Ադրբեջանն ԱՄՆ-ին բողոքի նոտա է հղել «Ինստագրամի հայ արքայի» վերաբերյալ

Պաշտոնական Բաքուն Վաշինգտոնին բողոքի նոտա է հղել ԱՄՆ հայկական ծագմամբ քաղաքացի Դեն Բիլզերյանի Ղարաբաղ կատարած “ապօրինի այցի” կապակցությամբ:

Դեն Բիլզերյանը Հայաստանում հայտնի է որպես «Ինստագրամի արքա», պոկերի սիրահար և դերասան, հարուստ գործարարի որդի, «ոսկե երիտասարդության» ներկայացուցիչ: Իր եղբայր Ադամ Բիլզերյանի և մոդել Սայլեն Մեդեյրոսի հետ միասին նա Հայաստան էր ժամանել օգոստոսի վերջին և հասցրել էր հայկական անձնագիր ստանալ և հաշվառվել Հայաստանի Զինված ուժերում:

Ինչպես հաղորդում է Ադրբեջանի ԱԳՆ մամուլի քարտուղար Հիքմեթ Հաջիևը, բողոքի նոտան փոխանցվել է Ադրբեջանում ԱՄՆ հարցերի ժամանակավոր հավատարմատար Ուիլյամ Գիլին: Դրանում ասված է, որ Բիլզերյանը, խախտելով «Ադրբեջանի Հանրապետության պետական սահմանի մասին» օրենքը, շրջանցելով տեղադրված վերասհկիչ անցակետերը, Ղարաբաղ է մուտք է գործել  Հայաստանի տարածքով:

Բողոքի նոտայում հաղորդվում է, որ Ղարաբաղում գտնվելու ժամանակ Դեն Բիլզերյանը զբաղվել է ապօրինի ռեժիմի պրոպագանդայով, ապօրինի ճանապարհով հրազեն է գնել և դրանից ցուցադարական կրակ բացել Ադրբեջանի զինված ուժերի դիրքերի ուղղությամբ:

Ադրբեջանի գլխավոր դատախազությունն այդ առնչությամբ քրեական գործ է հարուցել և Բիլզերյանի նկատմամբ միջազգային հետախուզում հայտարարել: Այժմ Բաքուն հույս ունի, որ Վաշինգտոնը միջոցներ կձեռնարկի, որպեսզի հետագայում նման բան չկրկնվի: