Ուկրաինայի ԱԳ նախարար. «Վրաստանի ԵՄ անդամակցության վատ ցուցանիշները թաքնված են Թբիլիսիում, ոչ թե Կիևում»
Անդրեյ Սիբիhայի հայտարարությունը
Ուկրաինայի արտաքին գործերի նախարար Անդրեյ Սիբիhան X-ում գրել է, որ Վրաստանի ԵՄ անդամակցության ճանապարհին խնդիրները պետք չէ կապել Ուկրաինայի հետ․
«Վրացական կողմը չպետք է վիրավորվի հայելու մեջ իր արտացոլանքից։ Վրաստանի ԵՄ անդամակցության գործընթացում վատ արդյունքների բոլոր պատճառները թաքնված են Թբիլիսիում, ոչ թե Կիևում։
Ինչ վերաբերում է Ուկրաինային, մենք միայն մեկ բան ենք մաղթում բարեկամ վրաց ժողովրդին. որ նրանք վերջապես իրականացնեն իրենց եվրոպական ձգտումները՝ չնայած ներկայիս կառավարության քաղաքականությանը։
Վրաստանը Եվրոպա է, ոչ թե «ռուսական աշխարհ»»։
Նախապատմություն
Ուկրաինայի արտաքին գործերի նախարարը սոցիալական ցանցերում տարածել է Liga.net կայքի «Վրաստանը մեղադրում է Ուկրաինային Եվրամիությանը անդամակցելուն խոչընդոտելու մեջ» վերնագրով հոդվածը, որտեղ մեջբերվում է «Վրացական երազանք» կուսակցությունը ներկայացնող Վրաստանի ԱԳ նախարար Մակա Բոճորիշվիլիի հայտարարությունը։
«Վրաստանի Եվրամիությանը ինտեգրման և թեկնածուի կարգավիճակի ձեռքբերման գործընթացը որոշակիորեն ուղեկցվել է Ուկրաինայի կողմից բացասական վերաբերմունքով, որպեսզի Վրաստանը չստանա այդ կարգավիճակը։ Մենք մեր աչքերով տեսանք 2022-2023 թվականներին իրականացված արշավները… Ուկրաինան տարբեր ձևերով դեմ էր դուրս գալիս Վրաստանի եվրոպական ինտեգրմանը։ Սա բացահայտ քայլերին էին, և մենք բոլորս գիտենք դրա մասին»,— ասել է Բոճորիշվիլին լրագրողներին։
Եվրոպական հանձնաժողովի 2025 թվականի ընդլայնման զեկույցի համաձայն՝ Վրաստանի դիրքը ԵՄ ինտեգրման գործընթացում վերջին մեկ տարվա ընթացքում զգալիորեն վատթարացել է։ Փաստաթղթում նշվում է, որ կառավարության որոշումը փաստացի կասեցրել է անդամակցության գործընթացը։
ԵՄ ընդլայնման հանձնակատար Մարթա Կոսի խոսքով՝ Վրաստանը ստացել է՝ կառույցի ողջ պատմության ընթացքում արձանագրված թեկնածու երկրի համար ամենավատ վերջնական գնահատականը։
Հետևեք մեզ — Facebook | Youtube
Անդրեյ Սիբիhայի հայտարարությունը
