Աղջիկների շրջանում ինքնասպանության դեպքերի կտրուկ աճ Ադրբեջանում․ ո՞րն է պատճառը

Միայն վերջին մեկ շաբաթվա ընթացքում Ադրբեջանում երեք աղջիկ է կյանքին վերջ տվել։ Եվս երկու դեպքերում ինքնասպանության փորձերը հաջողվել է կանխել։ Թեման միանգամից դարձել է ամենաքննարկվողը սոցցանցերում։ Ո՞րն է Ադրբեջանում աղջիկների շրջանում ինքնասպանության դեպքերի կտրուկ աճի պատճառը։

• Վրաստանում 8 ամսում գրանցվել է երեխաների նկատմամբ դաժան վերաբերմունքի 1 146 դեպք
• Կորոնավիրուսն ու ինքնասպանությունը
• Կարանտինն Ադրբեջանում․ ինքնասպանություն, ոստիկանության կողմից սեռական ոտնձգություն և այլ հետևանքներ

Ցած է նետվել քսաներորդ հարկից

Ամեն ինչ սկսվել է նրանից, որ 20-ամյա Սևիլ Աթաքիշիևան մահացել է՝ ցած նետվելով երկնաքերի 20-րդ հարկի բնակարանի պատուհանից։

Այս նորությունն իրարանցում է առաջացրել սոցցանցերում․ աղջիկը Ֆեյսբուքի ակտիվ օգտատեր է եղել և ընկերություն է արել Ադրբեջանի երիտասարդ ակտիվիստներից շատերի հետ։

Միանգամից ի հայտ են եկել մահացածի գրառումները, որոնք նա արել է որպես մեկնաբանություն։ Սևիլը դրանցում բողոքում է ծնողների կողմից գործադրվող ճնշումից և ակնարկում հնարավոր ինքնասպանության մասին։

Աղջկա հայրը հերքում է

Սևիլի մահվան երրորդ օրը միանգամից երեք հեռուստաալիք հարցազրույց է վերցրել նրա հորից, որի գործողություններում սոցցանցերի օգտատերերը նշմարել են գլխավոր պատճառը։

«Որպես հայր՝ ես իրավունք եմ ունեցել բղավել նրա վրա, երբ պետք է։ Իսկ ի՞նչ անեի, փողոց թողնեի, որ փողոցայի՞ն դառնար։ Բոլորիս վրա էլ գոռացել են, երբ փոքր ենք եղել։ Չկա այդպիսի մարդ, որի վրա ծնողները բղաված չլինեն», — ասել է նա իր հարցազրույցում։

Ճիշտ է, Սևիլի մայրը լրագրողներին պատմել է հոր կողմից դստերը ծեծելու փաստերի մասին։

Ֆեմինիստն ու դատախազության հետաքննությունը

«Չեմ կարող հստակ ասել, թե ինչ պատճառով է Սևիլն ինքնասպանության դիմել։ Սակայն դրանում մեծ է եղել նրա նկատմամբ ֆիզիկական ճնշման և հոգեբանական տեռորի դերը։

Նա ուզում էր մեկնել երկրից՝ կրթություն ստանալու, փող էր հավաքում, նույնիսկ պատրաստվում էր ֆիկտիվ ամուսնություն գրանցել՝ ընտանիքում ճնշումներից ազատվելու համար։ Ըստ երևույթին՝ պլանները չեն հաջողվել, ինչը է՛լ ավելի է վշտացրել նրան։

Սևիլն իր հաղորդագրությունում նշում է․ «Եթե ինձ հետ որևէ բան պատահի, նկատի ունեցեք այս մեսիջները»։

Կատարում եմ նրա խնդրանքը, սակայն տանջվում եմ նրանից, որ չեմ կարողացել տեղյակ լինել նրա ապրումների մասին, երբ Սևիլը դեռ ողջ էր», — ֆեյսբուքյան իր էջում գրել է ֆեմինիստ Գյուլնարա Մեհթիևան։

Սոցցանցերում նրա տեղադրած սքրիններն արդեն հաջորդ օրը քրեական գործի նյութ են դարձել, որը հարուցվել է դատախազությունում Սևիլ Աթաքիշիևայի մահվան փաստով։

Ինքնասպանության դեպքերի կտրուկ աճ աղջիկների շրջանում

Աթաքիշիևայի մահվան հաջորդ օրն ինքնասպանություն է գրանցվել Բաքվից ոչ հեռու գտնվող Սումգայիթում։ Ծովում խեղդամահ է եղել 20-ամյա Վուսալա Ռագիմլին։ Ուսանողուհու մահվան պատճառը դեռ պարզ չէ։

Աղջիկը Սումգայիթում ապրել է հորեղբոր տանն ու սովորել այդ քաղաքում։ Նա ծնունդով Ադրբեջանի հարավային շրջանում գտնվող Յարդիմլի քաղաքից է։

Բաքվի արվարձաններից մեկում բազմաբնակարան շենքի ութերորդ հարկի պատուհանից ցած է նետվել 20-ամյա Ֆիդան Իսմայիլզադեն։ Նա տեղում մահացել է։ Մահվան պատճառները նույնպես հայտնի չեն։

Եվս երկու չստացված փորձ

Մինգեչաուր քաղաքի 19-ամյա բնակիչ Ամիլա Լատիֆովան Կուր գետն է նետվել ինքնասպանության նպատակով։ Նրան փրկել են արտակարգ իրավիճակների նախարարության աշխատակիցները։

Բաքվի ինը հարկանի շենքի տանիքում ոստիկաններին հաջողվել է կանխել ևս մեկ աղջկա ինքնասպանության փորձ։

Ո՞րն է պատճառը

Ըստ հոգեբան Ջամալա Ռագիմլիի՝ երեխային չի կարելի ծեծել, և պետք է խնայել նրա հոգեկան առողջությունը։ «Եթե մենք կարողանանք հաղթահարել այս պատնեշը, կարող ենք սկսել խոսել հոգեբանական բռնության մասին», — նշում է նա։

«Հոգեբանական բռնությունը վարքի տեսակ է, և, իհարկե, նման պահվածքը բնորոշ է ոչ միայն ծնողներին։ Սակայն ամենածանրն այն հոգեբանական ճնշումն է, որը գործադրում են հենց ծնողները։

Եթե դուք նույնպես ասում եք «երեխայիս համար անում եմ ամեն ինչ, նա ամեն ինչով ապահովված է, բայց, միևնույն է, ես նրան դուր չեմ գալիս, նա չի խոսում հետս, դուրս չի գալիս իր սենյակից, միակ ցանկությունն այլ երկիր տեղափոխվելն է, նույնիսկ ընկերներ կամ սիրած էակ չունի», ապա տարիներով բռնություն եք գործադրում՝ անգամ չծեծելով, սովի չմատնելով։ Դա ընդամենն այն բանի լուռ արտահայտումն է, ինչը ձեր երեխան չի կարողանում ասել», — գրել է Ռագիմլին ֆեյսբուքյան իր էջում։