«Բաքվեցի տղաները» պաշտպանություն են խնդրում
Վերջերս oxu.az կայքը հաղորդեց, որ իրենց խմբագրություն օգնության խնդրանքով դիմել են Ազեր Մամեդզադեն, Բահրամ Բագիրզադեն, Ջաբիր Իմանովն ու Թահիր Իմանովը: Նրանք խնդրում էին իրենց բողոքը հասցնել երկրի նախագահին:
«Բաքվեցի տղաներ» ՈւՀԱ թիմը, որը հայտնիություն է ձեռք բերել 1992 թ. ՈւՀԱ Բարձրագույն լիգայում տարած հազթանակից հետո, այժմ գործում է որպես «Բաքվի տղաների մոլորակ» թատրոն: Նրանք համերգներ են տալիս, կոմեդիաներ և հեռուստահաղորդումներ նկարահանում:
Իրենց ելույթներում «Բաքվեցի տղաներն», ըստ ավանդույթի, ծաղրում են քաղաքական գործիչներին, ոստիկաններին, բարձրացնում են սոցիալական հարցեր: Նրանց համերգներին 90-ականների վերջին, 2000-ականների սկզբին ասեղ գցելու տեղ չկար, և անպայման ներկա էր լինում նախագահ Հեյդար Ալիևը, ով սովորություն ուներ արտիստների հետ զրուցել ելույթից հետո և շնորհակալություն հայտնել նրանց հատկապես հասարակության խնդիրներն արտացոլելու համար:
Հետագա տարիերին ու մինչ այժմ ՈւՀԱ-ի տղաները ավելի ու ավելի զգույշ էին արտահայտվում: Այսինքն այն թեմաների շրջանակը, որոնց շուրջ նրանք կատակում էին, ավելի ու ավելի էր նեղանում: Ընդհանուր առմամբ կոլետկիվը բացահայտ հավատարմություն էր դրսևորում իշխանություններին և ոչ մի պարագայում ոչ մի ընդդիմադիր տրամադրություններ չէր կիսում:
Այնուամենայնիվ այժմ նրանք Space հեռուստաալիքի ղեկավարության հետ խնդիրներ ունեն:
«Մեզ ասացին, որ «չի կարելի քննադատել ոստիկաններին»: Ասում եմ. «Ինչո՞ւ: Ինչո՞ւ 90-ականներին կարելի էր, 2000-ականներին կարելի էր, մինչև 2015թ. փետրվարը կարելի էր, իսկ այժմ չի կարելի»: Պատասխանում է. «Չի կարելի և վերջ»: Ես հարցրի, արդյո՞ք նրան զանգահարել է ոստիկանության ղեկավարությունը: Նա ասաց, որ ոչ, իբր ինքն է այդպես որոշել: Ես ասացի. «Իսկ ինչո՞ւ եք այդպես որոշել»: Ասում է՝ չի կարելի և վերջ: Ես հարցրի, մնացածներին կարելի է, թե ոչ: Նա ասաց. “Մնացածներին դեռևս կարելի է, իսկ ոստիկաններին՝ ոչ, — պատմում է Թահիր Իմանովը:
«Մեր վերջին երկու համերգները եթեր չտվեցին: Վերջին համերգը պետք է ցուցադրեին գարնանը, սկզբի մի շաբաթը անոնսն էր գնում: Սակայն կիրակի օրը ԱՏՎ-ից զանգում ասում են. «Մենք կտրում ենք այն հատվածները, որտեղ ծաղրում եք նախարարների մանկությունը, քննադատում եք ոստիկանությանը, մաքսայինին, հարկայինին…»»:
Երկրի երկու ամենահայտնի հեռուստաալիքներ LiderTV-ն ու ANS-ը հրաժարվել են համագործակցել «Տղաների» հետ:
«Ձեզ դիմելու մեր նպատակը հետևյալն է. Ձեր կայքի միջոցով երկրի ղեկավարությանը, հարգարժան նախագահին, հարգարժան առաջին տիկնոջը հասցնել մեր հոգու ճիչը, — ասում է Ազեր Մամեդզադեն: — Մեր կոլեկտիվում 60 մարդ է աշխատում և նրանք բոլորը մինչ այժմ առանց աշխատավարձի նստած են»:
Այսպիսով՝ արտիստները երկրի ղեկավարության պաշտպանությանն են դիմել՝ ողջ կատարվածը համարելով չինովնիկների ամենաթողություն: Նրանց ամենաշատը զարմացնում է ոչ թե այն ճնշումը, որին նրանք հանդիպել են, այլ վերաբերմունքի այն տարբերությունը՝ ինչպիսի հաջողություն նրանք ունեին բոլորի, այդ թվում նաև իշխանությունների մոտ և այն աղետալի վիճակը, որում հայտնվել են այժմ:
