ԱՄՆ-ը Վրաստանին չի տրամադրի նախատեսված 95 մլն դոլարի աջակցությունը
ԱՄՆ-ն դադարեցնում է օգնությունը Վրաստանի կառավարությանը
Օգոստոսի 31-ին պաշտոնական Վաշինգտոնը հայտարարեց, որ կդադարեցնի Վրաստանի կառավարությանը տրամադրվելիք ավելի քան 95 միլիոն դոլարի ֆինանսական օգնությունը։ Ինչպես հայտնում է Reuters-ը, այս որոշումը կայացվել է Վրաստանի և ԱՄՆ-ի միջև երկկողմ համագործակցության վերանայումից հետո, որն իր հերթին պայմանավորված է Վրաստանի կառավարության «հակաժողովրդավարական գործողություններով»։
«Վրաստանի կառավարության հակաժողովրդավարական գործողություններն ու կեղծ հայտարարություններն անհամատեղելի են ԵՄ-ին և ՆԱՏՕ-ին անդամակցելու նորմերի հետ»,— հայտարարել է ԱՄՆ պետքարտուղար Էնթոնի Բլինքենը։
Բլինքենի հայտարարության մեջ նաև ասվում է, որ Միացյալ Նահանգները կշարունակի աջակցել վրաց ժողովրդին օգուտ բերող ծրագրերին և գործողություններին ժողովրդավարության, օրենքի գերակայության և տնտեսական զարգացման ճանապարհով։
«Մայիսի 23-ին՝ Վրաստանի կառավարության հակաժողովրդավարական գործողություններից հետո, ես հայտարարեցի Միացյալ Նահանգների և Վրաստանի միջև երկկողմ համագործակցության համապարփակ վերանայման մասին։ Արդյունքում ԱՄՆ-ը դադարեցնում է ավելի քան 95 միլիոն դոլարի օգնությունը, որը կարող էր օգուտ բերել Վրաստանի կառավարությանը: Վրաստանի կառավարության հակաժողովրդավարական գործողություններն ու կեղծ հայտարարությունները անհամատեղելի են ԵՄ-ին և ՆԱՏՕ-ին անդամակցելու նորմերի հետ։
Թեև այդ գործողությունների պատճառով մենք դադարեցնում ենք օգնությունը Վրաստանի կառավարությանը, Միացյալ Նահանգները կշարունակի աջակցել այն ծրագրերին և միջոցառումներին, որոնք օգուտ են բերում Վրաստանի ժողովրդին ժողովրդավարության, օրենքի գերակայության, անկախ լրատվամիջոցների և տնտեսական զարգացման ամրապնդման ճանապարհով։
Մեր երկու երկրների և մեր քաղաքացիների միջև 32 տարվա բարեկամության և գործընկերության ընթացքում Միացյալ Նահանգների ժողովուրդը նվիրաբերել է ավելի քան 6,2 միլիարդ դոլար՝ նպաստելով Վրաստանի տնտեսության և ժողովրդավարական ինստիտուտների զարգացմանն ու ամրապնդմանը: Մեր աջակցությունն օգնել է վերազինել և վերապատրաստել Վրաստանի պաշտպանության և առափնյա պահպանության ուժերին, կառուցել դպրոցներ և հիվանդանոցներ, ինչպես նաև պատրաստել ուսուցիչներ, պետական պաշտոնյաներ և բժշկական անձնակազմ: Մենք հավատարիմ կմնանք վրաց ժողովրդին և նրա եվրատլանտյան ձգտումներին»,— ասված է Բլինքենի հայտարարության մեջ։
_________________
Մայիսի 23-ին Էնթոնի Բլինքենը հայտարարեց վիզային սահմանափակումների նոր քաղաքականության մասին, որը տարածվելու է այն անձանց վրա, ովքեր պատասխանատու են Վրաստանում «օտարերկրյա գործակալների մասին» օրենքի ընդունման և Վրաստանի ու Միացյալ Նահանգների միջև համագործակցության վերանայման համար:
Վիզայի սահմանափակումները վերաբերում են նաև այն անձանց, ովքեր պատասխանատու են քաղաքացիական հասարակության հանդեպ բռնության և ահաբեկման, ինչպես նաև խաղաղ ցույցերը ճնշելու համար։
Հուլիսի 5-ին ԱՄՆ պաշտպանության նախարարությունը հայտարարեց, որ Noble Partner վրաց-ամերիկյան համատեղ զորավարժությունները, որոնք նախատեսված էին հուլիսի 25-ից օգոստոսի 6-ը, հետաձգվել են անորոշ ժամանակով։ Այս որոշումն ընդունվեց այն բանից հետո, երբ ԱՄՆ-ը նախաձեռնեց Վրաստանի հետ երկկողմ հարաբերությունների վերանայում։
Հուլիսի 31-ին մի քանի ամերիկացի կոնգրեսականներ նամակ են հղել Էնթոնի Բլինքենին՝ պահանջելով ֆինանսական պատժամիջոցներ սահմանել իշխող «Վրացական երազանք» կուսակցության հիմնադիր Բիձինա Իվանիշվիլիի նկատմամբ։
