Ադրբեջանի Պետանվտանգության ծառայությունը հայտնել է ահաբեկչական խմբի ոչնչացման մասին

Ադրբեջանի պետանվտանգության ծառայության կողմից Բաքվում հունվարի 31-ին անցկացրած հատուկ գործողության արդյունքում «ահաբեկչական խմբի 4 անդամ է ոչնչացվել, որն Ադրբեջանի տարածքում պայթյուններ էր նախապատրաստում», — ասված է Պետանվտանգության ծառայության մամուլի ծառայության հայտարարությունում:

Այդ հաղորդագրության համաձայն՝ ահաբեկիչները ոչնչացվել են այն բանից հետո, որբ ուժային կառույցի աշխատակիցներին զինված դիմադրություն են ցուցաբերել՝ ատրճանակներ և ինքնաձիգներ կիրառելով:

«Պետական անվտանգության ծառայությունում տեղեկատվություն է ստացվել, որ Ադրբեջանի սահմաններից դուրս գործող ահաբեկչական կազմակերպություններին հարող մի խումբ անձինք, ձեռք բերելով պայթուցիկ նյութեր և զենք, երկրի տարբեր հատվածներում ահաբեկչական գործողություններ էին պլանավորում իրականացնել: Անցկացված հետաքննությունից հետո այդ տեղեկատվությունը հաստատվել է»:

ՊԱԾ մամուլի ծառայությունը նշում է հատուկ գործողության ընթացքում սպանվածների անունները:

«Կրոնական էքստրեմիզմի հողի վրա առանձնակի ծանր հանցագործությունների նախապատրաստման գործում կասկածվող Ադրբեջանի քաղաքացիներ «Աբու Խաֆսա» մականունով Մ. Ուլումբեկովին, «Աբդուլգարիբ» մականվամբ Գ. Դամիրովին, «Աբդուլխալիդ» մականվամբ Ֆ. Սադիղովին, Տ. Ամամեդովին և «Աբդուլլահ» մականվամբ Ս. Մամեդովին ձերբակալելու անհետաձգելի միջոցների արդյունքում հունվարի 31-ին հատուկ գործողություն է իրականացվել:

Գործողության ընթացքում Մ. Ուլումբեկովը, Տ. Ալմամեդովը, Գ. Դամիրոն ու Ս. Մամեդովը կրակ են բացել ինքնաձիգից և ատրճանակից: Հաշվի առնելով այն, որ նշված անձինք զինված դիմադրություն են ցուցաբերել, օրենսդրության պահանջների համաձայն, հատուկ խումբը ստիպված է եղել ոչնչացնել նրանց ծառայողական զենքից: Ֆ. Սադիղովը ձերբակալվել է որպես կասկածյալ:

Տվյալ պահին օպերատիվ-քննչական միջոցառումները շարունակվում են», — ասված է ՊԱԾ հայտարարությունում:

Ադրբեջանի պետական անվտանգության ծառայությունը ստեղծվել է 2015թ-ի դեկտեմբերի 14-ին նախկին ազգային անվտանգության նախարարության լուծարումից հետո: