Բաքվի դատարանը որոշում է կայացրել մի քանի կայքերի վերջնական արգելափակկման մասին

Բաքվի Սաբայիլի շրջանային դատարանը մայիսի 12-ին բավարարել է 5 անկախ առցանց ռեսուրսների արգելափակման մասին կապի նախարարության Էլեկտրոնային անվտանգության կենտրոնի հայցը. azadliq.info («Ազադլիգ» թերթ), azadliq.org («Ազադլիգ» ռադիոկայան ), azerbaycansaati.com, meydan.tv, ինչպես նաև Azerbaycan saatı և Turan TV տեսաալիքները:

Պատասխանողի ներկայացուցիչ փաստաբան Սամեդ Ռագիմովը նշել է, որ կայքերի արգելափակման մասին կապի նախարարության մարտի 27-ի որոշումը հակասում է Մարդու իրավունքների եվրոպական կոնվենցիային, Թուրքիայում կայքերի արգելափակման մասին Ստրասբուրգի դատարանի որոշմանն, ինչպես նաև Եվրախորհրդի նախարարների կոմիտեի 2016թ-ի բանաձևին, որի համաձայն կայքը չի կարող արգելափակվել, իսկ սահմանափակումը կարող է վերաբերել միայն հստակ տեղեկատվության:

Ռագիմովը նշել է, որ կապի նախարարության դժգոհությունը հարուցած հրապարակումներում «հասարակության և պետության օրինական շահերը» խախտող որևէ բան չկա: Նյութերը չեն պարունակել կրոնական ծայրահեղականության կամ այլ հակաիրավական գործողությունների կոչեր:

Սակայն Էլեկտրոնային անվտանգության կենտրոնի ներկայացուցիչ Բախտիար Մամեդովը պնդել է հայցի բավարարումը:

Այնուհետև դատավորը ժամանակ է տվել «Ռադիո Ազադլիգի» փաստաբան Ադիլյա Իսմայլովայի ելույթի նախապատրաստման համար և որոշում կայացրել կայքերի արգելափակման մասին:

«Ազադլիգ» թերթի խմբագիր Ռովշան Հաջիբեյլին ասել է, որ ռեսուրսի աշխատանքը շարունակվելու է, փոխանցում է «Թուրան» տեղեկատվական գործակալությունը:

Մեդիափորձագետ, իրավաբան Ալեսքեր Մամեդլին, մեկնաբանելով այդ որոշումն «Ազադլիգ» ռադիակայանին տված հարցազրույցում ասել է. «Դա միանշանակ սխալ ուղղությամբ քայլ է, որը կհանգեցնի Ադրբեջանում առցանց ազատության վերջնական խեղդմանը: Դատարանը ցույց է տվել, որ առաջնորդվում է ոչ թե արդարությամբ, այլ քաղաքական պատվերով»:

Արգելափակված կայքերից մեկի՝ Meydan.tv-ի տնօրեն Էմին Միլլին համարում է, որ այդ որոշումը կապված է իր հասցեին քննադատական նյութերից ընթերցողին պաշտպանելու իշխանության ցանկությամբ: «Սակայն ընթերցողներն արդեն սովորել են օգտվել տարբեր անոնիմայզերներից և VPN ծրագրերից, և այնուամենյանիվ շարունակելու են կարդալ մեկ կայքերն», — ասել է Միլլին «Ազադլիգ» ռադիոկայանին: