Ադրբեջանի Միլի Մեջլիսը քննարկում է արտահերթ ընտրություններ անցկացնելու հարցը
Արտահերթ խորհրդարանական ընտրություններ Ադրբեջանում
Հունիսի 21-ին Միլլի Մեջլիսը (Ադրբեջանի խորհրդարանը) հաստատել է խորհրդարանն արձակելու և արտահերթ խորհրդարանական ընտրություններ նշանակելու վերաբերյալ Ադրբեջանի նախագահին ուղղված ուղերձի տեքստը։ Տեքստը, որն ընթերցել է պատգամավոր Թահիր Ռզաևը, դրվել է քվեարկության և ընդունվել 105 կողմ, 1 դեմ ձայների հարաբերակցությամբ։
- ՀՀ-ում քննարկում են Եվրամիությանն անդամակցելու հարցով հանրաքվեի հնարավորությունը
- ԵՄ դեսպան. «Գործակալների մասին օրենքը սառեցրել է Վրաստանի եվրաինտեգրումը»
- «Ինքնասպանությո՞ւն», թե՞ միջամտություն ՀՀ ներքին գործերին. Ալիևի հայտարարության մասին
Արտահերթ խորհրդարանական ընտրությունների անցկացման հարցով երկրի ղեկավարին դիմելու նախաձեռնությամբ հունիսի 20-ին՝ վարչության հերթական նիստում հանդես էր եկել իշխող «Նոր Ադրբեջան» կուսակցությունը:
Կուսակցության փոխնախագահ Թահիր Բուդագովը հայտնել է, որ Ադրբեջանի Սահմանադրության համաձայն՝ Միլլի Մեջլիսում հաջորդ ընտրությունները պետք է անցկացվեն 2024 թվականի նոյեմբերին, նույն ժամանակահատվածում Բաքվում կայանալու է ՄԱԿ-ի կլիմայի փոփոխության շրջանակային կոնվենցիայի 29-րդ համաժողովը (COP29) և այլ միջազգային միջոցառումներ:
«Թե՛ ընտրությունների, թե՛ նշված միջոցառումների բարձր մակարդակով կազմակերպումը մեծ նշանակություն ունի։ Բացի այդ, պետք է հաշվի առնել տվյալ ժամանակահատվածում երկրի խորհրդարանի լիարժեք աշխատանքի նպատակահարմարությունը։ Մենք կարծում ենք, որ ստեղծված պայմաններում Միլլի Մեջլիսը պետք է նախաձեռնի ինքնալուծարումը և ընտրություններն ավելի վաղ անցկացնի՝ առաջնահերթություն տալով պետության շահերին»,- ասել է նա։
Արտահերթ ընտրությունների նախաձեռնությունն անակնկալ չէր
Արտահերթ խորհրդարանական ընտրություններ անցկացնելու նախաձեռնությունը քաղաքական գործիչների համար անակնկալ չէր: Տևական ժամանակ է, ինչ այս հարցի շուրջ քննարկումներ էին ընթանում քաղաքական կուլիսներում, և որոշ կուսակցություններ նույնիսկ սկսել էին նախապատրաստվել ընտրական գործընթացին։
Միլլի Մեջլիսի՝ նախագահին ուղղված ուղերձի ընդունումից անմիջապես հետո «Հանրապետական այլընտրանք» կուսակցության (ReAl) նախագահ Իլգար Մամեդովը հայտնել է, որ իրենց կուսակցության թեկնածուների ցուցակը կհաստատվի հունիսի 23-ին կայանալիք նիստի ընթացքում։ Այժմ այն խորհրդարանում ներկայացնում է ընդամենը մեկ պատգամավոր:
ReAl-ի առաջնորդներից Նաթիգ Ջաֆարլին նույնպես նկատել է, որ իշխող կուսակցության որոշումը անակնկալ չի եղել, նաև հավելել, որ կուսակցությունը անցյալ տարեվերջին արդեն իսկ ստեղծել էր նախընտրական շտաբ, քանի որ կանխատեսել էր, որ լինելու է մի այսպիսի քայլ:
«Նրանք պատրաստվում են ժողովրդից գողանալ հերթական խորհրդարանական ընտրությունները»
«Մուսավաթ» կուսակցության ներկայացուցիչներից մեկը՝ Մուստաֆա Հաջիբեյլին կարծում է, որ «Նոր Ադրբեջան» կուսակցությունը անհարգալից վերաբերմունք է դրսևորում ընտրողների նկատմամբ՝ երկրորդ անգամ անընդմեջ խորհրդարանի վաղաժամկետ արձակում առաջարկելով:
«Եթե նախորդ ընտրությունները չեն կեղծվել, եթե մեծամասնությունը քվեարկել է ձեր օգտին, ինչո՞ւ մինչև վերջ չեք կրում ձեզ վրա դրված պատասխանատվությունը։ Միայն այս փաստարկը բավական է, որ բոլորը դեմ քվեարկեն իշխող կուսակցությանն ու այն թեկնածուներին, որոնց արտահերթ ընտրությունների ժամանակ կսատարեն իշխանությունները»։
Կուսակցությունը դեռ որոշում չի կայացրել՝ մասնակցելո՞ւ է առաջիկա խորհրդարանական ընտրություններին, թե՞ ոչ։
Ադրբեջանի ժողովրդական ճակատ կուսակցության (APFP) նախագահ Ալի Քերիմլին կարծում է, որ իշխանությունները մտադիր են խորհրդարանական ընտրություններն անցկացնել ոչ մրցակցային պայմաններում և ամառային սեզոնին, երբ քաղաքական ակտիվությունն էապես թույլ է.
«Ցավոք սրտի, ամեն ինչ եղավ այնպես, ինչպես ակնկալում էինք։ Ռեժիմն արտահերթ խորհրդարանական ընտրություններ կանցկացնի ոչ մրցակցային պայմաններում, ամառվա կեսին՝ օգոստոսին։ «Նոր Ադրբեջան» կուսակցությունն արդեն պաշտոնապես դիմել է Իլհամ Ալիևին։ Ամենայն հավանականությամբ, առաջիկայում կնշանակվեն արտահերթ խորհրդարանական ընտրություններ։
COP29-ի միջոցառումները մեկնարկելու են նոյեմբերի 11-ին: Իշխանություններին ոչինչ չէր խանգարի ընտրություններն անցկացնել Սահմանադրությանը համապատասխան՝ նոյեմբերի 3-ին:
Ակնհայտ է, որ COP29-ը պարզապես պատրվակ է: Պատրաստվում են ժողովրդից գողանալ հերթական խորհրդարանական ընտրությունները»։
