը բլոգից
.
«Թեզ բազարն» այսօր:
