ԱՄՆ նախագահը Բալթյան երկրներին ռազմական աջակցություն և ամերիկյան գազ է խոստացել

ԱՄՆ նախագահ Դոնալդ Թրամփը հանդիպել է Լատվիայի, Լիտվայի և Էստոնիայի նախագահներ Ռայմոնդս Վեյոնիսի, Դալյա Գրիբաուսկայտեի և Կերստի Կալյուլայդի հետ և համատեղ մամուլի ասուլիս անցկացրել, հաղորդում է The New York Times-ը:

Բալթյան երկրների ղեկավարներն ակնկալում էին Վաշինգտոնում քննարկել ռուսական սպառնալիքն ու դրա դեմ պայքարի մեթոդները: Դալյա Գրիբաուսկայտեն գագաթնաժողովից մի քանի օր առաջ Լիտվայի լրատվամիջոցներին տված հարցազրույցում հայտնել է. «Հույս ունեմ, որ ԱՄՆ-ն և մեր մյուս դաշնակիցները հասկանում են, որ Բալթիայի երկրների օդային տարածքը պաշտպանության կարիք ունի: Կարևոր է, որպեսզի ամերիկյան զորքերը մեր երկրներում ներկայացված լինեն»:

Ռուսաստանի պոտենցիալ ագրեսիայի հետ կապված Բալթյան երկրների վախերն առաջացել են 2014թ-ին՝ այն բանից հետո, երբ Ռուսաստանը բռնակցել է Ղրիմն ու պատերազմ սանձազերծել Ուկրաինայի արևելքում: 2016թ-ին համաձայնագիր է ընդունվել, որի համաձայն՝ ՆԱՏՕ-ի ոչ մեծ ռազմական կոնտինգենտը պետք է ներկայացված լինի Մերձբալթիկայում մշտական հիմքի վրա: Խոսքը գնում է Կանադայից, Մեծ Բրիտանիայից, Գերմանիայից և ԱՄՆ-ից 4 հազար զինվորի մասին:

Փորձագետներն ակնկալում էին, որ Վաշինգտոնի հանդիպմանը խոսք կգնա Մերձբալթիկայում ՆԱՏՕ-ի զորքերի թվաքանակի ավելացման մասին: Սակայն Բալթյան երկրների առաջնորդներն այս թեման չարծարծեցին:

Դոնալդ Թրամփն ընդգծել է, որ շատ շնորհակալ է Լատվիային, Լիտվային և Էստոնիային, որ նրանք հետևում են այն կանոնին, որի համաձայն՝ ՆԱՏՕ-ի անդամ երկրները պարտավոր են դաշինքին վճարել իրենց ՀՆԱ երկու տոկոսը:

Հանդիպման արդյունքներից մեկն եղել է համաձայնագիրն այն մասին, որ ԱՄՆ-ն Բալթյան երկրներին 100մլն դոլար կհատկացնի զինամթերք գնելու համար և 70մլն դոլար՝ զինվորականներին սովորեցնելու համար:

Լիտվայի նախագահ Դալյա Գրիբաուսկայտեն հայտարարել է, որ գագաթնաժողովի ժամանակ իր երկրին ամերիկյան գազի մատակարարման մասին երկու համաձայնագիր է ստորագրվել: Դա թույլ կտա նվազեցնել Լիտվայի կախվածությունը ռուսական գազի մատակարարումից: