Ադրբեջանի սահմանին ձերբակալվել է Հայաստանի ԶՈւ ևս մեկ զինծառայող, որը նույն օրը վերադարձվեց
Թարմացում, 23.00, 2021թ․ հունիսի 8
Ադրբեջանը վերադարձրել է հայ զինծառայող Արթուր Քաթանյնաին, քանի որ դիվերսիայի վարկածը չի հաստատվել։ ՊՆ-ն պարզաբանել է, որ հունիսի 8-ին ձերբակալված ՀՀ ԶՈւ զինծառայող Արթուր Քաթանյանը ոչ թե սադրանքի համար մուտք է գործել Ադրբեջանի տարածք, այլ մոլորվել է:
«Լրացուցիչ հետաքննությունից հետո հայտնի է դարձել, որ … Քատանյանը դիվերսիայի նպատակով չի անցել Ադրբեջանի տարածք: Պարզվել է, որ նա մոլորվել է և այդ պատճառով է հատել սահմանը: Ադրբեջանը հերթական անգամ ցույց տվեց հումանիզմ և հայկական կողմին հանձնեց մի անձի, որը հանցանք չի գործել մեր երկրի դեմ», — հայտնում են Ադրբեջանի պաշտպանության նախարարությունից:
16.00, 2021 թ․ հունիսի 8
Ադրբեջանի պաշտպանության նախարարության մամուլի ծառայությունը հաղորդել է Հայաստանի հետ սահմանին զինծառայող Արթուր Քաթանյանի ձերբակալության մասին։
Ադրբեջանի պաշտպանական գերատեսչության տվյալներով՝ Հայաստանի հետախուզական-դիվերսիոն խումբը խախտել է սահմանը Լաչինի ուղղությամբ․
«Նախաքննության համաձայն՝ հակառակորդի հետախուզական-դիվերսիոն խմբի խնդիրը մեր տարածքի ականապատումն է եղել։ Ներկա պահին հստակեցվում են ձերբակալված դիվերսանտի մասին տվյալները», – ասված է Ադրբեջանի ՊՆ մամուլի ծառայության հաղորդագրությունում։
Նա Հայաստանի ԶՈւ արդեն յոթերորդ ձերբակալված զինծառայողն է վերջին կես ամսում։
- «Բաքուն պետք է հայտարարի, որ փակում է Լաչինի միջանցքը»․ Ադրբեջանի ԱԳՆ նախկին ղեկավար
- Գերակտիվություն և առաջին խախտումն․ Հայաստանում մեկնարկել է նախընտրական քարոզարշավը
- Հունիսի 15-ից կվերսկսվի երկաթուղային հաղորդակցությունը Հայաստանի և Վրաստանի միջև
Հայաստանի ՊՆ արձագանքը
Հայաստանի պաշտպանության նախարարությունը հաստատել է, որ պայմանագրային զինծառայող Արթուր Քաթանյանը հայտնվել է Ադրբեջանի վերահսկողության տակ գտնվող տարածքում։ Սակայն հաղորդագրությունում ընդգծվում է, որ շարքային Քաթանյանը մառախուղի պատճառով ապակողմնորոշվել է տեղանքում։
Այսպիսով՝ Հայաստանի պաշտպանության նախարարությունը հերքում է, որ ձերբակալվածը «դիվերսանտ» է․
«Ադրբեջանի ՊՆ հայտարարությունը Ա. Քաթանյանի՝ դիվերսանտ լինելու մասին, չի համապատասխանում իրականությանը»։
Ավելի վաղ ձերբակալված վեց զինծառայողների մասին տեղեկություններ չկան
2021 թ․ մայիսի 27-ին Ադրբեջանի պաշտպանության նախարարությունը հաղորդել էր այն մասին, որ գերեվարվել է Հայաստանի վեց զինծառայող։ Հայկական կողմը հաստատել էր այդ տեղեկությունը։
Ադրբեջանի ՊՆ-ն պնդում էր, որ դիվերսանտներ են գերեվարվել Ադրբեջանի Քելբաջարի շրջանում։
Սակայն Հայաստանի ռազմական գերատեսչությունը հաղորդում էր, որ հայ զինծառայողներին շրջափակել և գերեվարել են Հայաստանի տարածքում ինժեներական աշխատանքներ իրականացնելու ժամանակ։
Արդեն 12 օր է անցել նրանց ձերբակալման օրվանից, սակայն Հայաստանի ԶՈւ գերեվարված վեց զինծառայողների ճակատագրի մասին լրացուցիչ տեղեկություններ չեն հաղորդվում։
Դատում են 2020 թ-ի դեկտեմբերին ձերբակալվածներին
Բաքվում քննվում են 2020 թ-ի դեկտեմբերին՝ Արցախում ռազմական գործողությունների դադարից հետո Հայաստանի ԶՈւ ձերբակալված զինծառայողների քրեական գործերը։ 62 հայ զինվորականները գերեվարվել էին Մարտունու շրջանում։
Հունիսի 7-ին Ադրբեջանի գլխավոր դատախազությունը հաղորդել է նրանցից 13-ի դեմ հարուցված գործերով դատավարության մեկնարկի մասին։ Դրանից առաջ անցկացվել էր Հայաստանի ԶՈւ գերեվարված մյուս 14 զինծառայողների գործերով դատական առաջին նիստը։
Ձերբակալվածներից երեքը հայկական կողմին են վերադարձվել Արցախում ռուսական խաղաղապահ զորակազմի գլխավոր հրամանատար Ռուստամ Մուրադովի մասնակցությամբ։
