Բաքվում դանակահարության մեղադրանքով նախկին դիվանագետ է ձերբակալվել
Ադրբեջանում նախկին դիվանագետ է ձերբակալվել
Ոստիկանությունը բերման է ենթարկել նախկին դիվանագետ և ակտիվիստ Էմին Իբրահիմովին։ Նա մեղադրվում է իր հետ, իբր, վիճաբանած տղամարդուն դանակահարելու մեջ։ Ինքը՝ Իբրահիմովը, հերքում է մեղադրանքը և կարծում է, որ իրեն պատժում են իշխանությունների հասցեին արած քննադատական հայտարարությունների համար։
- «ԵՄ որոշումները լավ հեռանկարներ են բացում Հայաստանի համար»․ հայ քաղաքագետ
- Հայաստանը կմասնակցի՞ Բաքվում կայանալիք COP 29-ին․ կարծիք Երևանից
- CRRC. Հարցվածների 69%-ը կարծում է, որ Վրաստանի գլխավոր թշնամին ՌԴ-ն է
Էմին Իբրահիմովի հարազատները հայտնել են, որ հուլիսի 22-ին՝ երեկոյան ժամերին, նա զանգահարել է տուն և հայտնել, որ գտնվում է Բաքվի Նիզամիի շրջանային ոստիկանության բաժանմունքում։
«Նա ասաց, որ իրեն բերման են ենթարկել, իբր, ինչ-որ մեկին դանակահարելու գործով։ Էմինն ասաց, որ դա ճիշտ չէ»,- նշել են Իբրահիմովի հարազատները։
Տեղեկությունը հաստատել է նաև նրա փաստաբան Ագիլ Լայիջը։ Իբրահիմովը նրան պատմել է, որ անցած գիշեր մետրոյի «Խալգլար Դոստլուգու» կայարանի մոտ անհայտ անձը հարձակվել է իր վրա և անմիջապես հայտնվել են քաղաքացիական հագուստով մարդիկ։ Նրանք Իբրահիմովին բերման են ենթարկել և տարել Բաքու քաղաքի Նիզամիի շրջանային ոստիկանության բաժանմունքի 24-րդ բաժին։
«Էլեկտրոշոկեր են կիրառել, որպեսզի նա տրամադրի իր հեռախոսի կոդը»,- պատմել է փաստաբանը։
ՆԳՆ մամուլի ծառայությունից Turan գործակալությանը հայտնել են, որ 1981 թվականին ծնված Էմին Իբրահիմովը անձնական վիճաբանություն է ունեցել 1987 թվականին ծնված քաղաքացու հետ։
«Արդյունքում Էմին Իբրահիմովը դանակով մարմնական վնասվածք է հասցրել մի քաղաքացու։ Իբրահիմովը բերման է ենթարկվել, տուժածը տեղափոխվել է հիվանդանոց»,- հավելել են ՆԳՆ-ից։
Էմին Իբրահիմովի դեմ քրեական գործ է հարուցվել Ադրբեջանի քրեական օրենսգրքի 126.1 (դիտավորությամբ առողջությանը ծանր վնաս պատճառելը) հոդվածով: Այս մեղադրանքով նրան սպառնում է 3-8 տարվա ազատազրկում։
Քաղաքացիական հասարակության ներկայացուցիչների դիտարկմամբ՝ Էմին Իբրահիմովին կարող էին զրպարտել իր կոշտ հայտարարությունների համար։ Այդ կարծիքին է նաև Քաղաքական կառավարման ինստիտուտի տնօրեն Ազեր Գասիմլին։
«Հալածանքները շարունակվում են։ Այսօր ձերբակալվել է նախկին դիվանագետ, ԱՄՆ-ում Ադրբեջանի դեսպանատան քարտուղար, Ուրուգվայում դեսպանատան գործերի ժամանակավոր հավատարմատար Էմին Իբրահիմովը։ Էմին Իբրահիմովը մեր երկրի ամենապարկեշտ ու ազնիվ մարդկանցից մեկն է։ Ոստիկանության ներկայացուցիչները կեղծ տեղեկություններ են տարածում, սակայն ոչ ոք դրանց չի հավատում:
Էմին Իբրահիմովն այն քիչ ազնիվ մարդկանցից է, ովքեր համարձակություն ունեն բարձրաձայնելու այն ամենն, ինչ այսօր կատարվում է մեր երկրում։ Հանցագործները նրանք են, ովքեր պատվիրել են պատժել նրան, զրպարտել ու ձերբակալել»,- սոցցանցում գրել է Ազեր Գասիմլին։
Անցած սեպտեմբերին Իբրահիմովը դատապարտվել էր 30-օրյա վարչական կալանքի։ Նա իր ձերբակալությունը կապել էր սոցիալական ցանցերում արած գրառումների հետ։ Ակտիվիստի խոսքով՝ ինքը պատժվել է իր այն գրառման համար, որ «պատերազմը քաղաքականություն է, որն աշխատում է Ռուսաստանի օգտին»։
Էմին Իբրահիմովը 2002 թվականին ավարտել է Բաքվի պետական համալսարանի միջազգային հարաբերությունների ֆակուլտետը։ 2005 թվականին Անկարայի համալսարանում ստացել է միջազգային հարաբերությունների մագիստրոսի կոչում։ 2009 թվականին ավարտել է ՆԱՏՕ-ի պաշտպանական քոլեջի խորացված կուրսը։
2007-2020 թվականներին եղել է դիվանագիտական ծառայության մեջ։ 2012-2016 թվականներին աշխատել է ԱՄՆ-ում Ադրբեջանի դեսպանատանը, 2016-2019 թվականներին՝ Ուրուգվայում Ադրբեջանի դիվանագիտական ներկայացուցչությունում։ Այնուհետև դուրս է եկել դիվանագիտական ծառայությունից։ Վերջին տարիներին նա սուր քննադատության է ենթարկել Ադրբեջանի իշխանություններին, այդ թվում, ինչպես ինքն է ասում, Արևմուտքի հետ հարաբերությունների վատթարացման համար։
