Բաթումում կոռուպցիայի մեղադրանքով յոթ պաշտոնյա է ձերբակալվել
Վրաստանի դատախազությունը Բաթումում ձերբակալել է բարձրաստիճան յոթ նախկին և գործող պաշտոնյաների։ Նրանց թվում է Աչարայի ինքնավար հանրապետության կրթության նախարարի պաշտոնակատար Բագրատ Մանվելիձեն, Բաթումի նախկին քաղաքապետ Գիորգի Երմակովն ու փոխքաղաքապետ Թենգիզ Պետրիձեն։
Ձերբակալվել են նաև ինքնավարության էկոնոմիկայի և ֆինանսների փոխնախարար Արչիլ Վանաձեն, Բաթումի քաղաքապետարանի գույքի և ծառայությունների վարչության պետը, Գնումների և ենթակառուցվածքների վարչության պետը։
•Վրաստան․ «համար մեկ ռեֆորմատո՞ր», թե՞ «էլիտար կոռուպցիայի» բույն
«Սոցիալական տունն» ու անհետացած ընկերությունը
Ձերբակալվածներին մեղադրանք է առաջադրվել առանձնապես խոշոր չափի պետական միջոցների վատնման և պաշտոնեական լիազորությունների չարաշահման համար։ Գործը վերաբերում է այսպես կոչված «Սոցիալական տան» շինարարության տենդերին, որը հայտարարվել էր 2015թ-ին։
«Սոցիալական տունն» ինքնավար հանրապետության իշխանությունների վաղեմի խոստումն է։ Նախագծի համաձայն՝ նոր շենքում բնակարաններ պետք է տրվեին բնապահպանական միգրանտներին, որոնք լքել են իրենց հարազատ գյուղերը տարերային աղետների պատճառով, ինչպես նաև սոցիալապես անապահով ընտանիքներին։
Տենդերը հաղթել էր «Կոնվենտ Ջորջիա» ընկերությունը, որը որպես կանխավճար էր ստացել 1.4 մլն լարի (ավելի քան 500 հազար դոլար)։ Սակայն միայն 250 հազար լարիի աշխատանք է կատարել և «անհետացել»։
Ինչպես նշում է դատախազությունը, պետությունը չի կարողացել վերադարձնել փողերը, քանի որ ընկերության տրամադրած ֆինանսական երաշխիքները տրվել են «ֆիկտիվ, գոյություն չունեցող» ընկերության կողմից։
Արդյունքում, «Սոցիալական տունը» չի կառուցվել , իսկ պետությունը 1 մլն 370 հազար լարիի (մոտ 488 հազար դոլար) վնաս է կրել։
Ռեպորտաժ այն մասին, թե ինչպես են ապրում բնապահպանական միգրանտները, որոնց համար «Սոցիալական տուն» էր կառուցվում։
