Արտերկրից դրամաշնորհ ստանալու համար կպահանջվի Վրաստանի կառավարության հաստատումը․ նախագիծ
Արտասահմանյան դրամաշնորհներ Վրաստանում
Վրաստանի միակուսակցական խորհրդարանը պատրաստվում է քննարկել նոր օրինագիծ, որի համաձայն՝ արտասահմանյան դրամաշնորհ ստանալու համար կպահանջվի կառավարության հաստատումը: Այդ մասին հաղորդել է Interpressnews-ը։
Բացի այդ, քաղաքական կուսակցություններն ու անհատները, որոնք հայտարարում են իրենց նախընտրական նպատակների մասին, այլևս չեն կարողանա արտասահմանյան կազմակերպությունների աջակցությամբ կազմակերպել դասախոսություններ, սեմինարներ և այլ նմանատիպ հանրային միջոցառումներ:
Միջազգային կազմակերպություններն իրենց հերթին այլևս չեն կարողանա կազմակերպել դասախոսություններ, սեմինարներ և այլ հանրային միջոցառումներ քաղաքական կուսակցությունների համար:
Դրամաշնորհների մասին նոր օրենքի պահպանումը վերահսկելու է Հակակոռուպցիոն բյուրոն: Առանց կառավարության «թույլտվության» դրամաշնորհ ստանալը կհանգեցնի տուգանքի՝ ստացած դրամաշնորհի գումարի կրկնակիի չափով:
Նոր կանոնից բացառություն են կազմում միջազգային սպորտային ասոցիացիաների, ֆեդերացիաների և կոմիտեների կողմից տրամադրվող դրամաշնորհները, Վրաստանից դուրս միջնակարգ և բարձրագույն կրթություն ստանալու և գիտական աշխատանք կատարելու համար տրամադրվող անհատական կրթաթոշակները, ինչպես նաև Վրաստանում գործող միջազգային կազմակերպությունների կողմից ստացվող դրամաշնորհները:
Իշխող «Վրացական երազանք» կուսակցության անդամ Արչիլ Գորդուլաձեն այս նախաձեռնությունը բացատրում է նրանով, որ պետությունը պետք է հնարավորություն ունենա վերահսկելու արտասահմանյան միջոցների փոխանցումը:
«Ցանկացած իրեն հարգող երկիր ոչ միայն իրավունք ունի, այլև պարտավոր է պաշտպանել ինքն իրեն, իր շահերը և իր ժողովրդին կոպիտ արտաքին միջամտությունից, և մեր թիմի նախաձեռնած օրենսդրական փոփոխությունները հենց դա են ենթադրում: Երբ արտասահմանից միջոցներ են փոխանցվում մեր երկիր, ապա պետությունը, իհարկե, պետք է հնարավորություն ունենա վերահսկելու և գնահատելու, թե ինչի վրա են ծախսվում այդ միջոցները»,- հայտարարել է Գորդուլաձեն «Իմեդի» հեռուստաալիքի եթերում:
Հետևեք մեզ — Facebook | Youtube | Telegram
Արտասահմանյան դրամաշնորհներ Վրաստանում
