ԱԺ «Պատիվ ունեմ» խմբակցության պատգամավոր Տիգրան Աբրահամյանի խոսքով՝ զինված ուժերի բարեփոխումներն ուշանում են։ Նրա գնահատմամբ՝ Հայաստանի անվտանգության համակարգում իրականացվող աշխատանքներն այս պահին բավարար չեն։ Ընդդիմադիր պատգամավորը նման տեսակետ է հայտնել հոկտեմբերի 8-ին խորհրդարանում կայացած ճեպազրույցի ժամանակ։
Աբրահամյանը նոր է վերադարձել Սյունիքի մարզից։ Ասում է՝ Ադրբեջանը սահմանի՝ իր վերահսկողության տակ գտնվող հատվածներում ակտիվ շինարարական աշխատանքներ է իրականացնում․
«Ակնհայտ է, որ Սյունիքում ստեղծված անվտանգային սպառնալիքները, ռիսկերը դեռևս շարունակվում են պահպանվել։ Ադրբեջանը սահմանի՝ իր վերահսկողության տակ գտնվող հատվածներում բավականին ակտիվ շինարարական աշխատանքների մեջ է, որոնք ունեն և՛ ռազմական, և՛ քաղաքացիական նշանակություն»։
Պատգամավորի դիտարկմամբ՝ մտահոգիչ են նաև Արցախից բռնազավթված հատվածներում ադրբեջանցիների ամրացումները։ Տիգրան Աբրահամյանն ասում է՝ դիրքերի ամրացումներ են արվում, տեղակայվում են սահմանապահ զորամասեր։ Պատգամավորը պարզաբանում է, որ այս դեպքում սահմանապահ ասելով նկատի չունենք խաղաղ պայմաններում հերթապահություն իրականացնողների․
«Ադրբեջանի սահմանապահ զորքերը համալրված են սկսած ավիացիայից, տարբեր նշանակության անօդաչու սարքերով, այդ թվում՝ հարվածային, ծանր հրետանի և այդպես շարունակ»։
Ընդդիմադիր պատգամավորն ընդգծում է, որ Ղարաբաղյան երկրորդ պատերազմից հետո էլ Ադրբեջանը չի հրաժարվել օրակարգային խնդիրները լուծելու համար ուժի կիրառման սկզբունքով առաջնորդվելուց։
Այս համատեքստում Աբրահամյանն ուշադրություն է հրավիրում տարբեր երկրների հետ Ադրբեջանի ռազմական համագործակցության ընդլայնման հանգամանքի վրա․
«Մտահոգիչ է Ադրբեջանի ռազմատեխնիկական համագործակցության խորացումը Թուրքիայի, Իսրայելի, Պակիստանի հետ, նոր մատակարարումների պայմանավորվածությունները, որտեղ ի թիվս մեծ թվով տեխնիկական միջոցների և սպառազինության, նաև առկա են հարձակողական բնույթի զինատեսակներ»։
Պատգամավորի խոսքով՝ Հայաստանի անվտանգության համակարգում իրականացվող աշխատանքներն այս պահին բավարար չեն, զինված ուժերի բարեփոխումներն ուշանում են, այնինչ մի շարք խնդիրների լուծման համար դա անհրաժեշտություն է։
«Մենք ունենք վերակազմավորման, հնարավորությունների վերականգնման խնդիր, և երկրորդը՝ պետք է հասկանանք, որ հետպատերազմյան Արցախը և Հայաստանը լրիվ այլ ռեգիոնալ և աշխարհաքաղաքական իրավիճակում են, առկա են անվտանգային նոր սպառնալիքներ, ինչի պարագայում մեծ թվով ավանդական գործիքներ, միջոցներ չեն աշխատում», — ընդգծել է Տիգրան Աբրահամյանը։
«Պատիվ ունեմ» խմբակցության պատգամավորը լրագրողներին տեղեկացրել է, որ գրությամբ դիմել է ԶՈՒ գլխավոր շտաբի պետին և Սոթք-Խոզնավար հատված այցելելու ցանկություն հայտնել։ Ասում է՝ Սյունիքում տիրող իրավիճակի ամբողջական գնահատական կկարողանա տալ միայն այդ այցից հետո։
