ԱՄՆ-ն և դաշնակիցները հրթիռային հարված են հասցրել Սիրիային

Ապրիլի լույս 14-ի գիշերն ԱՄՆ-ն, Մեծ Բրիտանիան և Ֆրանսիան հրթիռային հարված են հասցրել Սիրիայում մի քանի թիրախների, հաղորդում է CNN-ը:

ԱՄՆ գլխավորած կոալիցիան որոշում է կայացրել հարված հասցնել մի քանի թիրախների այն բանից հետո, երբ ապրիլի 7-ին սիրիական Դումա քաղաքում ենթադրաբար քիմիական զենք է կիրառվել: ԱՄՆ-ն քիմիական գրոհի պատասխանատվությունը դրել է Բաշար Ասադի զորքերի վրա:

ԱՄՆ նախագահ Դոնալ Թրամփը Ռուսաստանին մեղադրել է Ասադի ռեժիմին աջակցելու համար. «2013թ-ին Ռուսաստանի նախագահ Վլադիմիր Պուտինն ու նրա կառավարությունը համաշխարհային հանրությանը խոստացել էին, որ երաշխավորում են Սիրիայում քիմիական զենքի վերացումը, — ասել է նա: — Ասադի վերջին գրոհն ու այսօրվա պատասխան հարվածները Ռուսաստանի կողմից այդ խոստումը չկատարելու անմիջական հետևանքն են: Ռուսաստանը պետք է որոշի, թե արդյոք նա շարունակելու է այդ կասկածելի և արատավոր ուղով ընթանալ, թե միանալու է քաղաքակիրթ երկրներին որպես կայունության և խաղաղության ուժ»:

Ճգնաժամ Սիրիայում, աշխարհը՝ հանգուցալուծման սպասելիս

Ռուսաստանի պաշտպանության նախարարությունը հայտարարել է, որ կոալիցիան Սիրիայում ավելի քան հարյուր հրթիռ է արձակել: ԱՄՆ պաշտպանության նախարար Ջոն Մեթիսը հայտարարել է, որ այսօրվա հարվածը կրկնակի ավելի հզոր է նախորդից, երբ Ամերիկյան 59 հրթիռ էր արձակել Սիրիայի ուղղությամբ:

Ռուսական հակաօդային պաշտպանության ուժերը չեն գործարկվել ԱՄՆ և դաշնակիցների հարվածները ետ մղելու համար, հաղորդել են Ռուսաստանի պաշտպանության նախարարությունից:

Սիրիական կառավարությունը հայտարարել է այն մասին, որ ընդհանուր առմամբ 110 հրթիռ է արձակվել, դրանց մեծ մասին հակազդել են հակաօդային պաշտպանության սիրիական ուժերը:

ԱՄՆ շտաբերի պետերի միացյալ կոմիտեի նախագահ Ջոզեֆ Դանֆորդը պատմել է, որ հարվածները երեք թիրախների են հասցվել. հետազոտական կենտրոնին, որտեղ մշակվել է քիմիական զենքը, քիմիկատների և քիմիական զենքի պահեստներին:

Դանֆորդն ընդգծել է, որ այս գրոհը մեկանգամյա ակցիա է, որի նպատակն Ասադին հասկացնելն է, որ նա պատասխանատվություն է կրելու Սիրիայում քիմիական զենքի կիրառման յուրաքանչյուր դեպքի համար: