Հայաստանում կներդրվի առողջության համապարփակ ապահովագրության համակարգ
Առողջության ապահովագրության համակարգ Հայաստանում
Մինչև 2027 թվականը Հայաստանում կներդրվի առողջության համապարփակ ապահովագրության համակարգ ողջ բնակչության համար։ Ծրագիրն իրականացվելու է փուլային տարբերակով՝ սկսած այս տարվանից։ Կառավարության՝ փետրվարի 2-ի նիստում գործադիրի անդամները հավանության են արժանացրել հայեցակարգը։
«Մոտ երկու տարի աշխատել ենք Հայաստանի համար հնարավորինս օպտիմալ և իրատեսական ապահովագրական համակարգի մոդել մշակելու համար»,- ընդգծել է առողջապահության նախարար Անահիտ Ավանեսյանը։
Նախարարի բնորոշմամբ՝ սա ամենակարևոր համակարգային բարեփոխումն է, որի ուղղությամբ «գործնական քայլերը անընդհատ հետաձգվել են՝ ավելի լավ ժամանակների ակնկալիքով»։
Որոշման բոլոր մանրամասները
Պատշաճ բուժօգնություն՝ անկախ վճարունակությունից
Ավանեսյանի խոսքով՝ համակարգի ներդրման մասին խոսվել է տասնյակ տարիներ։ Ասում է՝ նման որոշում կայացնելով կառավարությունը հավատարիմ է մնացել իր որդեգրած քաղաքականությանը, այն է՝ «ինստիտուցիոնալ բարեփոխումները պետք է իրականացնել անկախ իրավիճակներից և մարտահրավերներից»։
«Առողջության համապարփակ ապահովագրության համակարգի ներդրումը պայմանավորված է նախևառաջ բժշկական օգնության և սպասարկման անհրաժեշտություն ունեցող յուրաքանչյուր քաղաքացու պատշաճ և ժամանակին ծառայությունների տրամադրման անհրաժեշտությամբ՝ անկախ վճարունակությունից, սեռից, տարիքից, բնակության վայրից»,- հայտարարել է նա։
Նախագծի հիմնավորման մեջ ընդգծվում է, որ ՀՀ բնակչության շուրջ 9%-ի մոտ սպառողական ծախսերի ավելի քան 25%-ը կազմում են առողջապահական ծախսերը։ Վերջիններիս շուրջ 6%-ը աղքատանում է, և դա ամենաբարձր ցուցանիշներից է տարածաշրջանում:
Հետաձգում են բուժումը մինչև «դանակը ոսկորին չի հասնում»
Առողջապահական ոլորտի պատասխանատուի դիտարկմամբ՝ քաղաքացիների մեծ մասն հենց այս կերպ է մոտենում իր առողջական խնդիրներին։ Եվ սա այն դեպքում, երբ կարելի էր կանխարգելել, վաղ հայտնաբերել և ժամանակին տրամադրել անհրաժեշտ օգնություն:
Պատճառն, ըստ նրա, առողջապահական ծախսերի փոխհատուցման ներկայիս «անարդյունավետ մեխանիզմն» է։
«Ստիպված ենք լինում օգտվել շատ ավելի ծախսատար ծառայություններից, և միշտ չէ, որ հնարավոր է լինում ապահովել բուժման բարենպաստ ելքը»,- նշել է Ավանեսյանը։
«Նպատակներն իրագործելու ամենաօպտիմալ տարբերակը»
Գերատեսչությունը որոշել է առողջապահության ապահովագրության համակարգը ներդնել փուլային տարբերակով։ Կարծում են՝ դա «կարճաժամկետ և երկարաժամկետ նպատակները իրագործելու ամենաօպտիմալ տարբերակն է»։
Այս տարի նախապատրաստական փուլն է։ Նախատեսում են վերանայել և ամբողջացնել արդեն իսկ մշակված ծառայությունների փաթեթը, հաստատել գները։
«Դրանք չեն հաշվարկվի մարդկանց եկամուտներից՝ որոշակի տոկոսով, այլ կունենանք հաստատուն ծառայությունների արժեք, կորոշվեն պետության կողմից համաֆինանսավորման չափերը»,- տեղեկացրել է Ավանեսյանը։
2024 թ․-ից պետական պատվերի շրջանակներում բոլոր շահառուները կհավասարեցվեն, նրանց տրամադրվող բոլոր ծառայությունները կլինեն նույնական։ Նույն տարում նախարարությունը կունենա ապահովագրական փաթեթով ամրագրված քաղաքացիների խումբ, կմեկնարկի կամավոր ապահովագրության գործընթացը։ 2025 թ․-ին պետության հոգածության շրջանակում կներառվեն նաև թոշակառուները։
Կամավոր ապահովագրության գործընթացը կշարունակվի մինչև 2027 թ․-ը։ Հայաստանի կառավարությունը նախատեսում է, որ այդ տարի պարտադիր ապահովագրական ծածկույթը կներառի երկրի ողջ բնակչությանը։
Ի՞նչ արդյունք է ակնկալում գործադիրը
Որոշման նախագծի հիմնավորման համաձայն՝ համակարգի ներդրման արդյունքում կառավարությունն ակնկալում է՝
⦁ հիվանդացության և մահացության ցուցանիշների նվազում,
⦁ կյանքի միջին տևողության ավելացում,
⦁ առողջական խնդիրների հետևանքով հաշմանդամություն ունեցող անձանց թվաքանակի նվազում, ինչը կնպաստի մարդկային կապիտալի կայուն զարգացմանը և տնտեսության աճին:
Նշվում է, որ որոշման ընդունման նպատակը բնակչության բոլոր խմբերի համար առողջապահական հիմնական ծառայությունների ֆինանսական հասանելիության ապահովումն է, ինչն էլ, իր հերթին, կապահովի բնակչության առողջության պահպանումը:
Վերազինվելու է առնվազն 50 բժշկական կենտրոն
Այս բարեփոխումը նույնպես գործադիրը պլանավորում է ավարտին հասցնել մինչև 2027 թվականը։ Խոսք է գնում նշված կենտրոնների ամբողջական վերազինման մասին։
«13 բժշկական կենտրոններում շինարարական աշխատանքներ են ընթանում։ Մշակվում են 20 ամբուլատորիաների և 7 բժշկական կենտրոնների կառուցման նախագծեր»- կառավարության նիստի ժամանակ հայտնել է առողջապահության նախարարը։
Հետևեք մեզ — Facebook | Youtube | Telegram
Առողջության ապահովագրության համակարգ Հայաստանում
