Բայդենը դառնում է ԱՄՆ նոր նախագահը. ինչո՞ւ են շատերը դեռ համակրում Թրամփին

Ջո Բայդենը փաստացի հաղթեց ԱՄՆ-ի, ամենայն հավանականությամբ, ամենաբարդ նախագահական ընտրություններում: Հաղթանակը դեռ չի հայտարարվել, դեռ մնացել է ձայների մի փոքր տոկոս հաշվել:

Ինչո՞ւ էր Բայդենի հաղթանակը Թրամփի հետ պայքարում այդչափ բարդ, չնայած նախկին նախագահի թերություններին, որոնք լրատվամիջոցներում և փորձագիտական շրջանակներում անվանում են «ճչացող»:

Գիշերը (Հարավային Կովկասի ժամանակով առավոտյան ժամը 8-ին) Ջո Բայդենը հայտարարությամբ հանդես եկավ և նաև թվարկեց իր առաջնահերթությունները.

• պայքար կորոնավիրուսի դեմ, 
• տնտեսության վերածնունդ,
• պայքար կլիմայի փոփոխության դեմ,
• պայքար համակարգային ռասիզմի դեմ։

Բայդենը կոչ է արել մարդկանց համբերատար լինել և վստահել ժողովրդավարական համակարգին:

«Մենք կրկին կապացուցենք այն, ինչը ապացուցել ենք 244 տարվա ընթացքում այս երկրում. ժողովրդավարությունը գործում է: Ձեր ձայնը հաշվի կառնվի», — ասել է նա:

Սպասվում է, որ ընդհանուր մասնակցությունը 120 տարվա մեջ ամենաբարձրը կլինի ԱՄՆ ընտրություններում և կկազմի 66,9%: Ջո Բայդենը և նրա ապագա փոխնախագահ Քամալա Խարիսը ստացել են շուրջ 74 միլիոն ձայն:

ԱՄՆ ընտրությունների ընթացքում հիմնական իրավիճակների և նոր նախագահի ու նրա Ժողովրդավարական կուսակցության ղեկավարությամբ երկրի հեռանկարների մասին։

Սուտը՝ որպես Թրամփի նախագահության ֆիրմային նշան

Սուտը ուղեկցել է Դոնալդ Թրամփին նրա նախագահության ողջ ընթացքում: Բայց նրա վերջին ելույթը դրա գագաթնակետն էր, և ամերիկյան մի քանի հեռուստաընկերություններ նույնիսկ հրաժարվեցին այն հեռարձակել:

Մասնավորապես, ամերիկյան MNBC հեռուստաալիքի հաղորդավարը հայտարարեց.

«Մենք ընդհատում ենք Դոնալդ Թրամփի ելույթի հեռարձակումը, քանի որ այն պարունակում է փաստերին հակասող պնդումներ»:

Դա աննախադեպ էր ամերիկյան հեռուստատեսության պատմության մեջ: 

• Կարծիք․ Պուտինն օգտագործում է Թրամփին, Եվրոպան պետք է աչալուրջ լինի
• ԱՄՆ, ցույցեր․ ինչո՞ւ են գեներալներն ու նախկին նախագահները դեմ Թրամփին

Իսկ Դոնալդ Թրամփն ինքը՝ որպես քաղաքական կերպար, չունի նախատիպեր:

Ամերիկյան լրատվամիջոցները հաշվել են, որ նախագահի պաշտոնում Թրամփը ավելի քան 5 հազար անգամ փաստերին հակասող հայտարարություններ է արել:

Դրանցից ամենահայտնիները.

• «Կորոնավիրուսը սովորական գրիպ է, որը արագ կանցնի» (համավարակի կիզակետում), 
• «ՆԱՏՕ-ն թալանում է ԱՄՆ-ն» (այն մասին, թե այդ կազմակերպության բյուջեն անարդար է ձևավորվում),
• «Համավարակը ԱՄՆ-ի տնտեսությանը չի վնասել» (ևս 6 միլիոն մարդ այդ ընթացքում աղքատության շեմին են հասել)։

Էլ ինչո՞ւմ են մեղադրում Դոնալդ Թրամփին

Համակարգված սուտը գործող նախագահի միակ թերությունը չէ:

Նրա օրոք և նրա ուղղակի դրդմամբ ամերիկյան հասարակության մեջ հակասությունները կտրուկ սրվեցին: Նախևառաջ՝ ռասայական:

Զգալիորեն աճեց ոչ սպիտակամորթ մարդկանց, ԼԳԲՏ անձանց, կրոնական փոքրամասնությունների նկատմամբ բռնության դեպքերի թիվը:

Դոնալդ Թրամփը մեղադրվում է նաև ամբողջ աշխարհում բռնապետական ​​ռեժիմների նկատմամբ չափազանց հանդուրժող լինելու մեջ: Առաջին հերթին օրինակ են բերում նրա համակրանքը այնպիսի առաջնորդների հանդեպ, ինչպիսիք են Ռուսաստանի և Թուրքիայի նախագահներ Պուտինը և Էրդողանը:

Բացի դրանից, Թրամփը վարել է մեկուսացման արտաքին քաղաքականություն. նա հաշվի չի առել, որ ԱՄՆ-ն պատասխանատվություն է կրում երկրի սահմաններից դուրս իրավիճակի համար: Համարվում է, որ դա դեր է խաղացել աշխարհում մի քանի զինված հակամարտությունների սրման գործում, այդ թվում  Մերձավոր Արևելքում և Հարավային Կովկասում:

Ինչո՞ւ Դոնալդ Թրամփը եկավ իշխանության և հայտնի դարձավ

Թրամփի և Հանրապետական կուսակցության հաղթանակը 2016-ի ընտրություններին հնարավոր եղավ ԱՄՆ Ժողովրդավարական կուսակցության վերջին 50 տարիների ձախողված քաղաքականության պատճառով, կարծում է բրիտանական The Guardian թերթի մեկնաբան Օուեն Ջոնսը:

Նախորդ կառավարության հիմնական սխալների մասին, երբ իշխանության էին Բարաք Օբաման և Ժողովրդավարական կուսակցությունը.

• Անխոհեմ ֆինանսական աջակցություն նրանց, ովքեր նախընտրում են չաշխատել և օգտվել արտոնություններից՝ բարեխիղճ հարկատուների հաշվին:
• Էթնիկ փոքրամասնությունների արմատականներին ոչ բավարար կոշտ հակադրություն՝ այն հաշվով, որ ոչ սպիտակամորթ բնակչությունը ի պատասխան ընտրություններում կաջակցի Դեմոկրատական ​​կուսակցությանը:
• ԱՄՆ-ում աշխատատեղերի վերացում. խոշոր կորպորացիաների դեմ վարվող քաղաքականությունը նրանց թույլ տվեց արտադրությունը անպատժելիորեն տեղափոխել այլ երկրներ:

Հենց այս խնդիրների պատճառով Ջո Բայդենի հաղթանակը այնքան էլ տպավորիչ չեղավ. նրա առավելությունը Թրամփի նկատմամբ մի քանի նահանգներում տարբերվել է ընդամենը մի քանի հազար ձայնով:

Եվ Սպիտակ տանը Բայդենի հայտնվելուց հետո այդ խնդիրները չեն վերանա: