Ադրբեջանցի պատգամավորը հրաժարվել է մանդատից սկանդալից հետո․ նա պարտքով 300 հազար դոլար է վերցրել, պատգամավորի վկայականը գրավ թողնելով

Ադրբեջանական խորհրդարանի պատգամավոր Ռաֆայել Ջաբրայիլովը հրաժարվել է մանդատից սկանդալային պատմությունից հետո․ նա 300 հազար դոլարի պարտք էր վերցրել՝ որպես գրավ թողնելով իր պատգամավորական վկայականը, իսկ պարտքն այդպես էլ չէր վճարել։ Բացահայտվել է նրա մասնակցությամբ ևս մեկ խարդախության դեպք։ 

• Թե ինչպես են հարստացել վրացի պաշտոնյաները

• Ամուսնությունը որպես կողոպուտի ձև Թուրքիայում

Սակայն իշխանությունները կարծում են, որ նման դեպքեր տեղի են ունենում ամենուր, իսկ չարակամներն օգտվում են իրավիճակից՝ Ադրբեջանին սևացնելու համար։

Ո՞վ է Ռաֆայել Ջաբրայիլովն ու ի՞նչ է տեղի ունեցել նրա մանդատի հետ

Ռաֆայել Ջաբրայիլովն իշխող «Ենի Ազերբայջան» կուսակցության պատգամավոր է։ Հանրությունը նրան հիշում է որպես Ադրբեջանում «սպերմայի բանկի» ստեղծման մոլի հակառակորդ։

Բացի այդ, խորհրդարանական ընտրություններին նա ընտրատարածքում մրցակցում էր «ՌԵԱԼ» ընդդիմադիր շարժման առաջնորդ Իլգար Մամեդովի հետ։

2015թ-ին Ռաֆայել Ջաբրայիլովը Թարանա Ֆաթալիևա անունով մի կնոջից պարտքով 300 հազար դոլար էր վերցրել՝ տուն կառուցելու համար։ Որպես գրավ նա թողել էր իր պատգամավորական վկայականը։

2019թ-ի փետրվարին, հասկանալով, որ պատգամավորը չի պատրաստվում վերադարձնել պարտքը, Ֆաթալիևան դատի էր տվել նրան և շահել դատը։

Այդ պատմությունն արագ տարածվել էր մամուլում և սկանդալ էր առաջացրել խորհրդարանում։ Մինչ խորհրդարանականները որոշում էին, թե ինչպես վարվել, ևս մեկ մարդ է բողոքել, որ 2014թ-ին Ջաբրայիլովը իրենից խաբեությամբ 240 հազար դոլար է ստացել։

Չնայած դրան՝ Ռաֆայել Ջաբրայիլովի պատգամավորական լիազորություններն իշխանությունները չէին շտապում կասեցնել։ Արդյունքում, նա ինքը չի ներկայացել 2019թ-ի սեպտեմբերի 30-ի խորհրդարանի աշնանային նստաշրջանի առաջին լիագումար նիստին։ Իր գործընկերոջ միջոցով Ռաֆայել Ջաբրայիլովը հայտարարություն է փոխանցել, որում հաղորդել է, որ վայր է դնում պատգամավորական լիազորություններն ու ներողություն խնդրում իր ընտրողներից։ 

Իշխանությունների արձագանքը

«Ռաֆայել Ջաբրայիլովի հետ կապված հարցը լուծում է գտել իրավաբանական հարթությունում։ Նրան մամուլում և խորհրդարանում քննարկելու անհրաժեշտություն չկա։ Նման իրադարձություններ տեղի են ունենում ողջ աշխարհում, հրաժարականի մշակույթը համատարած է», — այսպես է կատարվածը մեկնաբանել «Ենի Ազերբայջան» կուսակցության գործադիր քարտուղարի տեղակալ Սիավուշ Նովրուզովը։

Միաժամանակ նա հավելել է, որ այս իրավիճակից օգտվում են որոշ «անձինք, որոնք արտասահմանում նստած հակաադրբեջանական պրոպագանդա են անում»։