Ադրբեջանցի ընդդիմադիր գործիչը բանտում արդեն 8-րդ օրն է, ինչ հացադուլ է անում

Ադրբեջանական «Ժողովրդական ճակատ» ընդդիմադիր կուսակցության անդամ Ֆիզուլի Հուսեյնովը ձերբակալվել է Բաքվում հունիսի 14-ին միայնակ ակցիայից հետո։ Նա 10 օրվա կալանքի է դատապարտվել Վարչական օրինազանցությունների մասին օրենսգրքի 535.1 հոդվածի համաձայն (ոստիկանության օրինական պահանջներին չենթարկվելը):

Իր միայնակ ակցիան Հուսեյնովը նվիրել է Իլգար Մամեդովի ծննդյան օրվան, որը «Հանրապետական այլընտրանք» ընդդիմադիր կուսակցության առաջնորդն է և 7 տարվա ազատազրկման է դատապարտվել: «Զինվելով» ընդդիմադիր գործընկերոջ դիմանկարով՝ Հուսեյնովը պահանջել է նրան ազատ արձակել:

Ձերբակալումից անմիջապես հետո Ֆիզուլի Հուսեյնովը հացադուլ է հայտարարել, որը շարունակում է մինչ օրս՝ մեկ շաբաթից ավել:

Ինչպես Turan գործակալությանը հաղորդել է ձերբակալվածի փաստաբան Ջավադ Ջավադովը, հինգերորդ օրը Հուսեյնովի ինքնազգացողությունը վատացել է: Նա շատ թույլ է և գունատ, սակայն շարունակում է հացադուլը՝ չնայած իր վիճակին և փաստաբանի հորդորներին:

Ֆիզուլի Հուսեյնովը վարչական կալանքների և հացադուլի փորձ արդեն ունի: Նախորդ տարվա հոկտեմբերին, երբ երկարատև հացադուլի հետևանքով նրա առողջական վիճակը կտրուկ վատթարացավ, ոստիկանությունը փորձեց նրան հոգեբուժարան ուղարկել: Սակայն փորձաքննությունը Հուսեյնովին մեղսունակ ճանաչեց: Արդյունքում՝ նա դադարեցրեց հացադուլը միայն այն ժամանակ, երբ այդ մասին խնդրեցին ընդդիմության առաջնորդները: