ԱՄՆ դեսպան. հսկիչ անցակետի փակման հարցը մենք կբարձրացնենք ԵԱՀԿ և

Վրաստանում ԱՄՆ դեսպան Յան Քելլին հունվարի 26-ին այցելել է Աբխազիայի՝ Ինգուր գետի երկայնքով, Խուրչա-Նաբակևի և Օրսանտիա-Օտոբայա հատվածներովանցնող վարչական սահմանը: Դիվանագետը տեղում ծանոթացել է սահմանային հսկիչ անցակետերը փակելու Սուխումի որոշման հետ կապված իրավիճակին: Յան Քելլին անհանգստություն է արտահայտել այդ փաստի առթիվ: Նրա խոսքով, անցակետի փակումը կսահմանափակի տեղացիների տեղաշարժվելու հնարավորությունը:

«Մենք չենք ճանաչում Աբխազիայի անկախությունը, հետևաբար, չենք ճանաչում ոչ մի գիծ, վարչական սահման և ոչ մի անցակետ: ԱՄՆ կառավարության դիրքորոշումը կայանում է նրանում, որ Վրաստանը գոյություն ունի միջազգայնորեն ճանաչված իր սահմանների շրջանակում: Ինչ վերաբերում է այդ որոշումը (անցակետերի փակման) փոխելու մեխանիզմներին, ապա մենք այդ հարցերը կբարձրացնենք ԵԱՀԿ շրջանակում: Բնականաբար, նաև Ժնևյան բանակցություններին», — հայտարարել է Քելլին վրացական Ռուսթավի-2 հեռուստաընկերության հետ զրույցում:

Սահմանային անցակետերի մեծ մասը փակելու վերաբերյալ աբխազական իշխանությունների որոշմանն արձագանքեց ՄԱԿ մշտական համակարգող, Վրաստանում ՄԱԿ զարգացման ծրագրի մշտական ներկայացուցիչ Նիլ Սքոթը: Ինչպես ասված է նրա տարածած հայտարարությունում, Խուրչա-Նաբակևի և Օրսանտիա-Օտոբայա անցակետերի փակումը բացասաբար կանդրադառնա սահմանամերձ գյուղերի բնակչության վրա և կնպաստի դրա մեկուսացմանը:

ՄԱԿ համակարգողը կոչ է արել բոլոր կողմերին ապահովել մարդու իրավունքների պաշտպանությունը և դիտարկել այդ որոշման հնարավոր հետևանքները:

Վրացական կողմը պատրաստվում է իրավիճակի մասին տեղեկացնել միջազգային հանրությանը:

«Մենք բոլոր կողմերի և գործընկերների հետ կապի մեջ ենք և անում ենք ամեն ինչ, որ մարդկանց տեղաշարժվելու հնարավորությունը չսահմանափակվի: Սահմանը փակելու դեպքում տեղի բնակչության համար ծանր հումանիտար մարտահրավեր կստեղծվի: Վրաստանի իշխանությունների վերաբերմունքը սահմանի փակմանը միանշանակ բացասական է», — հայտարարել է հաշտեցման և քաղաքացիական իիրավահավասարության հարցերով պետնախարար Քեթևան Ցիխելաշվիլին:

Ընդդիմությունն ուշացած է համարում կառավարության արձագանքն ու կոչ է անում իշխանություններին ժամանակին տեղյակ պահել գործընկերներին և դաշնակիցներին:

«Անցակետերի փակումն անպայման պետք է բողոքարկվի բոլոր դիվանագիտական մակարդակներում: Սակայն վրացական դիվանագիտական առաքելությունները բավականին պասիվ են», — հայտարարել է «Ազգային շարժման» ներկայացուցիչ Նիկա Ռուրուան:

Սուխումի որոշմամբ, վարչական սահմանին փակվել է վեցից չորս անցակետ: Աբխազիայի իշխանությունները պատրաստվում են միայն մեկ գործող անցակետ թողնել՝ Ինգուրի կամրջի անցակետը: Դրա պատճառով բնակիչներից շատերի մոտ խնդիրներ կառաջանան, քանի որ վրացական կողմ տեղափոխվելու համար այսուհետ պետք է լրացուցիչ տասնյակ կիլոմետրեր հաղթահարել:

Հոդվածում արտահայտած կարծիքները փոխանցում են հեղինակի տերմինաբանությունն ու հայացքները և պարտադիրչէ, որ խմբագրության դիրքորոշումն արտացոլեն: