ՀՀ-ում ևս մեկ արքեպիսկոպոս է կալանավորվել, մեղադրանքը կապված է թմրամիջոցների հետ
Արշակ Սրբազանի կալանավորում
Հայաստանում երկու ամսով կալանավորվել է Մայր Աթոռի դիվանապետ Արշակ արքեպիսկոպոս Խաչատրյանը։ Բարձրաստիճան հոգևորականը վերջերս էր հայտնվել սկանդալի կենտրոնում․ նրան ինտիմ տեսանյութեր են վերագրվում։
Մեղադրանքը, սակայն, մեկ ամիս առաջ հրապարակված տեսանյութերի հետ որևէ առնչություն չունի։ Քննչական կոմիտեի փոխանցմամբ՝ հոգևորականի նկատմամբ հանրային քրեական հետապնդում է հարուցվել Քրեական օրենսգրքի 393-րդ հոդվածի 2-րդ մասի 1-ին և 4-րդ կետերով, այն է՝ «մի խումբ անձանց կողմից նախնական համաձայնությամբ թմրամիջոց ապօրինի իրացնելը՝ հանդիսադիր վայրում»։
Արշակ Սրբազանի փաստաբան Արսեն Բաբայանը նշել է, որ դիվանապետին մեղադրում են այն բանի համար, որ նա, իբր, 2018 թվականին կաթողիկոսի դեմ ակցիայի մասնակիցներից մեկի ուսապարկում իր ծառայակիցներից մեկի միջոցով թմրամիջոց է տեղադրել՝ վերջինիս վարկաբեկելու նպատակով։
«Ակնհայտ է, որ հաշվի առնելով Սրբազանի հրապարակային հայտարարությունները, դիրքորոշումները՝ այս հոդվածով քաղաքական նպատակներով փորձում են վարկաբեկել Արշակ Սրբազանին, որպեսզի հանրության մոտ ստեղծեն տպավորություն, թե նա, իբր, զբաղվում է թմրամիջոցների իրացմամբ»»,- շեշտել է Բաբայանը։
Յոթ տարվա վաղեմության մեղադրանքը փաստաբանը «զավեշտալի», «անհեթեթ» է որակել։ Բաբայանը նաև տեղեկացրել է, որ Արշակ Սրբազանի դեմ ուղիղ ցուցմունք չկա։
Նախօրեին Արշակ Սրբազանը Քննչական կոմիտե էր հրավիրել հարցաքննության, մասնավորապես՝ նրան վերագրվող ինտիմ բնույթի տեսանյութի գործով։ Հարցաքննության ավարտից հետո նա և փաստաբանը ցանկացել են դուրս գալ շենքից, սակայն նրանց դիմավորել են ԱԱԾ աշխատակիցներն ու հայտնել՝ հոգևորականին ձերբակալելու վերաբերյալ քննիչի որոշում ունեն։
Այս պահին հայտնի բոլոր մանրամասները
- Փաշինյանը որոշել է հանդիպել «կաթողիկոսի թյուր ընթացքը» քննադատող հոգևորականների հետ
- «Կաթողիկոսը պարտվեց վստահության հանրաքվեն Էջմիածնում»․ կարծիք ՏԻՄ ընտրությունների մասին
- «Ամենայն հայոց կաթողիկոսի հեռանալուն այլընտրանք չկա»․ կարծիք
Կալանավորման որոշման մասին
Ընդհանուր իրավասության դատարանի Ավանի նստավայրում Արշակ արքեպիսկոպոսի կալանքի միջնորդությունը քննել է Երևանի քրեական դատարանի դատավոր Մասիս Մելքոնյանը։
Նա բավարարել է միջնորդությունը՝ հոգևորականի նկատմամբ որպես խափանման միջոց կիրառելով երկամսյա կալանքը։
Ամիսներ առաջ նույն դատավորի՝ Մասիս Մելքոնյանի կայացրած որոշումների արդյունքում են կալանավորվել նաև Տավուշի թեմի առաջնորդ Բագրատ Սրբազանը, ապա Շիրակի թեմի առաջնորդ Միքայել Սրբազանը։
Հունիսին, մի քանի օրվա տարբերությամբ ՀՀ-ում քրեական հետապնդում հարուցվեց երկու հոգևորականների՝ Տավուշի և Շիրակի թեմի առաջնորդների նկատմամբ։ Տավուշի թեմի առաջնորդ Բագրատ արքեպիսկոպոս Գալստանյանը մեղադրվում է «ՀՀ-ում ահաբեկչական և իշխանությունը զավթելուն ուղղված գործողություններ» պլանավորելու մեջ։ Շիրակի թեմի առաջնորդ Միքայել արքեպիսկոպոս Աջապահյանը մեղադրվում է «իշխանությունը զավթելուն և սահմանադրական կարգը բռնի տապալելուն ուղղված հրապարակային կոչեր» հնչեցնելու մեջ։
«Այս գործի մեջ իրավագիտություն չկա»
Դեռևս նիստից առաջ փաստաբանները հայտնել էին, որ ակնկալիք չունեն, թե Արշակ Սրբազանը ազատ կարձակվի։ Տեղեկացրել էին՝ նա պատրաստ է միանալ կալանավորված մյուս բարձրաստիճան հոգևորականներին։
Փաստաբան Արսեն Բաբայանի պնդմամբ՝ մեղսագրվող հոդվածը որևէ աղերս չունի նկարագրված փաստական հանգամանքների հետ։
«Քննչականն ինքը արդեն իսկ հերքում է այդ հոդվածը, որովհետև նպատակը [ըստ մեղադրանքի] ոչ թե եղել է թմրամիջոց իրացնելը, այլ թմրամիջոցն ինչ-որ տեղ դնելու միջոցով ինչ-որ անձի վարկաբեկելը»,- պարզաբանել է նա։
«7 տարի անց ճշմարտությունն աղաղակեց իր մասին»
2018 թ․-ին կաթողիկոսի հրաժարականի պահանջով ձևավորված «Նոր Հայաստան, նոր հայրապետ» շարժման նախաձեռնողներից Կարեն Պետրոսյանն «Ազատության» հետ զրույցում մանրամասներ է հայտնել տարիներ առաջ տեղի ունեցածի մասին։
Նրա փոխանցմամբ՝ ոստիկանությունն ահազանգ է ստացել շարժման 18-ամյա օպերատորի պայուսակը ստուգելու մասին։ Սկզբում ոստիկանները պայուսակում «ոչ մի արտառոց բան» չեն գտել, վերադարձրել են այն։ Սակայն կես ժամ անց իրավապահները նորից են խնդրել մոտեցնել պայուսակը, հայտնաբերել են «սպիտակ թղթով փաթաթած ինչ-որ զանգված»։
«Դրանից հետո պարզ դարձավ, որ ինչ-որ մեկն այդ պայուսակի մեջ այդ զանգվածը տեղադրել է, ոստիկաններն էլ անակնկալի եկան։ Ցանկացել էին թմրանյութ տեղադրելու միջոցով շարժման վրա սև հետք թողնել, իբր, շարժման անդամները թմրամոլներ են»,- ասել է Պետրոսյանը։
Նրա գնահատմամբ՝ յոթ տարի կոծկելուց հետո ճշմարտությունն աղաղակեց իր մասին։
«Մեզ համար պարզ է դառնում, թե այդ գործընթացը ինչպես է կազմակերպվել և այդ թմրանյութն ինչպես է հայտնվել այդ պայուսակում։ Այն ժամանակ էլ որոշ սարկավագներ փաստում էին, որ ոստիկանություն կատարած զանգը եղել է դիվանապետի ցուցմամբ»,- նկատել է նա։
Մայր Աթոռ․ «Անհապաղ դադարեցնե՛լ եկեղեցականների ապօրինի հետապնդումները»
Արշակ արքեպիսկոպոս Խաչատրյանի ձերբակալությունն ու կալանավորումը խստորեն դատապարտել է Մայր Աթոռ Սուրբ Էջմիածինը՝ առաջադրված մեղադրանքները որակելով «մտացածին և անհիմն»։
Հայտարարության մեջ նշվում է, որ դիվանապետի կալանավորումը վերջին շրջանում «եկեղեցու նկատմամբ սանձազերծված բռնաճնշումների» արտահայտությունն է և շարունակությունը հոգևորականների նկատմամբ «քաղաքական հետապնդման» գործընթացի․
«Բարձրաստիճան հոգևորականներին շինծու մեղադրանքներով կալանավորելը իշխանության եկեղեցահալած քաղաքականության և եկեղեցականների դեմ ատելության խոսքի հերթական դրսևորումն է»։
Մայր Աթոռը պահանջում է անհապաղ դադարեցնել Արշակ Սրբազանի և ազատազրկված մյուս եկեղեցականների «ապօրինի հետապնդումները», վերականգնել նրանց խախտված իրավունքները։
Հետևեք մեզ — Facebook | Youtube
Արշակ Սրբազանի կալանավորում
