Դոնալդ Թրամփի իշխանության գալուց ի վեր առաջին անգամ ԱՄՆ պետդեպարտամենտը մեկնաբանել է Վրաստանում տիրող քաղաքական իրավիճակը։ Այդ մասին հաղորդել է globalnews.ge պարբերականը։
Globalnews.ge-ի լրագրողը Պետդեպարտամենտի մամուլի քարտուղար Թեմմի Բրյուսին հարցեր է ուղղել երկրում տեղի ունեցող իրադարձությունների վերաբերյալ․
«Արդյո՞ք ունեցել եք որևէ հաղորդակցություն Վրաստանի իշխող կուսակցության հետ։ Եվ եթե այո, կարո՞ղ եք մեզ հետ կիսվել, թե ինչպիսին է այժմ ձեր միջև փոխգործակցությունը։ Ինչպես գիտեք, Վրաստանում իրավիճակը շատ բարդ է, վրացի ժողովուրդը և միջազգային հանրությունը չեն ճանաչում [խորհրդարանական] ընտրությունների արդյունքները։ Բողոքի ցույցերի խաղաղ ցուցարարները ձերբակալվել են, մեկ անկախ լրագրող ներկա պահին գտնվում է բանտում։ Հաշվի առնելով այս հանգամանքները՝ ո՞րն է Ձեր կարծիքը Վրաստանում տիրող իրավիճակի մասին»։
Պետդեպարտամենտի ներկայացուցիչը պատասխանել է հետևյալ կերպ․
«Մենք կշարունակենք գնահատել Վրաստանի հանդեպ մեր վարած քաղաքականությունը՝ նպատակ ունենալով առաջ մղել ամերիկյան շահերը։ Միացյալ Նահանգները հստակ մատնանշել է այն քայլերը, որոնք վրացական կառավարությունը կարող է ձեռնարկել՝ ցույց տալու համար իր մտադրությունների լրջությունը ԱՄՆ-ի հետ հարաբերությունները բարելավելու հարցում։
Ինչ վերաբերում է «Վրացական երազանքի» կառավարության շարունակական հակաժողովրդավարական գործողություններին, ինչպես նշել է փոխնախագահ Վենսը Մյունխենում, ժողովրդավարական մանդատը հնարավոր չէ ստանալ ընդդիմադիրներին գրաքննության ենթարկելու կամ բանտարկելու միջոցով, ինչպես նաև անտեսելով հիմնական ընտրազանգվածի դիրքորոշումը այն մասին, թե ով պետք է դառնա մեր ընդհանուր հասարակության մաս։ Միացյալ Նահանգները 33 տարի շարունակ Վրաստանի և վրացի ժողովրդի գործընկերն է և այդ ընթացքում վճռականորեն աջակցել է Վրաստանի անկախությանը, ինքնիշխանությանն ու տարածքային ամբողջականությանը»,- ասված է Պետդեպարտամենտի հայտարարության մեջ, որը հրապարակվել է պարբերականի կողմից։
Ուշագրավ է, որ սա ԱՄՆ նոր վարչակազմի առաջին մեկնաբանությունն է Վրաստանի վերաբերյալ։
Ավելի վաղ՝ 2024 թվականի նոյեմբերի 24-ին, ԱՄՆ Պետդեպարտամենտի կայքում հրապարակվել էր հայտարարություն, որում ընդգծվում էր, որ Վաշինգտոնը դադարեցնում է Վրաստանի հետ ռազմավարական գործընկերությունը՝ «Վրացական երազանքի» հակաժողովրդավարական քայլերի պատճառով։