«Աղջիկներ, դուք հիվանդ եք», — ասել է Սերգեյ Լավրովը վրացի լրագրողներին

Ռուսաստանի արտգործնախարար Սերգեյ Լավրովը վրացի լրագրողներին հիվանդ է անվանել։ Իսկ ԱԳՆ պաշտոնական ներկայացուցիչ Մարիա Զախարովան՝ մեմ և «արժանապատվությունը կորցրած կանայք»։

Վրացական լրատվամիջոցների ներկայացուցիչների հանդիպումը ռուսական պատվիրակության հետ տեղի է ունեցել Ժնևում։ Լրագրողները փորձել են պարզել, թե արդյոք Լավրովը մայիսին Թբիլիսի է գալու Եվրախորհրդի նախարարների կոմիտեի նիստին։

«Դուք հիվանդ եք, աղջիկներ», — հայտարարել է Լավրովը Հանրային հեռարձակողի և «Իմեդի» հեռուստաընկերության թղթակիցներին։

Դրանով պատմությունը չի ավարտվել։ Որոշ ժամանակ անց ՌԴ ԱԳՆ պաշտոնական ներկայացուցիչ Մարիա Զախարովան ֆեյսբուքյան իր էջում գրել է, որ վրացի լրագրողները հարձակվել են ռուսական պատվիրակության վրա։ Նա հրապարակել է նաև ձեռքի քերծվածքների լուսանկարները՝ նշելով, որ տուժել է վրացի լրագրողների գրոհից։

2020 թ–ի մայիսի 14-15–ին Վրաստանը՝ որպես Եվրախորհրդի նախագահող երկիր, կազմակերպելու է Եվրախորհրդի նախարարների կոմիտեի 130-րդ հանդիպումը։ Դրան ավանդաբար մասնակցում են արտգործնախարարները։ Ռուսաստանը Եվրախորհրդի անդամ է։ Հետևաբար, Սերգեյ Լավրովի ժամանման հարցը պատահական չի առաջացել՝ հաշվի առնելով Մոսկվայի և Թբիլիսիի բարդ հարաբերությունները։ Արդյո՞ք պաշտոնական Թբիլիսին կընդունի նրան, քանի որ ռուս նախարարը բազմիցս խախտել է 2008 թ–ի պատերազմից հետո ընդունված «Օկուպացված տարածքների մասին» վրացական օրենքը և առանց վրացական իշխանություններին տեղյակ պահելու այցելել Վրաստանի վերահսկողությունից դուրս եկած Աբխազիա և Հարավային Օսիա։

Հիշեցնենք, որ Վրաստանի և Ռուսաստանի միջև դիվանագիտական հարաբերությունները խզվել են 2008 թ–ի օգոստոսյան պատերազմից և Ռուսաստանի կողմից Աբխազիայի և Հարավային Օսիայի ինքնիշխանության ճանաչումից հետո։ Սերգեյ Լավրովի մակարդակի ռուս պաշտոնյաներ Վրաստան չեն այցելել արդեն 12 տարի։

Լուսանկարն՝ Ալեքսանդր Շչերբակի /ՏԱՍՍ