Ադրբեջանում լրատվական հեռուստաալիք է գործարկվել

Ադրբեջանում մարտի 15-ին արբանյակային հեռարձակում է սկսել Real TV նոր հեռուստաալիքը: Այն մասնագիտանալու է զուտ լրատվական հեռարձակման վրա: Real TV-ի հիմնադիրն ու ղեկավարը հայտնի լրագրող, ANS մեդիաընկերությունների խմբի նախկին փոխնախագահ Միրշահին Աղաևն է:

Մարտի 5-ին Հեռուստատեսության և ռադիոյի ազգային խորհուրդն անժամկետ արբանյակային հեռարձակման լիցենզիա է տրամադրել Real TV-ին: Հեռարձակման լիցենզիան տրամադրվել է «Իրական վերլուծության տեղեկատվական կենտրոն» ԲԲԸ կողմից, որի տնօրենն է Միրշահին Աղաևը:

Այդ նույն օրը հետաքննող լրագրող Խադիջա Իսմայիլը Ֆեյսբուքում գրառում է կատարել, որում նոր հեռուստաընկերության և նախագահ Ալիևի ընտանիքի ղեկավարած «Էքսպրես բանկի» միջև կապի անուղղակի ապացույցներ է բերել:

Նոր հեռուստաալիքում աշխատելու են ANS փակ ընկերության նախկին աշխատողներից շատերը, սակայն նրանց թվում չի լինելու ANS-ի հիմնադիր և նախագահ Վահիդ Մուստաֆաևը:

• ANS անկախ մեդիաընկերությունը հիմնադրվել է 1991թ-ի նոյեմբերին Վահիդ և Սեյֆուլա Մուստաֆաև եղբայրների և լրագրող Միրշահին Աղաևի կողմից:
• ANS հեռուստաալիքը զրկվել էր հեռարձակման լիցենզիայից 2016թ-ի հուլիսի 18-ին թուրք քաղաքական գործիչ Ֆեթուլլահ Գյուլենի հետ հարցազրույցի անոնսից հետո, որին մեղադրում են Թուրքիայում պետական հեղաշրջման փորձի համար: Ավելի ուշ դատարանը որոշում կայացրեց ամբողջ մեդիահոլդինգի փակման մասին:
• Հսկայական պոպուլյարություն ANS-ը ձեռք բերեց ղարաբաղյան պատերազմի տարիներին, երբ դրա թղթակից Չինգիզ Մուստաֆաևը (ընկերության հիմնադրի ավագ եղբայրը) լուսաբանում էր պատերազմական իրադարձություններն ու զոհվեց ճակատում 1992թ-ին: